Տիգրան Ավինյանը նոր պաշտոն ունի

Այսօր Երեւանի քաղաքապետարանում ավագանու արտահերթ նիստն է։ Օրակարգում 19 հարց է ներառված, առաջին հարցով քննարկվում է Տիգրան Ավինյանին փոխքաղաքապետ ընտրելու հարցը։

Քաղաքապետ Հրաչյա Սարգսյանը մինչ հարցի քննարկումը կարծիք հայտնեց, թե Ավինյանը, միանալով իրենց թիմին` հնարավորություն կունենան նրա փորձառությունը կիրառել։ 

Ավինյանը ելույթով հանդես եկավ` նախ խնդրելով 1 րոպե լռությամբ հարգել մարտի դաշտում զոհվածների հիշատակը, ապա անցավ իր ելույթին։

«Ինձ շատ են հարցրել, թե խնդրահարույց չէ՞ փոխվարչապետի պաշտոնից հետո նշանակվել Երևանի փոխքաղաքապետ, ես վստահաբար ուզում եմ ասել` անկախ նախկինում ստանձնած պաշտոնից, ինձ համար մեծագույն պատիվ է ծառայել երեւանցիներին»։

Քվեարկության արդյունքներով՝ 44 կողմ, 0 դեմ, 2 ձեռնպահ ձայների հարաբերակցությամբ, Տիգրան Ավինյանն ընտրվեց Երեւանի փոխքաղաքապետի պաշտոնում։

Նշենք, որ հաջորդ տարի նախատեսված են Երեւանի ավագանու ընտրություններ, իշխանության քաղաքապետի թեկնածուն Տիգրան Ավինյանն է։ Վերջինս մի քանի ամիս է` քաղաքապետարանում կադրային փոփոխություններ է անում։