Կդիմե՞ն սահմանադրական դատարան

Երեկ ԱԺ չորս խմբակցությունները կուտակային կենսաթոշակի արտահերթ քննարկումից հետո խիստ մտահոգ հավաքվել էին Արմեն Ռուստամյանի սենյակում ու դրսում շարունակվող պիկետի ֆոնին փիքր էին անում իրենց հետագա քայլերի շուրջ:

Մի տեսակ մտահոգ եք՝ ասացինք նախաձեռնող խմբի անդամ Արծվիկ Մինասյանին: Մտածում էիք, թե այսօր կքվեարկվե՞ր նախագիծը: «Անկեղծ ասած՝ այո,  չնայած մտածում ենք նաեւ, որ մասնակի զիջումներ գուցե թե լինեն՝ այլ օրենքների տեսքով, որովհետեւ օրենքի կատարումն ապահովող ինֆրաստրուկտուրաները դեռ պատրաստ չեն»: Իսկ եթե չլինե՞ն: «Եթե՝ ոչ, չորս խմբակցություններով դիմելու ենք Սահմանադրական դատարան՝ հարցմամբ, թե որքանով է  կուտակային կենսաթոշակայինի մասին ԱԺ ընդունած օրենքը համապատասխանում ՀՀ սահմանադրության նորմերին»:

Հիշեցնենք, որ Սահմանադրական դատարան դիմելու համար անհրաժեշտ է պատգամավորների մեկ հինգերորդի, այն է՝ 27 ստորագրություն, ինչը փոքր-ինչ դժվար կարող է հավաքվել Սահմանադրական դատարան դիմելու դեպքում: Մանավանդ որ չորս խմբակցությունները պետք է ՍԴ դիմեն մինչեւ հունվարի մեկը, որից հետո օրենքն արդեն կմտնի ուժի մեջ: