Ադրբեջանի հետ խաղաղության պայմանագրի տեքստը գրեթե պատրաստ է. Միրզոյան
Ադրբեջանի հետ խաղաղության պայմանագրի նախագծի տեքստը գրեթե պատրաստ է։Այս մասին Տալլինում իր էստոնացի գործընկեր Մագնուս Ցահքնայի հետ համատեղ մամուլի ասուլիսում ասել է Հայաստանի արտգործնախարար Արարատ Միրզոյանը։
«Ինչ վերաբերում է Ադրբեջանի հետ հարաբերություններին, մենք շարունակում ենք բանակցային գործընթացը։ Խաղաղության համաձայնագրի նախագծի տեքստը գրեթե պատրաստ է։ Հայաստանը պատրաստ է մեկ ամսվա ընթացքում ամբողջությամբ վերջնական տեսքի բերել տեքստը և խաղաղության պայմանագիր կնքել Ադրբեջանի հետ»,- հավելեց Միրզոյանը։
Նրա խոսքով, «Հայաստանը հավատարիմ է մնում խաղաղության օրակարգին, Ադրբեջանի հետ հարաբերությունների կարգավորմանը, 1991 թվականի Ալմա-Աթայի հռչակագրի հիման վրա երկու երկրների տարածքային ամբողջականության ճանաչմանը և այս հռչակագրի հիման վրա սահմանազատման գործընթացի շարունակմանը»։
«Ժամանակն է փակել Հարավային Կովկասի հակամարտության էջը և խաղաղություն հաստատել այս տարածաշրջանում։ Մենք հստակ հավատում ենք, որ այս խաղաղությունը շահավետ կլինի տարածաշրջանի բոլոր ժողովուրդների և երկրների համար։
Իհարկե, մենք կշարունակենք աշխատել այս ուղղությամբ, և ակնկալում ենք մեր գործընկերների ամուր աջակցությունը, որոնք շահագրգռված են հարավկովկասյան տարածաշրջանում երկարաժամկետ խաղաղությամբ և կայունությամբ»,- ասել է Միրզոյանը։
Կարծիքներ