Նիկոլ Փաշինյանի գրառումները չեն կարող դիտարկվել որպես պետական գաղտնիք

Համացանցից տեղեկացանք, որ անձին պետական դավաճանության համար մեղադրանք են առաջադրել, քանի որ պետական գաղտնիք հանդիսացող տեղեկություններ է փոխանցել ադրբեջանցի և թուրք անձանց։ Պետական գաղտնիք հանդիսացող տեղեկություններն էլ եղել են պատերազմի ընթացքում վարչապետ Փաշինյանի ֆեյսբուքյան գրառումները: Ֆեյսբուքյան գրառում փոխանցելն ի՞նչ հանցակազմ է պարունակում և առհասարակ այդ գործողությունը կարո՞ղ է համարվել պետական դավաճանություն, հարցրեցինք փաստաբան Ալեքսանդր Կոչուբաևին:

Փաստաբանի պնդմամբ` պետական դավաճանության հանցակազմն ունի մի քանի հատկանիշ. առաջին` հավաքագրվել և թշնամու օգտին գործողություններ կատարելն է, երկրորդը` լրտեսությամբ զբաղվելը: Սրանք ենթադրում են քրեական պատասխանատվություն: «Ինչ վերաբերում է գաղտնիք հանդիսացող տեղեկությանն, ապա, որպեսզի մենք հասկանաք, թե ինչ բնույթի տեղեկություններն են հանդիսանում պետական գաղտնիք, մենք նախ պետք է ուսումնասիրենք պետական և ծառայողական գաղտնիքի մասին օրենքը, որտեղ հստակ նշված են, թե ինչ բնույթի տեղեկություններն են համարվում գաղտնիք և ենթակա են գաղտնագրման: Ըստ այդմ էլ պետք է առանձին գերատեսչություններն ու դրանց ղեկավարները որոշեն, թե տեղեկության որ մասն է համարվում ծառայողական, կամ պետական գաղտնիք: Որպեսզի հասկանանք Նիկոլ Փաշինյանի գրառումները համարվում են պետական գաղտնիք, թե ոչ, նախ պետք է դիտարկենք ՀՀ պետական և ծառայողական գաղտնիքի մասին օրենքը:

Միանշանակ Նիկոլ Փաշինյանի գրառումները չեն կարող համարվել պետական և ծառայողական գաղտնիք, քանի որ դրանք գաղտնագրված չեն և չեն էլ կարող գաղտնագրվել, քանի որ դրանք չեն պարունակում ՀՀ անվտանգությանը, ռազմական գործին, տնտեսությանը: Պետական և ծառայողական գաղտնիք համարվում են չափազանց բարձր շեմի տեղեկությունները: Այնուամենայնիվ տպավորություն չստեղծվի, թե ես արդարացնում եմ նրանց, ովքեր թեկուզ պետական գաղտնիք չհամարվող տեղեկություններ են փոխանցում թշնամի պետություններին»,-իր խոսքը եզրափակեց Ալեքսանդր Կոչուբաևը: