Կոռուպցիա և ճնշումներ ես անձամբ չեմ տեսել

ԱԺ ՀՅԴ խմբակցության՝ ռեյտինգային ընտրակարգով Էջմիածնից ընտրված պատգամավոր Անդրանիկ Կարապետյանը, ինչպես հայտնի է, Մանվել Գրիգորյանի սանիկն է։ Նա չի ընդունում իր քավորի արարքը եւ մեծ ցավ է ապրում հատկապես «Զինվորի բաժին» սննդամթերքի մասով, բայց՝ որպես տղամարդ, չի ցանկանում անդրադառնալ Մանվել Գրիգորյանի քավորությունից հրաժարվել-չհրաժարվելու հարցին, որ չստացվի, թե եզն ընկավ, դանակավորները շատացան։ «Թող ստեղ չնկատվի, որ, այ, ինքն ընկավ՝ ես ուզում եմ իրենից հրաժարվեմ… ես նման մարդ չեմ։ Եթե միայն զենքի հարցը լիներ քննարկման, ես ինձ ուրիշ ձեւ կպահեի։ Բայց եթե էստեղ խոսքը վերաբերում ա սրբոցից սրբոց բանակին, յուրաքանչյուր մարդ, հայ ազգի ներկայացուցիչ էդ հարցին պետք է միանշանակ վերաբերվի»,- կարծում է նա։



Կարապետյանը, ճիշտ է, Մանվել Գրիգորյանի սանիկն է, բայց էջմիածինցիներն ասում են՝ Կարապետյանը Գրիգորյանի հետ շփում չունի եւ չի ունեցել, անգամ իր սրտով չի եղել Մանվել Գրիգորյանի քավորությունը, Մանվելին չի սիրել ու չի ընդունել որպես քավոր։ Բայց ժամանակին հայրը մոտ է եղել Գրիգորյանի հետ, ու որոշել են Մանվելին քավոր կարգել։



Հարցրինք էջմիածինցի պատգամավորին՝ այս տարիներին վախի մթնոլորտ տեսե՞լ է Էջմիածնում, որ տարածվել էր Մանվել Գրիգորյանի ու նրա թիմակիցների կողմից։



«Ամեն ինչ էլ տեսել եմ ես էս Հայաստանում, էս 20 տարիների ընթացքում էնքան բան եմ տեսել»,- ասաց նա՝ չհստակեցնելով կոնկրետ մեր հարցի պատասխանը։



Ապա ավելացրեց, որ Էջմիածին քաղաքի քաղաքացիներն այս մի քանի օրվա ընթացքում իրենց վերաբերմունքն արտահայտեցին։ «Իրանց տարիների ընթացքում այդ կուտակված բացասական էներգիան, էդ վրդովվածությունն իրանք արտահայտեցին ցույցերի միջոցով։ Դա, իմ կարծիքով, ամեն ինչ արդեն ասում ա։ Ես դա չպիտի ասեմ»,- ասաց Կարապետյանը։



**- Դուք էլ՝ որպես Էջմիածնի քաղաքացի, Ձեր վրդովմունքն արտահայտե՞լ եք այս տարիներին։**



Միանշանակ։ Բազմիցս արտահայտել եմ։



**- Իսկ ի՞նչ եք արել այս ընթացքում, ասում էին՝ Մանվել Գրիգորյանի կողմից կլանային համակարգ էր գործում, նա բռնապետություն էր ստեղծել Էջմիածնում եւ հարակից գյուղերում, Դուք՝ որպես ե՛ւ նրա սանիկ, ե՛ւ պատգամավոր, ե՛ւ ուղղակի այդ տարածքի բնակիչ, երբեւէ բարձրաձայնե՞լ եք այդ խնդիրների մասին։**



Տենց գլոբալ խնդիրներ՝ արտառոց, ակնհայտ, ցայտուն… մանր-մունր շատ բաներ ա եղել, ճիշտ ա, ժողովրդին միշտ դա դուր չի եկել եւ այլն, եւ այլն։ Դա, իմ կարծիքով, յուրաքանչյուր քաղաքացու վերաբերմունքի տեսքով արտահայտվեց էս քանի օրվա ցույցերի ընթացքում։



**- Իսկ Դուք երբեւէ փորձե՞լ եք այդ մասին բարձրաձայնել կամ տեսե՞լ եք որեւէ մտահոգիչ բան, որը Մանվել Գրիգորյանի ձեռամբ է դրսեւորվել՝ կոռուպցիա, մարդկանց ճնշել, վախեցնել, ինչ-որ բռնակալական դրսեւորումներ։**



Կոռուպցիա ես չեմ տեսել, ճնշումներ անձամբ չեմ տեսել, տեղյակ եմ եղել խոսակցությունների տեսքով։



**- Կամ՝ որ մարդկանց գույք խլեն, տեսե՞լ եք նման բաներ։**



Չէ, տենց բաներ ընդհանրապես ո՛չ տեսել եմ, ո՛չ լսել։



**Վահե ՄԱԿԱՐՅԱՆ**