Նույնն է, թե պատռես Պիկասոյի նկարները եւ ասես՝ ամեն ինչ կորած չէ, կկարկատենք
«Հրապարակի» զրուցակիցը ճարտարապետ Հրաչյա Պողոսյանն է:
- Երեւանը վերածվել է անտեր քաղաքի՝ ով որտեղ ինչ ցանկանում՝ կառուցում է: Թամանյանական շենքերի հարեւանությամբ բարձրահարկ նորակառույց շենքեր են: Ի՞նչ պետք է անել, որ քաղաքի ճարտարապետական նախագիծը չփչանա։
- Բոլոր քաղաքներում պետք է քաղաքաշինական խորհուրդներ լինեին, ու այդպիսի հարցերով զբաղվեին: Կա նաեւ Ճարտարապետների միություն: Նրանք եւս պետք է շատ ուշադիր լինեն, քաղաքի դիմագիծը փչացնող կառույցների մասին հայտարարություններով հանդես գան:
- Կարծում եք՝ Ճարտարապետների միության՝ պալատի, հայտարարությունները հայրենի օլիգարխների ախորժակը կարո՞ղ են զսպել:
- Որոշ չափով՝ գուցե: Ինչքան հնարավոր է՝ միությունը խոսում է:
- Այդ դեպքում ինչպե՞ս է ստացվում, որ Թամանյանի ճարտարապետական նախագծով կառուցված շենքի հարեւանությամբ 16 հարկանի բարձրահարկ շենք է կառուցվում:
- Իհարկե, կան նման դեպքեր, որոնք փչացնում են քաղաքի ճարտարապետական նախագիծը, սակայն չի կարելի ասել, թե դա համատարած է: Պատահում են նման դեպքեր, բայց ոչ միշտ: Այս բոլորի պատճառը քաղաքաշինության խորհրդի բացակայությունն է: Քաղաքապետարանը որոշել է, որ քաղաքաշինության խորհուրդ Երեւանին հարկավոր չէ: Հիմա քիչ թե շատ Ճարտարապետների միությունն է աշխատում: Վերջերս նոր վարչություն է ընտրվել, որը համալրվել է երիտասարդ ու խելացի կադրերով: Հավանաբար, նրանք ավելի գործունյա են եւ բանիմաց: Խնդիրները բավականին բարդ են այսօր, այնքան բարդ, որ դա բացատրելն անհնար է:
- Որոշ շրջանակներ բարձրահարկ շենքերով հիանում են, կարծում են, թե դրանք եվրոպական ստանդարտներին ավելի մոտ են: Ձեզ այդ շինությունները դուր գալի՞ս են:
- Այնքան էլ դուր չեն գալիս, որոշ շինություններ փչացնում են քաղաքի տեսքը: Այս ամենի հիմքում բարդ քաղաքաշինական խնդիրներ են թաքնված, որոնց մասին խոսել չեմ ցանկանում:
- Ո՞ր նորակառույց շենքերը կառանձնացնեք՝ որպես քաղաքի տեսքը փչացնող, քաղաքը տգեղացնող կառույցներ:
- Չեմ կարող առանձնացնել, դրանք շատ են: Պետք է առանձին-առանձին ուսումնասիրել եւ եզրակացություն ներկայացնել: Ցավալի է, որ Երեւանը չունի քաղաքաշինության խորհուրդ:
- Ձեր կարծիքով` ինչո՞ւ չունի….
- Քաղաքապետարանն այդպես է ցանկանում….
- Վերջին օրերին հասարակությունը բուռն կերպով քննարկում է Հանրապետության հրապարակի զարդարանքները: Կառավարության շենքի վրա 8 հազար անցք է արվել, որպեսզի հրապարակը լուսավորվի եւ, իբրեւ թե, հեքիաթային տեսք ստանա….
- Շատ վատ, սարսափելի բան են արել, չի կարելի այդպես թեթեւսոլիկ վերաբերվել հուշարձաններին: Պետք է լրջանալ: Այդ տոնակատարությունները մի քանի օր են տեւելու: Ո՞նց կարելի է մի քանի օրվա համար այդպես վարվել նման կարեւորություն ունեցող կառույցի հետ: Այդ լույսերը հանվելու են, իսկ շենքը հավերժ է:
- Իշխանավորները պնդում են, որ այդ անցքերը վերանորոգման ենթակա են: Ինչպե՞ս պետք է վերանորոգեն շենքի վրայի զարդանախշերի վրա արված անցքերը:
- Դրանք վերանորոգելն անհնար է, որովհետեւ շենքի վրա եթե անցք է արվում՝ վերջ: Նույնն է, թե պատռես Պիկասոյի նկարները եւ ասես՝ ամեն ինչ կորած չէ, կկարկատենք նկարը: Ցեմենտով կարելի է մի փոքր վերանորոգել, սակայն դա չի կարող տալ շենքի հին պատկերը: Թամանյանը մի անգամ շենք է կառուցել, հիմա այդ շենքը պետք է հանգիստ թողնել, չի կարելի այդպես ծակծկել, հետո ասել` դե կվերանորոգենք: Շենքը վնասելուց առաջ պետք է նախապես մտածեին, թե ինչպես պետք է այն վերանորոգվի:
- Օրինակ, եթե Խորհրդային Միության տարիներին այսպես ծակծկեին պատմամշակութային արժեք ունեցող շենքը, ի՞նչ տեղի կունենար` դժգոհություններից զատ:
- Այն ժամանակ էլ մի բան չէր: Անցյալը պետք չէ հիշել, շատ վատ բաներ էլ են եղել:
- Ի՞նչ դեպքեր կհիշեք:
- Եկեք մտածենք այսօրվա 8 հազար անցքի մասին…
Կարծիքներ