Իշխանությունները խելամիտ քայլերով չեզոքացնում են սոցիալական բունտի վտանգը

Հանրապետական խմբակցության պատգամավոր Համլետ Հարությունյանն ուրախ է այն փաստից, որ ՀՀԿ-ն առաջիկայում հեռուստաընկերություն է ունենալու: «Ինչո՞ւ բոլորն ունեն, թող մենք էլ ունենանք»,- ասում է նա ու թվարկում դաշտում գործող հեռուստաընկերություններն ու դրանց սեփականատերերին, վերջում էլ եզրակացնում. «Տեսնո՞ւմ եք, որ մամուլն ավելի շատ ոչ իշխանությանն է պատկանում»: Խոսակցությունների համաձայն, ՀՀԿ-ին սպասարկող նոր հեռուստաընկերությունը կազմավորվելու է գործող հեռուստաընկերություններից մեկի` ամենայն հավանականությամբ, «Արմնյուզի» հիմքի վրա, որը հունվարից այլեւս չի գործելու:

- Բայց ի՞նչ վատ ա, որ մենք էլ ունենանք մերը, բոլորն ունեն, մեզ չի՞ կարելի ունենալ:

- Գրեթե բոլորն էլ ձերն են, էլ նորն ի՞նչ եք անում:

- Իմ մոնիթորինգը մամուլի դաշտում հօգուտ ընդդիմության է ցույց տալիս: Բոլորդ ասում եք «Հայլուրը», բայց «Հայլուրն» ավելի շատ ցույց է տալիս ընդդիմադիր գործիչների ելույթները, քան մերը, իսկ եթե նախագահի այցերն է ցույց տալիս, դա աշխարհում ընդունված կարգ է, նույնն անում են նաեւ մյուս հեռուստաընկերությունները:

- Կարո՞ղ է նժդեհական գաղափարախոսության պրոպագանդայի պակաս եք զգում ու դրանից դրդված եք ուզում սեփական հեռուստատեսություն ունենալ, թե՞ ընդամենը մյուս քաղաքական ուժերից հետ չընկնելու համար:

- Բայց ի՞նչ վատ ա, որ նժդեհական գաղափարախոսությունը քարոզվի, ես կարծում եմ, որ դա ամենահայրենասիրական գաղափարախոսությունն է, եւ կարծում եմ, որ բոլոր հեռուստաեթերները պետք է այդ գաղափարախոսությունը պրոպագանդեն:

- Օրինակ, վերջին օրերի բռնություններն է՞լ են նժդեհականության գաղափարախոսությունը քարոզում, բա Նժդեհի հետեւորդներիդ սազո՞ւմ էր նման կերպ հարցերը լուծել՝ մարդկանց վախեցնելով, ծեծով, սպառնալիքով:

- Չեմ կարծում, չեմ կարծում: Ես կարծում եմ, որ դրանք տխուր երեւույթներ են եւ պետք է էլ չլինեն: Կարծում եմ, որ հետագայում էլ չեն կրկնվի: Ես դատապարտում եմ այդ բռնարարքները:

- Որոնք թույլ են տվել իշխանությունները, չէ՞, այլապես արագ կբացահայտվեին այդ դեպքերը:

- Ես չեմ կարծում, որ դա իշխանություններին ձեռնտու է, կարող է ամեն մեկն ինչ-որ մի քայլ անի, բայց կոնկրետ պաշտոնական իշխանություններին, իմ կարծիքով, ձեռնտու քայլեր չէին: Դե, բացահայտել են, էլի: Երանոսյանինը հայտնի է, Արամ Մանուկյանինը հայտնի է, մնում է Սուրեն Սարգսյանի եւ Հրազդանի դեպքը:

- Երանոսյանը հետո պնդել է, որ միջադեպ չի եղել:

- Դե դա արդեն իրեն հարցրեք:

- Պարոն Հարությունյան, հնարավո՞ր է իշխանությունները հասկացան, որ բռնարարքները եւ ընդհանրապես սոցիալական ներկա ծանր իրավիճակը մոտ ապագայում կարող են սոցիալական բունտ բարձրացնել, ու հիմա արվող քայլերը ժամանակավոր են ընդամենը:

- Իշխանության բոլոր խելամիտ քայլերը ես ողջունում եմ, իսկ եթե խելամիտ քայլերը չլինեն, ամեն ինչ էլ հնարավոր է՝ եւ սոցիալական բունտ, եւ գործադուլներ եւ այլն, եւ այլն: Իսկ եթե իշխանությունները խելամիտ քայլերով չեզոքացնում են սոցիալական բունտի վտանգը, ես ողջունում եմ:

- Պարոն Հարությունյան, օրինակ, ֆինանսական շուկայում ընդամենը օրեր առաջ տիրող քաոսն իրականում, ըստ Ձեզ, ինչպե՞ս հարթվեց, ԱԺ դռնփակ նիստից հետո կարծես կախարդական փայտիկ հայտնվեց, եւ դրամը վերագտավ իր նախկին դիրքերը, ու որոշակիորեն կանխվեց գնաճը:

- Տեսնո՞ւմ եք, որ ԱԺ-ն լավ բաներ էլ է կարողանում անել: Ես անձամբ ֆինանսական ոլորտին անծանոթ մարդ եմ եւ չգիտեմ, բայց որ խորը եւ համակողմանի քննարկում է եղել, ես ներկա եմ եղել: Նու, երեւի ԿԲ դոլարային ինտերվենցիայի հիմքով կայունացավ, աշխարհում դա ընդունված նորմ է: Եթե դոլարը շուկայում հավասար քանակությամբ է լինում, բնականաբար, ազգային արժույթը կայունանում է: