Ռ․ Սուքիասյանը պատրաստակամություն է հայտնել՝ ներկայացնել զենքը

Երեկ Երեւանի ընդհանուր իրավասության դատարանի Շենգավիթի նստավայրում տեղի ունեցավ օրերս Ամիրյան փողոցի կրակոցների գործով ձերբակալված Ռոբերտ Սուքիասյանին կալանավորելու միջնորդության քննությունը։ Ռ․ Սուքիասյանը, հիշեցնենք, իշխանական ցուցակով պատգամավոր ընտրված գործարար Խաչատուր Սուքիասյանի կրտսեր եղբայրն է, որը հուլիսի 18-ի երեկոյան կրակոցներ էր արձակել Ամիրյան 18 հասցեի մոտ՝ ոտքից վիրավորելով ԱՄՆ մի քաղաքացու։ Ձերբակալվածի շահերի պաշտպան Գոռ Միքայելյանը, սակայն, ոչ իրավաչափ եւ ապօրինի է գնահատում իր պաշտպանյալի ձերբակալությունը եւ դրա դեմ բողոք է ներկայացրել դատարան։

Երեկ մեկ դատական նիստով քննվում էին միաժամանակ նրա ձերբակալության իրավաչափության եւ կալանքի միջնորդության հարցերը։ Գործը քննում է դատավոր Վաչե Մարգարյանը։ Մինչ դատական նիստը սկսվելը, զրուցել ենք Սուքիասյանի փաստաբան Գոռ Միքայելյանի հետ։

- Պարոն Միքայելյան, ինչո՞վ համաձայն չեք Քննչական կոմիտեի գործողությունների հետ, որ բողոքարկել եք ձերբակալության որոշումը եւ այն համարում եք ոչ իրավաչափ։

- Ձերբակալման նպատակների մասով առավել եւս համաձայն չեմ, դա հստակ է, որ որեւէ նպատակ չկա, էնտեղ նպատակը օրենսդրությունը հստակ նախատեսում է՝ որն է, իսկ էս դեպքում բացակայում է, որովհետեւ ինքնակամ ներկայացել է իրավապահ մարմիններին, պատրաստակամություն է հայտնել դեպքի հանգամանքների մասին տեղեկություններ ներկայացնել եւ ներկայացնել զենքը։

- Այսինքն՝ Ռոբերտ Սուքիասյանն ընդունե՞լ է, որ ինքն է եղել կրակողը։

- Այո, ընդունել է, որ ինքն է կրակողը՝ ինքնապաշտպանության նպատակով ստիպված կրակել է։

- Իսկ ի՞նչ հանգամանքներում է տեղի ունեցել միջադեպը։

- Միջադեպի հանգամանքների մասին ես էս պահին որեւէ տեղեկություն չեմ հայտնի, քանի որ նախաքննություն է իրականացվում, նաեւ չեմ ուզում դրանով վնասել հակառակ կողմի շահերին եւ այդ նախաքննությունը, դատավարությունը տեղափոխել հրապարակային քննարկման հարթակ։

- Դուք հիմա, փաստորեն, պնդում եք, որ Քննչական կոմիտեի կողմից ապօրինի է եղել Ռ․ Սուքիասյանի ձերբակալումը։

- Այո։

- Ստացվում է, որ այսօր գործող իշխանությունների օրոք նախաքննական մարմինը կարող է որեւէ ապօրինի գործողությո՞ւն կատարել։

- Դե, ինձ մոտ էն տպավորությունն է, որ ինչ-որ Հռոմի պապից ավելի կաթոլիկ ձեւանալու փորձեր են կատարում՝ ցույց տալով, որ առավել քան օբյեկտիվ են, բայց դրանով փաստացի վնասում են արդարադատության շահը։

- Կարո՞ղ է քաղաքական ենթատեքստ կա դրա տակ, հնարավո՞ր է՝ քաղաքական հետապնդում են իրականացնում Խաչատուր Սուքիասյանի եղբոր նկատմամբ։

- Ես չեմ կարող էդպիսի բան ասել, ամեն դեպքում՝ եզրակացությունները թողնում եմ Ձեզ։

- Նմանատիպ իրավիճակ եղավ նաեւ մի քանի օր առաջ՝ կապված Սյունիքի որոշ համայնքապետերի հետ։ Նրանց փաստաբաններն էլ էին դժգոհում, որ իրենց պաշտպանյալները գնացել ինքնակամ ներկայացել են քննչական մարմին, բայց նրանց ձերբակալել են, ընդ որում՝ ասֆալտին պառկեցնելով։ Ձեր պաշտպանյալի դեպքում, կարծես թե, նման բան չի եղել, չէ՞։

- Չէ, որովհետեւ ինքնակամ ենք գնացել ներկայացել, հիմա, չգիտեմ, իրավիճակից ելնելով՝ երեւի թե դրա հնարավորությունը չեն ունեցել անելու։

- Փաստորեն, Դուք էլ եք դժգոհում, որ Ձեր պաշտպանյալին ապօրինի են ձերբակալել, այն էլ՝ ինքնակամ ներկայանալու դեպքում, նրանք էլ են դժգոհում՝ լինելով ընդդիմադիր թեւից։ Մինչդեռ Սուքիասյանն իշխանական թեւից է։

- Դե, հիմա, եթե ապօրինություն է, ի՞նչ կապ ունի, թե որ թեւից են։ Եթե ապօրինությունը տեսնում ենք, բնականաբար, բոլորս էլ բարձրաձայնում ենք դրա մասին։

- Եթե դատարանը բավարարի կալանքի միջնորդությունը, եւ Ռոբերտ Սուքիասյանը կալանավորվի, Դուք վերադաս ատյանում կբողոքարկե՞ք դատարանի որոշումը։

- Իհարկե, իրավական գործընթացով կբողոքարկենք։

ՀԳ․ Դատական նիստն ավարտվեց, որոշումը կհրապարակվի այսօր ժամը 12։00-ին։