Իմ առնչությունը առաջին նախագահի հետ այն է, որ իր հորդորով եմ պատգամավորներ ընտրել
Քաղաքացիական ակտիվիստ Վարդգես Գասպարին մշտապես այնտեղ է, ուր ծավալվում են քաղաքական ակցիաներ, հանրահավաքներ, երթեր: Բացի դրանից նա գրեթե ամբողջ տարին միայնակ պիկետներ է անցկացնում: Վերջին ժամանակներս տեղի ունեցած իրադարձություններից ևս անմասն չմնաց: Վարդգես Գասպարիի հետ զրուցեցինք իր կողմից անցկացվող պիկետի, դրա հետևանքների և առաջիկա քայլերի մասին:
- Պարոն Գասպարի, օրեր առաջ Ձեր բնակարանի դիմաց գոմաղբ էին լցրել, ինչ որ մեկի դեմ բողոքեցի՞ք և նույնը կրկնվե՞լ է:
- Չէ, ի՞նչ իմաստ ունի, տարիներ է՝ բողոքում եմ: Մինչև այսօր դեռ չի կրկնվել, չնայած որ ես բողոքի ակցիաները ամեն օր անում եմ:
- Բաց նամակով դիմել էիք ՄԻՊ-ին, խնդրելով, որ Սերժ Սարգսյանին հորդորի այդպես այլևս չվարվել: ՄԻՊ-ից պատասխան ստացե՞լ եք:
- Չէ, դեռ ոչ մի պատասխան չեմ ստացել:
- Ձեզ այդ օրը բերման էին ենթարկել, պատճառը ո՞րն էր:
- Ստույգ չեմ կարող ասել, քանի որ ես ոչ մի հարցի չեմ պատասխանել, որ մի բան չեմ ստորագրել: Գուցե ինձ պատճառները ներկայացրել են, բայց ես չեմ էլ լսել:
- Ազատության հրապարակում հանրահավաքի ժամանակ հավաքվածներիին կոչ արեցիք Ձեզ միանալ, ինչ որ արձագանք եղա՞վ:
- Ոչ ոք ինձ չի միացել, միայնակ եմ շարունակում պիկետը:
- Ամենօրյա Ձեր պիկետները դեռ ինչքա՞ն եք շարունակելու, այն ինչ որ արդյունք կտա՞ կամ գուցե տվե՞լ է:
- Իհարկե արդյունք կա և արդյունք արդեն տվել է: Մարդիկ այդ ամենի միջոցով իրազեկվում են, հետո ինչ որ մարդիկ, թեկուզ անցնելիս վախեցած բարևում են, որոշները այնպես են բարևում, որ ուրիշները չտեսնեն, դրանից գուցե վախենում են: Ավելի համարձակները մոտենում են:
- Ամեն օր Պռոշյան-Դեմիրճյան խաչմերուկին և Լևոն Տեր-Պետրոսյանի առանձնատան դիմաց պիկետներ եք անում: Գուցե շուտո՞վ հերթը հասնի երկրորդ նախագահին:
- Իմ առնչությունը առաջին նախագահի հետ այն է, որ իր հորդորով եմ պատգամավորներ ընտրել, որոնց համար կրում եմ պատասխանատվություն, գործող նախագահը բնականաբար պատասխանտու է ամեն ինչում, իսկ Քոչարյանի հետ, այսպես ասած, առանձնապես առնչություն չունեմ, փաստացի ինքը գործող, դերակատար անձնավորություն չի: Իսկ ինչ վերաբերում է իր կուսակցությանը, Օսկանյանի պարագայում կրկնել եմ Փաշինյանի կարծիքը, որ ինքը՝ մարտի 1-ի դատավճիռներ հրապարակող մարդը, քաղաքականության մասին խոսելու իրավունք չունի, ինքը միայն դատարանում խոսելու իրավունք ունի:
Աննա Պապիկյան
Կարծիքներ