Պրոցեսից դուրս մնալը կամ չմասնակցելը ոչ մի ձևով չի ծառայելու քաղաքական դաշտի առողջացման նպատակին

«Հրապարակի» հարցազրույցը ՔՈ գործադիր մարմնի անդամ Գարեգին Միսկարյանի հետ 

-«Քաղաքացու որոշում» կուսակցության գործադիր մարմինը հայտարարել էր, որ վճռական է և գերլարումով մասնակցելու է առաջիկա ընտրություններին։ Էլի՞ վճռական եք, եթե դրանք անցկացվեն հին ԸՕ-ով:

-Այնուամենայնիվ, հույս ունեմ, որ այդ հինը չի լինելու, ու նոր Ընտրական օրենսգիրքը կընդունվի։ Դեռ ժամանակ կա, ու վաղ է պնդել, որ հնով է լինելու։ Բայց եթե հնով էլ լինի, մեծ հաշվով պրոցեսից դուրս մնալը կամ չմասնակցելը ոչ մի ձևով չի ծառայելու նպատակին։ Այսինքն՝ եթե խնդիրը քաղաքական դաշտի առողջացումն է, ու էդ օրենսգիրքը պետք է փոխվեր այդ նպատակով, ապա ընտրական պրոցեսին չմասնակցելը էդ առողջացմանը ոչ մի ձևով չի նպաստելու։

-Ի դեպ, ինչու՞ են բոլորը հույս հայտնում, որ նոր ԸՕ-ն կլինի։ Հնարավո՞ր է, որ կառավարությունից ինչ-որ հավաստիացումներ եք ստացել, թեկուզ ոչ պաշտոնական մակարդակով։

-Չէ, ուղղակի պատճառ չեմ տեսնում չլինելու՝ մեկ, և երկրորդ՝ այդ քայլով կառավարությունն ավելի շատ ժողովրդահաճո քայլ կանի` որպես պահանջված խնդրի լուծում։ Հակված եմ մտածելու, որ գոնե իրենց ընտրաձայներն ապահովելու համար էդ փոփոխությունը կանեն։

-Ասում եք՝ պատճառ չեմ տեսնում հին Ընտրական օրենսգիրքը նորով չփոխելու։ Բայց կա կարծիք, որ Փաշինյանն ընտրություններին կգնա հնով՝ հներին մրցապայքարից դուրս թողնելու և հների հետ ֆոնային պայքարի մեջ կմտնի։ Այն տրամաբանությամբ, որ իր այլընտրանքը նախկիններն են։

-Երկու կողմ ունի այդ, այսպես ասած, մեդալը։ Մի կողմից, այո, կառավարող և որոշակի վարչական լծակների տիրապետող ուժին ավելի ձեռնտու է հին ԸՕ-ով ու ռեյտինգայինով ընտրությունների անցկացումը, բայց, մյուս կողմից, եթե նրանք փոփոխությունը անեն, կարծում եմ՝ դա հանրության կողմից կընկալվի որպես քայլ առաջ, ռեֆորմ։ Էնպես որ, էդ հաշվարկի մեջ փաստ չի, որ կկորցնեն միանշանակ, հնարավոր է, որ այդ քայլով նաև շահեն։ 

-Հինը նաև ձեռնտու է հին, ռեսուրսներ, մեծամասնական կամ ռեյտինգային թեկնածուներ ունեցող կուսակցություններին, ի վերջո, կոչվում է՝ ֆեոդալական ընտրակարգ։ Այսինքն՝ փող, տեղերում մարդիկ, դուք այդ ամենը չունեք, ինչպե՞ս եք անելու։

-Այդ ամենը չունենք, բայց շատ լիահույս ենք, որ նոր օրենքով կգնանք, ու հնարավորություններն ավելի մեծ կլինեն, քան հնով, որովհետև, այո, հնով Ձեր ասած՝ ռեսուրսների պայքար է լինելու ավելի շատ։

-Կուսակցությունների մեծ մասը, գաղտնիք չէ, որ մարզերում ռեյտինգային թեկնածուներ չունեն։ Դուք ունե՞ք։

-Մարզեր կան, որ ունենք, մարզեր կան՝ ոչ, մարզեր կան՝ թեկնածուներ ունենք, որ էդքան էլ ճանաչված չեն, բայց նորից եմ ասում, որ շատ մեծ հույսեր ունեմ, որ փոխվելու է։ Եվ առավել ևս՝ փոփոխված ԸՕ-ով ընտրություններին չմասնակցելը ճիշտ չէ։

-Դաշինքով գնալու հնարավորություն տեսնու՞մ եք։ 

-Չէ, այս պահին կուսակցությունը վերջնական որոշում չունի, բայց ներքին քննարկումների արդյունքում կարող եմ ասել, որ դաշինքի տարբերակ չի քննարկվում։

-Նախորդ ընտրություններում՝ 2018 թ․ դեկտեմբերին, դուք ստացաք ընտրողների ձայների 1 տոկոսից պակասը։ Հիմա ի՞նչ ակնկալիքներ ունեք, ի՞նչ է փոխվել այս ընթացքում։

-Նախորդ ԱԺ ընտրություններին մենք ընտրարշավը սկսելուց մեկ օր առաջ ենք գրանցել կուսակցությունը։ Ընտրարշավը սկսվել է, 12 օրվա մեջ այդ 1 տոկոսը կամ 1 տոկոսից պակաս հավաքել ենք։ Հիմա ՔՈ-ն 3 տարվա կուսակցություն է, որը մասնակցել է տարբեր քաղաքական գործընթացների, տարբեր կուսակցականներ տարբեր չափով ակտիվ են եղել քաղաքական դաշտում։ Էնպես չի, որ չափորոշիչը նախորդ ընտրություններն են։ Թե ինչ արդյունք կլինի, կախված է տարբեր հանգամանքներից, էս պահին դժվարանում եմ ինչ-որ գնահատական տալ։ Շատ մեծ են հնարավոր տարբերակների հավանականությունները։

- Իսկ նրանք, ովքեր հիասթափված են Փաշինյանի թիմից, բայց նախկինների հանդեպ էլ անհաղթահարելի հակակրանք ունեն, ըստ Ձեզ, կընտրեն Ձե՞զ որպես 2018-ի ալիքի տակ քաղաքական դաշտ մտած կուսակցության։

-Հիմա մարդիկ շատ ապատիկ վիճակում են՝ պատերազմի ու այս ճգնաժամից ելնելով, ու նաև բազմաթիվ սոցիալական խնդիրների ու ռեֆորմների բացակայության պատճառով մարդկանց մոտ հավատի լուրջ կորուստ կա, ու դժվար է ասել, թե ով ինչպես կվերաբերվի մեր մոտեցումներին։ Ո՞վ կընդունի մեզ ավելի շատ․ նրա՞նք, ովքեր հիասթափվել են կառավարությունից, թե՞ նրանք, ովքեր կառավարող ուժի և նախկին կառավարիչների մեջ կընտրեն, այսպես ասած՝ երրորդ տարբերակը։ Շատ դժվար է կանխատեսել, թե այս ընտրություններում ընտրողն ինչ վարք կդրսևորի։

-Փող ունե՞ք։ Շատերն ասում են՝ մեզ համար դժվար է անգամ ընտրագրավը մուծելը։

-Մեր համար էլ հեշտ չի լինելու, էս պահին դեռ վաղ է դրա մասին խոսել, ընտրությունները հունիսի 20-ին են, ու դեռ ժամանակ կա։ Նախորդ ընտրություններին ողջ գումարը հավաքել ենք կուսակցականներով, հիմա ավելի ճանաչված ենք, և ավելի շատ մարդիկ են մեզ վստահում։ Կարծում եմ՝ գումարի հետ կապված այդքան խնդիր չի լինի, որքան նախորդ ընտրություններում։ Բայց, այնուամենայնիվ, ասել, թե նման խնդիր չկա, ճիշտ չէ։ 

-Սուրեն Սահակյանն ասել էր՝ հունիսին մանդարինը պակասություն կանի։ Ի՞նչն է ավելցուկով լինելու՝ ծիրա՞նը։

-Մանդարինը մարքեթինգային քայլ էր․ որպես նորաստեղծ կուսակցություն ինչ-որ ձևով մնացածից տարբերվելու։ Հիմա, կարծում եմ, քաղաքական բովանդակության վրա պետք է դրվի շեշտը։

-Քննադատելու՞ եք իշխանություններին քարոզարշավի ընթացքում։

-Մենք այս 2,5 տարվա մեջ հետևողական ենք եղել մեր բռնած քաղաքական գծի մեջ։ Լավին լավ ենք ասում, չնայած՝ լավ գրեթե չի եղել, վատին վատ ենք ասում։ Հիմա լավ կանեն, կողջունենք, վատ կանեն, կքննադատենք։ ԸՕ-ն եթե նորը ընդունվի, ո՞նց կարող ենք չողջունել։ Բայց այստեղ էլ զուգահեռ փոփոխությունների անհրաժեշտություն կա։ Օրինակ՝ կայուն մեծամասնության հարցը եթե չլուծվի, էլի լինելու է քննադատություն։