Ինչի մասին էր մտածում Սերժ Սարգսյանի շտաբի պետը

Այսօր Քաղաքագետների միության նախագահ Հմայակ Հովհաննիսյանն ու հանրապետական պատգամավոր Մկրտիչ Մինասյանը զրուցեցին  հետընտրական իրադարձությունների մասին:



 



Ըստ պատգամավորի՝ ընտրությունների գնահատականը տվել է ժողովուրդը, նաեւ  արտասահմանյան ու տեղական դիտորդները: Մեր համապետական ընտրությունները համարվեց ժողովրդավարական, միակ բացթողումը մրցակցության պակասն էր, որի պատճառը որոշ քաղաքական ուժերի բացակայությունն էր: Մկրտիչ Մինասյանի կարծիքով՝   ձայները, որ ստացել է Րաֆֆի Հովհաննիսյանը,այն ընտրազանգվածի ձայներն են, ով դեմ է իշխանությանը:



 



Հմայակ Հովհաննիսյանի կարծիքով, Սերժ Սարգսյանի   վարկանիշը ընտրարշավի սկզբին ավելի բարձր էր, քան ընտրարշավի վերջում, վարկանիշն անկում ապրեց շտաբի անհաջող գործունեության պատճառով: Ըստ նրա՝ շտաբի պետը ավելի շատ մտածում էր վարչապետ դառնալու մասին, քան նախագահի հեղինակության: Ընտրություններից մի քանի ամիս առաջ հայտարարություններ էին անում, որ մյուս բոլոր ուժերը  ընտրություններին մասնակցում  են երկրորդ տեղի համար: Նրա խոսքով՝ ՀՀԿ-ն ի սկզբանե սխալ հաշվարկ է արել:



 



Պատգամավորի համոզմամբ՝ եթե  աշխարն ու բոլորն են ընդունում ընտրությունների արդյունքները, որոշ մարդկանց  հիվանդագին ամբիցիաների պատճառով պետք չէ ստեղծել լարված իրավիճակ: Եթե ընտրախախտումներ էլ եղել են, այնքան չնչին, որ չէին կարող ազդել ընտրությունների արդյունքների վրա: Նրա կարծիքով՝ եթե  իդեալական էլ լինեն ընտրությունները, միեւնույն է՝ երկրորդ տեղը միշտ ընդվզելու է:



 



Հմայակ Հովհաննիսյանը նկատեց, որ ստեղծվել է աննախադեպ իրավիճակ, քանի որ 2-րդ եւ 3-րդ տեղ զբաղեցրած թեկնածուների ձայների տարբերությունն ահռելի է: Հիմա իշխանությունը չունի այն ռեսուրսը, որ երրորդ ուժին կարողանա միացնել իրեն ու շտկի  դրությունը: Այս առումով շատ դժվար կլինի իշխանությունների համար կայունացնել ստեղծված իրավիճակը: Անդրադառնալով Րաֆֆի Հովհաննիսյանին, քաղաքագետը նշեց, որ չի կարծում, որ նա կնահանջի:



 



Մանե ԶՈՐՅԱՆ