Գյումրիում հրապարակը առք ու վաճառքի կենտրոն են դարձրել, որ հանրահավաքներ չլինե՞ն

Գյումրիի թատերական հրապարակի անցորդներն այնքան էլ լավ չեն կողմնորոշվում` հրապարակում են, որևէ զբոսայգու տարածքում, թե բացօթյա սրճարանում: Բանն այն է, որ ամառվա սկզբից հրապարակի տարածքը վերածվել է առք ու վաճառքի կենտրոնի: Ինչևէ, մի բան հստակ է, որ տարածքը նախկինի նման ազատ չէ, որպեսզի օգտագործվի հանրահավաքների, միջոցառումների համար: Հրապարակում տեղադրվել է «Կոկա-կոլա» ընկերության տաղավարը, երեխաների համար զբաղմունքի միջոց հանդիսացող տարատեսակ առարկաններ եւ սուրճ վայելելու աթոռակներ: 

Տեղեկացանք, որ տարածքը համայնքապատկանն է: Եվ սա է պատճառը, որ թատրոնի տնօրինությունը բացարձակ միջամտել չի կարող: Զրուցելով հրապարակում իրենց բիզնեսը ծավալողների հետ` պարզեցինք, որ նրանք տարածքներն զբաղեցնում են վարձակալական հիմունքով: Իսկ քաղաքապետարանն արդարանում է, որ այս մեթոդով լուծում է բնակիչների զբաղվածության եւ ժամանցի խնդիրները: Քաղաքապետարանից վստահեցնում են նաև, որ այս ամենը ժամանակավոր է: Շուտով ամենը տեղափոխվելու է որևէ զբոսայգի կամ համապատասխան այլ վայր: Տեղափոխությունը հետաձգվում է, քանի որ զբոսայգիները դեռևս կառուցապատվում են: 

Սակայն պետք է նշենք, որ հրապարակում տեղադրված ոչ բոլոր տաղավարները կարելի է տեղաշարժել, քանի որ դրանք քարաշեն են: Գյումրեցիներից ոմանք իրենց կարծիքն հայտնեցին.«Աղջիկ ջան, աչքկապոցի է, չի բացառվում, որ ըսիգ վերևներից ստացած հրահանգ է, որ էստեղ էլ ոչ մի տեսակի հանրահավաք կամ ցույց չէղնի»,-ասաց 68- ամյա Վարազդատ Ստեփանյանը` ավելացնելով, որ վերջին ամիսների հանրահավաքներին ոգևորությամբ էր մասնակցում:

Հիշեցնենք, որ «Չեք անցկացնի» նախաձեռնությունը սեպտեմբերի 25-ին` 18:00-ին ,իր առաջին հանրահավաքն է պատրաստվում անցկացնել Գյումրիի թատերական հրապարակում: Իսկ թե որքանով հրապարակի նման վիճակը կխանգարի հանրահավաքի մասնակիցներին, առաջիկա օրերը ցույց կտան: Ի դեպ հենց այդ օրը՝ նույն հանրահավաքի ժամին, նաև նոր թատերաշրջանի բացումն է` մեծ պրեմիերայով:

ՀԳ. Լուսանկարներում կա նաեւ հրապարակի նախկին տեսքը, երբ այն դատարկ էր: 

Արևիկ Հակոբյան Գյումրի