ՀԴՄ կտրոնների նշանակությունը «մի փոքր» չափազանցված է
Վերջին տարիներին յուրօրինակ ավանդույթ է դարձել ՀԴՄ կտրոնների թեման ամենաբարձր մակարդակում շոշափելը՝ դրանց թվաքանակի ավելացումը ներկայացնելով որպես ստվերային տնտեսության կրճատման, տնտեսության ակտիվացման, մարդկանց բարեկեցության բարձրացման ցուցիչ:
Գուցե երեւույթի մեջ չխորանալու, վարչապետին հաճոյանալու նկատառումներով, որոշ պաշտոնյաներ «մի փոքր» չափազանցնում են այդ կտրոնների՝ որպես ինչ-ինչ երեւույթների ցուցիչ լինելու նշանակությունը՝ այդպիսով անհարմար, եթե չասենք՝ ծիծաղելի դրության մեջ դնելով նրան:
Փետրվարի 18-ին վարչապետը հերթական անգամ հնչեցրեց փետրվար ամսվա առաջին 15 օրվա տվյալները. ՀԴՄ կտրոններով եւ հաշվարկային փաստաթղթերով արձանագրվել է 604 հազար գործարքով ավելի, քան նախորդ տարվա նույն ժամանակահատվածում: Թերեւս, եթե այս տվյալներն ինչ-որ բանի մասին ասում են, լավ կլիներ առանձնացնել ՀԴՄ կտրոնների թվաքանակը:
Համենայնդեպս՝ անհասկանալի է, թե ինչի համար է այս հարցում շտապողականությունը: Գուցե տեղին լիներ այդ կամ 10-օրյա պարբերականությամբ համավարակի եւ պատերազմի առաջացրած սոցիալական եւ այլ հետեւանքների մասին տվյալներ հրապարակելը, բայց տնտեսության այս կամ այն ոլորտին վերաբերող չավարտված ամսվա տվյալների դեպքում այդպիսի վիճակագրությունն արժեք չի ներկայացնում:
Հայտնի է, որ յուրաքանչյուր ամսվա մինչեւ 15-ը վճարվում են աշխատավարձեր եւ կենսաթոշակներ: Հետեւաբար, գնումների մեծ մասը բաժին է հասնում հենց այդ ժամանակահատվածին: Բացի դրանից, եթե կտրոնների թեման հրապուրիչ է, ապա տեղին կլիներ նշել, թե միջինում մեկ կտրոնի հաշվով որքան է կազմել մանրածախ առեւտրի շրջանառությունը՝ ըստ ձեւավորման աղբյուրների (խանութներ, կրպակներ եւ այլն): Հնարավոր է, որ սոցիալական ծանր վիճակում հայտնված բնակչությունը մեծ գնումների փոխարեն սկսել է կատարել փոքր խմբաքանակով գնումներ՝ տնտեսական անորոշության կամ եկամուտների նվազման պատճառով, անկանխատեսելի ծախսեր առաջանալու սպասումներով (օրինակ, մինչեւ սննդի հաջորդ խմբաքանակը գնելը, կարող է առաջանալ դեղորայքի անհրաժեշտություն):
Գնորդի վարքագծի նշված եւ այլ փոփոխությունները կարող են բարձրացնել գնումների հաճախականությունը՝ հանգեցնելով ՀԴՄ կտրոններով գործարքների թվաքանակի ավելացմանը, ինչը պարտադիր չէ, որ ենթադրի առեւտրի շրջանառության մեծացում կամ ստվերային շրջանառության կրճատում: ՀԴՄ կտրոնների թվաքանակի մեծացման մեջ կարող է որոշակի մաս կազմել նաեւ հարկային վարչարարության արդյունքում տնտեսվարող սուբյեկտների կարգապահության որոշակի բարձրացումը կամ ուղղակի՝ նրանց բարեխղճությունը, պատասխանատվության զգացողության մեծացումը:
Որպեսզի ավելի հստակ լինի պատկերացումը խնդրո առարկայի վերաբերյալ, տրամաբանական կլիներ հրապարակել 2019 եւ 2020 թվականների տվյալները, ինչը հնարավորություն կընձեռեր պարզել, թե 17.3 տոկոսով մանրածախ առեւտրի շրջանառության կրճատման պայմաններում որքանով է կրճատվել (ավելացել) կտրոնների թվաքանակը: Այլապես, երկրի բարձրագույն պաշտոն զբաղեցնող անձինք մշտապես կհայտնվեն զավեշտալի վիճակում, որի օրինակներից մեկը հետեւյալն է. «2019 թվականի առաջին 7 ամիսների ընթացքում՝ նախորդ տարվա նույն ժամանակաշրջանի համեմատ, 65 միլիոն 633 հազար ՀԴՄ կտրոն ավել է տրվել, ինչն ապահովել է ավելի քան 170 մլրդ դրամի հավելյալ առեւտրաշրջանառություն»։ Սա վարչապետի գրառումն է՝ 2019 թվականին: Այդ տեմպերի պահպանման դեպքում՝ 2019 թվականի մնացած 5 ամիսներին մանրածախ առեւտրի շրջանառությունը պետք է աճեր առնվազն 120 մլրդ դրամով, այսինքն՝ տարվա կտրվածքով ընդհանուր աճը կկազմեր առնվազն 290 մլրդ դրամ, այլ ոչ 138.1 մլրդ դրամ (1 549 987.0 մլն դրամ (2019 թ.) - 1 411 771.8 մլն դրամ (2018 թ.) = 138.1 մլրդ դրամ):
Այսպիսով, ՀԴՄ կտրոնների նշանակությունն ուռճացնելը, դրանց թվաքանակի բացարձակ փոփոխությունների հիման վրա բարձր ամբիոններից դատողություններ անելն իմաստազուրկ են եւ տգեղ:
Այդուհանդերձ, հարգելի հայրենակիցներ, պահանջեք ՀԴՄ կտրոններ, որովհետեւ դրանք կարեւոր են ձեր իսկ իրավունքները պաշտպանելու տեսանկյունից. վատորակ կամ ժամկետանց ապրանքի վերադարձի հնարավորություն եւ այլն: Հարգելի տնտեսվարող սուբյեկտներ, տրամադրեք կտրոններ եւ մեկընդմիշտ հանեք այդ հարցն օրակարգից: Ի վերջո, դա մարդկանց սպասարկման մշակույթի հարց է:
ՀԳ. Ընդհանուր առմամբ, ՀԴՄ կտրոնը հարկային վարչարարության գործիք է, եւ դրա արդյունավետության հարցը կարող է պարբերաբար քննարկվել ՊԵԿ-ում անցկացվող խորհրդակցություններում (ինչը հաստատ արվում է): Կառավարությունում կարող են արվել հարցադրումներ՝ կապված առեւտրի շրջանառության ծավալի, այդ մասով հարկային եկամուտների հետ: Իսկ եթե կհետաքրքրի բնակչության կենսամակարդակի հարցը, ապա կարեւոր է առեւտրի շրջանառության կառուցվածքի հարցը. արդյունաբերական եւ պարենային ապրանքների բաժնեմասերն ընդհանուր շրջանառության մեջ: Այլ խոսքով, կառավարության նիստերին հարիր է քննարկել այս կամ այն ոլորտի զարգացումը բնութագրող ցուցիչները, այլ ոչ դրանք ձեւավորող հարյուր-հազարավոր փոփոխականները:
Գագիկ ՎԱՐԴԱՆՅԱՆ
Տնտեսագի- տության դոկտոր, պրոֆեսոր
Կարծիքներ