Մենք էլ ենք սխալներ գործում

Նախընտրական քարոզարշավի մեկնարկից առաջ նախ ձեւավորվում են նախագահի թեկնածուի շտաբն ու մարզային գրասենյակները: Սակայն «Ժառանգություն» կուսակցության դեպքում գործընթացները մի քիչ այլ են: Արեւմտամետ ուժն այս անգամ կարծես առաջնորդվելու է ամերիկյան քարոզարշավի ձեւաչափով:



 



Մինչ օրս դեռ չեն կողմնորոշվել շտաբի պետի թեկնածուի հարցում, քարոզարշավն էլ պատրաստվում են անել ոչ տրադիցիոն ձեւով: Թե ինչպես՝ հույժ գաղտնի են պահում: Մարտավարությունից դեռ չեն խոսում, հունվարի 21-ին հայտնի կլինի: Լուրեր տարածվեցին, թե մարշալ Բաղրամյանի զարմիկին են հավիրելու շտաբը ղեկավարելու, ապա կուսակցությունից շտկեցին` ոչ թե ղեկավարելու, այլ կամավորների հետ աշխատանքները համակարգելու: Խոսակցություններ կան, որ Րաֆֆի Հովհաննիսյանի չկողմնորոշվելն ու դրսից ներկայացուցիչ հրավիրելը կուսակցականների դժգոհությունն են հարուցել, որ տարիներ շարունակ ճգնում են, սակայն մի շտաբի պետի պատվի էլ չեն արժանանում: Այս եւ այլ հարցերի շուրջ զրուցեցինք «Ժառանգություն» կուսակցության փոխնախագահ, Րաֆֆի Հովհաննիսյանի լիազոր ներկայացուցիչ Արմեն Մարտիրոսյանի հետ:



 



 - Պարոն Մարտիրոսյան, ի՞նչն է պատճառը, որ դեռ շտաբի ղեկավար չունեք:



 



- Մենք մի քիչ այլ գործառույթով ենք բացել, այսինքն, բաժանել ենք գործառույթները, եւ քանի որ մեր շտաբի պետն ընտրակաշառք բաժանելու խնդիր չունի, հատուկ ռեսուրս օգտագործելու խնդիր չունի, մենք մեր գործառույթները բաժանել ենք ու նորմալ աշխատանքները տանում ենք: Այնպես որ, շտաբի պետ չունենալու խնդիրը մեզ այս պահին բացարձակ չի խանգարում:



 



- Պարոն Մարտիրոսյան, տեղեկություններ կան, որ «Ժառանգությունը» մեծ հաշվով խնդիրներ ունի  ընտրողներին իր շուրջ համախմբելու, բոլոր համայնքներում շտաբներ բացելու առումով: Նույնիսկ կարծիքներ կան, թե կազմակերպչական հարցերը դժվարացել են՝ պայմանավորված համախոհների նվազելով:



 



- Ես գիտեմ, թե ինչի հիման վրա է ասվում: Մենք նախատեսել ենք կուսակցական ակտիվի հետ հանդիպում, ու այդ հանդիպումները հրաշալի են անցել: Ամեն ինչ նորմալ ընթանում է:



 



- Ձեր նախկին դաշնակից «Ազատ դեմոկրատների» պատգամավոր Ալիկ Արզումանյանը հաղորդման ժամանակ ասել է, թե իրենց կողմից Հրանտ Բագրատյանին սատարելը պայմանավորված է «Ժառանգության» գծի փոփոխությամբ, ըստ որի՝  Դուք ավելի շատ դաշնակցականներին եք մոտենում ձեր քաղաքական գծով:



 



- «Ժառանգության» կուսակցական գիծը դեռեւս 2002 թվականից մեկ մմ չի շեղվել: Էնպես որ, եթե ինչ-որ մեկն ինչ-որ գծեր է տեսնում, որեւէ խնդիր չի մեզ համար:  Բայց ժամանակն ապացուցել է, որ գիծը շատ հստակ է եղել:



 



- Այնուամենայնիվ, որեւէ քաղաքական ուժի կողմից աջակցություն ակնկալո՞ւմ եք, թեկուզ ոչ պաշտոնապես:



 



- Ամեն ինչ էլ կա՝ հասարակության աջակցությունը, քաղաքացիական հասարակության ներկայացուցիչները: Այնպես որ, մեզ չի խանգարում, թե ով ինչ է ասում, ոչ էլ կաշկանդում է մեզ: Փոխարենը իշխանության դեմ աշխատեն, «Ժառանգության» դեմ են դուրս եկել, տվյալ դեպքում՝ Րաֆֆի Հովհաննիսյանի դեմ:



 



- Ձեր կուսակցությունում ասում են, որ ոչ ավանդական քարոզարշավ եք անում: Դա ի՞նչ է նշանակում եւ ինչո՞վ է ազդելու ձեր օգտին քվեարկություն ապահովելու առումով:



 



- Քվեների առումով ես այն կարծիքին եմ, որ աշխատանքն է, որը գնահատվում է քաղաքացիների կողմից, եւ Րաֆֆի Հովհաննիսյանն այս տարիների ընթացքում ապացուցել է, որ բովանդակային աշխատանքներ իրականացնող է: Ինչ վերաբերում է քարոզարշավի ձեւին, դա մարտավարական խնդիր է, իսկ այն չեն բացահայտում:



 



 - Անկախ Ձեր հավաստիացումից, թե «Ժառանգությունը» չի շեղվել իր գծից, սակայն, դրանով հանդերձ, էականորեն նվազել են Ձեր կուսակցության հանդեպ վստահությունը, ոգեւորվածությունը:



 



- Այն ներկայացուցիչները, ում հասարակությունը տեսել ու ընդունել է, նրանց նկատմամբ վստահությունը չի նվազել այս ժամանակահատվածում:



 



 - Այդ նույն ներկայացուցիչները, նույն ղեկավարության  որոշմամբ, փոխարինվեցին այլ ներկայացուցիչներով: Սա էլ կարող էր ժողովրդի վերաբերմունքի վրա ազդել: Առավել եւս, որ փոխարինվածների հետ միասնությունը կարճ ժամանակ անց ձախողվեց:



 



- Մենք էլ ենք սխալվում, ո՞վ ասեց, որ մենք չենք սխալվում կամ սխալներ երբեւիցե չենք ունեցել, բայց դուք պիտի հաշվի առնեք, որ «Ժառանգությունը» հերթական անգամ նորից գնաց կոնսոլիդացիայի ճանապարհով: Սակայն երբեւիցե այնպիսի քայլ չի եղել, որ քաղաքացու շահը երկրորդական լինի: