Այդ զանգվածը կարճ ժամանակում կհալվի, դրան կնպաստենք նաեւ մենք՝ որոշակի բարեփոխությունների միջոցով

Հարցազրույց ՀՀԿ փոխնախագահ Գալուստ Սահակյանի հետ.



 



-Պարոն Սահակյան, իշխանությունը մտավախություններ չունի՞, որ համաժողովրդական նոր շարժում կարող է ծնվել:



 



- Յուրաքանչյուրը կարող է հանիրավի մեղադրել՝ շատ ընտրախախտումներ եւ այլն, եւ այլն: Նույնիսկ չակնածել դիտորդների ասածները, միջազգային հանրության տարբեր ծայրերի գնահատականները, ԵԱՀԿ-ի, այս ամենի հետ մարդիկ չեն ուզում հաշվի նստել, որովհետեւ սովորական սցենար է: Մեզ մոտ ընտրությունները երբ լինում են, նույնիսկ տեղի չունեցած՝ արդեն հայտարարում են, թե, միեւնույն է, կեղծ է լինելու, եւ դա դրոշակ բարձրացրած կրքերի հասունացման շրջանում՝ նորից ներկայացնում են: Բայց որեւէ լուրջ փաստարկ մինչ օրս չի արձանագրվել, եւ չկա որեւէ մեկի կողմից: Իսկ այս ընտրությունների հիմնական արդյունավետությունը, հաղթանակը դա նա է, որ նորանկախ Հայաստանում առաջին անգամ եւ ժողովուրդը, եւ իշխանությունները, եւ քաղաքական ուժերը կարողացան հասկանալ, որ ընտրություններն այնպիսի մոդել է, որ յուրաքանչյուրն իր կամքի արտահայտությունը պետք է լուծի ընտրություններով: Դրա նախաձեռնողը մենք ենք եղել, հիմնականում պայքարը մենք ենք տարել, եւ կարծում եմ, որ հաղթանակ կոչվածը դա է, ու բոլորը հաղթեցին:



 



- Բայց իշխանությունը թույլ չտվեց, որ մարդկանց իրական կամքը, որը համենայնդեպս իշխանության թեկնածուի օգտին չէր, արձանագրվի: Դուք ժխտո՞ւմ եք, որ ընտրախախտումներ են եղել:



 



- Դրանք էական բաներ չեն, դու ժողովրդին չես կարող ասել՝ գիտե՞ս, հերթով եկեք, որ կուտակումներ չլինեն, իհարկե, կան տեղեր, որտեղ կուտակումներ են եղել: Միգուցե դրսում ցուրտ է եղել, 15-ի փոխարեն 16 մարդ է ներս մտել: Դրանք նշանակալի բան չեն: Նույնիսկ ցանկացած մարդ, որն իր ծնունդն է տոնում, հաջորդ օրը ահագին թերություններ է տեսնում, բայց դա չի նշանակում, որ ընտրություններն արդյունավետ չեն անցել:



 



- Ասում են՝ բավական մտահոգված եք, որ Րաֆֆի Հովհաննիսյանի նախօրեի ասուլիսին անգամ Ազատության հրապարակում արդեն մի քանի հազար մարդ էր հավաքվել…



 



- Մտահոգությունը կապված է այն զանգվածի հետ, որն իրոք խնդիրներ ունի, եւ այդ խնդիրները զուտ արտահայտվում է ապրելակերպով, կենցաղային խնդիրներով: Այդ խնդիրների մասին մենք մինչեւ ընտրություններն էլ ենք խոսել, եւ կարծում եմ՝ այն ծրագրերը, որոնք նախապատրաստել ենք իրագործելու, կապված են  նրա հետ, որպեսզի մարդիկ կարողանան ավելի ապահով ապրեն, ավելի համարձակ, ավելի համերաշխ: Նկատելի էր, որ երբեք չասացինք, թե 100 տոկոսով աշխատավարձ կամ թոշակ ենք բարձրացնելու, ոնց որ ոմանք էին ասում: Ընդամենը մենք ասում ենք, որ եկել է ժամանակները, որ մարդն իր հայրենիքում պետք է ապահով զգա: Իսկ այդ ապահով զգալու համար այն զանգվածի համար, որը խնդիրներ ունի, հենց դրանց վերացումն է:



 



- Բայց կես միլիոնից ավելի մարդ ցույց տվեց, որ չի հավատում իշխանության «ապահով Հայաստանի» խոստումներին:



 



- Նաեւ այդ մշակույթը պիտի բերենք, որ մեծամասնության կարծիքի հետ պետք է հաշվի նստեն բոլորը: Ձեր ասած 500 հազար մարդը դա Րաֆֆի Հովհաննիսյանի զանգվածը չէր, դա ընդդիմության զանգվածն էր: Դրա համար խորհուրդ կտայի հորդորեիք Րաֆֆի Հովհաննիսյանին, որ շնորհակալություն հայտներ ՀՅԴ-ից, ՀԱԿ-ից ամբողջությամբ եւ մասամբ նաեւ ԲՀԿ-ից:



 



- Բայց բոլորից միայն Րաֆֆի Հովհաննիսյանը խիզախություն ցուցաբերեց եւ մոբիլիզացրեց ժողովրդի ձայները, որն այսօր դժգոհ է իշխանությունից եւ այժմ այլեւս իշխանափոխություն է պահանջում:



 



- Իհարկե, ժողովրդի փոքրամասնությունը դժգոհ է, որովհետեւ իրոք խնդիրներ կան, ՀՀԿ-ն ունի իր հիմնական զանգվածը, որը կարողանում է տիրապետելի դարձնել ընդհանրապես հասարակական պրոցեսները: Եթե այլընտրանքային համարեին էպոսագետին, էպոսագետն այդքան ձայն կստանար: Այսինքն՝ հաղթում են նրանք, ովքեր հիմնական զանգվածների են տիրապետում, եւ հաղթանակը փորձել ձեւակերպել իրենց ոգուն կամ իրենց կեցվածքին համապատասխան, կարծում եմ՝ անարդյունավետ գործ են կատարում:



 



- Հասկանալի է, որ դուք իշխանությունը չեք պատրաստվում հանձնել, այդ դեպքում ինչպե՞ս եք հաշվի նստելու հասարակության դժգոհ մասին մոբիլիզացնող թեկնածուի հետ:



 



- Այսինքն՝ ստեղծել մի միջավայր, ոնց որ ընտրապայքարում ստեղծեցինք, որ մարդն ազատ կարողանա իրացվել հասարակության մեջ եւ իր թիկունքում ունենա պետության ձեռքը, որպեսզի անորոշության մեջ չապրի, որպեսզի հավատա իր ապագային, որի ջատագովները, կարծում եմ, այսօր գոնե մենք էինք եւ ստեղծեցինք բոլոր պայմանները, իսկ այդ ստեղծելը մի օրվա մեջ չեղավ, դա տարիների պատմություն ունի, եւ եկել ենք, մի իրավիճակի ենք հասել, երբ հնարավորությունները շատացել են եւ հասարակության, եւ քաղաքական ուժերի, եւ հասարակական կազմակերպությունների: Այնպես որ, այն ելքը, որ մենք մտածել ենք, արդեն հաջողվել է, մնում է կարողանանք մեր մեջ ուժ գտնել, ավելի վճռական լինել, որպեսզի խնդիրներն ավելի հաղթահարելի լինեն:



 



- Բայց ինչո՞ւ եք կարծում, որ նույն Րաֆֆի Հովհաննիսյանը կամ հասարակությունը կհամաձայնի օգտվել ձեր ընձեռած միջավայրից, որովհետեւ, ինչպես Դուք ասացիք, մեկ օր չէ, որ իշխանությունը նման խոստումներ է տալիս:



 



- Նորից պիտի ասեմ, որ այդ ձայները Րաֆֆի Հովհաննիսյանի ձայները չեն, բոլոր քաղաքական ուժերի ձայներն են, որոնք ժամանակին չմիավորվեցին, եւ ես չեմ կարծում, որ նման փորձերը կարողացել են հաջողություններ ունենալ: Դա հալվող զանգված է, շատ կարճ ժամանակահատվածում կհալվի, իսկ այդ հալվելուն կնպաստենք նաեւ մենք՝ որոշակի բարեփոխությունների միջոցով:



 



- Այսինքն, դուք որոշակի պայմանավորվածություննե՞ր ունեք եւ մտավախություն չունե՞ք, որ Րաֆֆի Հովհաննիսյանին կարող են միանալ Ձեր հիշատակած ուժերը՝ ԲՀԿ-ն, ՀՅԴ-ն, ՀԱԿ-ը:



 



- Բոլոր ուժերը՝ ոչ, որովհետեւ գաղափարական տարաձայնությունները նախ միանշանակ են: Բայցեւ շատ հաճելի կլիներ, որ ընտրություններից առաջ միանային, թերեւս մեր նպատակադրմանն ավելի կհասնեինք, ավելի արդյունավետ ընտրություններ կլինեին:



 



- Հիմա կոալիցիա՞ եք կազմելու այդ ուժերի հետ:



 



- Եթե մեր ծրագրին համամիտ ուժեր կլինեն, մենք միշտ էլ քաղաքական՝ չասեմ կոալիցիա, բայց համաձայնություններին պատրաստ ենք:



 



- Այդ թվում Րաֆֆի Հովհաննիսյանի՞ հետ:



 



- Եթե ինքը ստանձնի մեր ծրագիրն իրագործել, ինչո՞ւ չէ, մենք թշնամիներ չենք որոնում:



 



- Իսկ գո՞հ եք ձեր թիմի աշխատանքից, շատ տեղերում ձախողեցիք:



 



- Որտեղ ժողովուրդն ավելի մեծ խնդիրներ է ունեցել, բնականաբար, այնտեղ ավելի շատ պետք է ընդդիմադիր թեկնածուին ձայն տային: Գոհ լինելու կամ չլինելու խնդիր չկա, որովհետեւ այդ դաշտը մենք ստեղծեցինք, որպեսզի մարդիկ չվախենան, որպեսզի մարդիկ կարողանան ավելի համարձակ լինեն, որպեսզի մարդիկ կարողանան քվեարկել իրենց խնդիրներին համապատասխան: Իսկ հիմնականում մենք գոհ ենք ընդհանուր արդյունքներից ոչ միայն նրա համար, որ մեր թեկնածուն բավարար ձայներ է հավաքել, այլեւ նրանից, որ, վերջին հաշվով, կարողացանք ստեղծել մի միջավայր, որ կանխատեսում էինք: Հաջորդ ընտրություններում ավելի լավն է լինելու եւ ավելի արդյունավետ:



 



- Հենց այդքա՞ն ձայն էիք նախատեսել «խփել» Սերժ Սարգսյանի օգտին:



 



- Ես կարծում եմ, որ նաեւ այդ առումով բավականին հաջողված… Իմիջիայլոց ասեմ՝ միջազգային դիտորդներն անընդհատ ակնարկում են, որ չեղան բանավեճեր, դեբատներ: Հենց մենք չգնացինք այդ ճանապարհով, որ երբեք չբանավիճեցինք, երբեք չվիճեցինք, եւ եթե գնայինք նույն այդ տիպի մոդելներով, կարծում եմ՝ ձայներն ավելին կլիներ:



 



- Իսկ ո՞վ էր Րաֆֆի Հովհաննիսյանին ծաղրում, թե շրթունքը ճաքում է Ղարաբաղ ասելիս…



 



- Դա այն ժամանակ էր, երբ արդեն խոսքն ու տիրապետումը մի քիչ սանձարձակ էր դառնում, եւ հարկավոր էր ընդամենը սթափեցնել: Իսկ մենք նաեւ այդ խնդիրն ունեինք, որպեսզի սթափեցնեինք, որ խաղի կանոնները չխախտվեր:



 



- Պարոն Սահակյան, Հայաստանի մի շարք քաղաքներում Րաֆֆի Հովհաննիսյանի օգտին է հաղթանակը գրանցվել, համենայնդեպս այնտեղ, որտեղ նա պինդ վստահված անձինք է ունեցել… Մինչդեռ ԿԸՀ ընդհանուր տվյալները փաստեցին Սերժ Սարգսյանի խոշոր հաղթանակը: Ձեզ համար տարօրինակ չէ՞ փաստը:



 



- Այսինքն՝ մենք ունենք մի հատ էլ գաղտնի կազմակերպություն ԿԸՀ-ից բացի, որն ավելի ստո՞ւյգ տվյալներ ունի, եթե այդպես է, գոնե էական բողոքներ կլիներ, եւ փաստարկներ կբերվեր: Րաֆֆի Հովհաննիսյանի ձեները լրիվ համապատասխանում են, դեռ մի բան էլ ավելին:



 



- Իսկ, Ձեր կարծիքով, ԲՀԿ-ն ինչպե՞ս դրսեւորեց իրեն ընտրությունների ժամանակ:



 



- Տեղեր կային, որ ավելի խելամիտ են վերաբերվել, բայց ԲՀԿ-ի ձայները համաչափորեն տարբեր ուղղություններով են գնացել: