Բողոքի ակցիա ԵԽԽՎ գրասենյակի առաջ

Մարտի 1-ի զոհերի հարազատները երեկ բողոքի ցույց են արել ԵԽԽՎ երեւանյան գրասենյակի առաջ: "Ո՞ւր են մարտի 1-ի մարդասպանները" ցուցապաստառով եւ 2008թ. մարտի 1-ին սպանված զոհերի 10 լուսանկարներով նրանք գրեթե 1 ժամ լուռ կանգնել են գրասենյակի առաջ, ապա նամակ փոխանցել ԵԽ գլխավոր քարտուղարին եւ ԵԽԽՎ նախագահին: "Այսօր լրանում է մեր զավակների սպանության երկուսուկես տարին: Երկուսուկես տարի առաջ այս օրը մեր երեխաները ոգեւորված հավաքվել էին ֆրանսիական դեսպանատան առաջ` հույս ունենալով, որ ինչ-որ բան կփոխվի, բայց գնդակահարվեցին: Երկուսուկես տարի է անցել, մինչ օրս որեւէ բան չի բացահայտվել",- "Ա1+"-ին ասել է ակցիայի մասնակից, "Չերյոմուխա 7" տեսակի զենքից զոհված Տիգրան Խաչատրյանի մայրը` Ալլա Հովհաննիսյանը` ավելացնելով, որ ԵԽԽՎ աշնանային նստաշրջանից առաջ եկել են հիշեցնելու եվրոպացիներին իրենց հարցի չլուծված լինելու մասին: