Հայհոյելը «բնական» ու «մարդկային երեւո՞ւյթ» է
![Գագիկ Մելիքյան](/images/2011/02/3-ej-hayhoyel-e1297067566289-400x250.jpg)
- Պարոն Մելիքյան, որպես հանրապետական, ինչպե՞ս եք գնահատում Ձեր կուսակից Ռուբեն Հայրապետյանի պահվածքը:
- Ճիշտ:
- Այսի՞նքն: Ի՞նչն եք ճիշտ գնահատում, որ հայհոյե՞լ է լրագրողին:
- Ի՞նչ հայհոյանքի մասին է խոսքը, ո՞վ է դա ասել:
- Լրագրողին ուղղված հայհոյանքի ձայնագրությունն ուղարկվել է ե՛ւ նախագահական, ե՛ւ գլխավոր դատախազություն:
- Դե, երբ որ գլխավոր դատախազությունը կապացուցի, որ դա Ռուբեն Հայրապետյանն է հայհոյել, այն ժամանակ Ձեր հարցին կպատասխանեմ: Ես գիտեմ, որ ինքը շատ նորմալ անձնավորություն ա, քաղաքակիրթ եւ բոլոր հարցերին ճիշտ ա պատասխանում:
- Իսկ չե՞ք լսել, որ Ռուբեն Հայրապետյանը այլ լրագրողների էլ է հայհոյել:
- Ինքը իմ ընկերն ա, ես իրան շատ լավ ճանաչում եմ եւ երբեւէ իրանից նման հայհոյանքներ չեմ լսել, ինչ որ Դուք ասում եք: Իմ մոտ էլ նա որեւէ մեկին չի հայհոյել:
- Այնուամենայնիվ փաստ է, որ լրագրողին հայհոյել է: Դուք դա ինչպե՞ս եք գնահատում:
- Փաստը դեռ, կարծում եմ, որ պետք ա ապացուցվի: Ես ուղղակի դա լսել եմ, կարդացել եմ, բայց չգիտեմ որքանով ա իրականությանը համապատասխանում:
- Եթե ձայնագրությամբ ապացուցվի, որ ինքն է հայհոյողը, Հանրապետականն ի՞նչ է պատրաստվում անել, ի՞նչ քայլեր կձեռնարկի: ՀՀԿ խորհրդի նիստում քննարկման ենթակա՞ է այդ հարցը:
- Չեմ կարծում, որ էդ հարցը քննարկման ենթակա հարց է: Հետո հայհոյանքն էլ բնական, մարդկային երեւույթ է: Ինչ կա որ: Իսկ հայհոյանքի պատճառը, եթե իրոք նա հայհոյել ա, հարցրե՞լ եք Դուք լրագրողից:
- Այսինքն՝ եթե որեւէ մեկի աղջկան կամ տղային հայհոյեր, դա է՞լ կլիներ նորմալ, բնական:
- Ես չեմ կարծում, որ երբեւէ ինքը թույլ կտա որեւէ մեկի աղջկան կամ տղային հայհոյի առանց պատճառի:
- Լրագրողներ կան, որոնց հայհոյել է:
- Իսկ լրագրողները առիթ չե՞ն տվել:
- Լրագրողներն ընդամենը հարց են տվել: Լավ, իսկ ինչպե՞ս եք գնահատում, որ նման անհավասարակշիռ անձը պաշտոնյա է, պատգամավոր ու Ֆուտբոլի ֆեդերացիայի նախագահ:
- Իսկ ո՞վ է որոշում՝ հավասարակշի՞ռ ա, թե՞ անհավասարակշիռ: Իհարկե՝ շատ հավասարակշիռ անձնավորություն ա: Դա էլ իմ կարծիքն ա:
- Սեռական բնույթի հայհոյանքը քրեական պատիժ է նախատեսում: Չե՞ք կարծում, որ հանրապետական պատգամավորը պետք է զրկվի անձեռնմխելիությունից եւ քրեական պատժի ենթարկվի:
- Իհարկե ոչ:
- Ինչո՞ւ:
- Դա իմ կարծիքն է:
- Իսկ օրենքի առաջ բոլորը չպե՞տք է հավասար լինեն:
- Ես կարծում եմ, որ օրենքի առաջ բոլորը հավասար են: Ուղղակի օրենքը պետք է հետեւի նաեւ, թե ով է կոնկրետ հայհոյել, ով չի հայհոյել, ով է զրպարտում, ով չի զրպարտում: Ով է հայհոյելու առիթ տվել եւ ինչ հայհոյանք է եղել:
- Ուզում եք ասել, որ զրպարտո՞ւմ են Ռուբեն Հայրապետյանին:
- Դա արդեն իրավապահների խնդիրն է, թող իրենք որոշեն՝ եղե՞լ է ընդհանրապես նման հայհոյանք, թե՞ չի եղել:
- Եթե ապացուցվի, Դուք համաձա՞յն եք, որ նա զրկվի անձեռնմխելիությունից ու բանտ նստի, ինչպես նախատեսված է օրենքով:
- Ես չեմ կարծում, որ նման բան կապացուցվի, որովհետեւ չի եղել նման բան:
- Եթե ձայնագրությունը կա, ո՞նց չի եղել:
- Հետո ինչ: Ձայնագրությունը իրավական փաստաթուղթ չի, իրավական հիմք չի: Կարող է ուրիշի ձայնով ինչ-որ մի հատ ձայնագրություն ներկայացրած լինեն: ...Կամ կարող է Մաքսիմ Գալկինի ձայնով են ձայնագրել:
- Իսկ Դուք չե՞ք կարծում, որ Ռուբեն Հայրապետյանին այդպիսին դարձրել է անպատժելիությունը: Որ նա երբեւէ պատասխան չի տվել իր արարքների, հայհոյանքների համար:
- Ես կարծում եմ, որ ոչ միայն Ռուբեն Հայրապետյանը, այլեւ բոլորը իրենց արարքների համար պատասխան տվել են ու տալիս են, ու ով որ չի տվել, նա էլ է տալու:
- Ռուբեն Հայրապետյանն է՞լ է տալու:
- Եթե ինքը նման արարք արել է:
Կարծիքներ