Չալաբյանի գործն իրավական գործընթաց դիտարկելը բավականին դժվար է. պաշտպան

Քիչ առաջ տեղի ունեցավ Ավետիք Չալաբյանին կալանավորելու միջնորդության քննությունը: Չալաբյանը 2 ամսով կալանավորվեց։

Հիշեցնենք, որ հասարակական-քաղաքական գործիչ Ավետիք Չալաբյանը ոստիկանության բաժին է բերման ենթարկվել Քրեական օրենսգրքի 163–րդ հոդվածի հատկանիշներով (հավաք անցկացնելուն կամ դրան մասնակցելուն խոչընդոտելը, հավաքին մասնակցելուն հարկադրելը կամ հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելը): Չալաբյանի պաշտպա Արթուր Հարությունյանը մեզ հետ զրույցում նշեց, որ տեղի ունեցածը իրավական գործընթաց դիտարկելը բավականին դժվար է:

«Գործով դատավորն Արուսյակ Ալեքսանյանն է, դատարանի որոշումը վերջնական որպես այդպիսին դեռևս պատրաստ չէ, դեռևս առկա չեն հիմնավորումներն ու իրավական մեկնաբանությունները, մեզ տրամադրվել է ընդամենը մեկ էջից բաղկացած քաղվածք, որտեղ ըստ էության գրված է միայն գործի եզրափակիչ մասի մասին, այն է` Ավետիք Չալաբյանը կալանավորվել է: Գործն իրավական գործընթաց կժվարանամ որակել, քանի որ առաջին օրվանից Ավետիք Չալաբյանի բնակարանում խուզարկություն անելուց հետո նրան բերման ենթարկելը, ձերբակալելը, հիմա արդեն նաև կալանավորելն իրականացվել են քրեաիրավական դատավարության կոպտագույն խախտումներով և այդ խախտումները շարունակվում են մինչ այս պահը: Անձը կալանավորվել է այն դեպքում, երբ քրեական գործով ձեռք բերված բավարար փաստական տվյալներ չկան»,- նշում է փաստաբանը:

Նրա խոսքով`  դատարանի որոշումը վերջնական տարբերակով տրամադրելուց հետո` փաստաբանական թիմի կողմից ձեռնարկվելու է , որպեսզի գործը բողոքարկվի վերաքննիչ դատարանում` դատարանի որոշման օրինականությունը ստուգելու վերաբերյալ: