Արթուր Աբրահամը խոսել է Բունդեսթագի որոշման մասին

Աշխարհի նախկին չեմպիոն Արթուր Աբրահամը խոսել է Գերմանիայի խորհրդարանի՝ Բունդեսթագի կողմից օրեր առաջ Հայոց ցեղասպանությունը դատապարտող բանաձեւի ընդունման մասին:

Աբրահամի խոսքը մեջբերում է բռնցքամարտիկի մամուլի քարտուղարը, որում ասվում է.

«Ես` բռնցքամարտիկ Արթուր Աբրահամը, հպարտ եմ, որ հունիսի 2-ին Գերմանիայի Բունդեսթագն ընդունեց Հայոց ցեղասպանությունը դատապարտող բանաձեւ:

Մենք` Գերմանիայում ապրող հայերս, այստեղ գործող բազմաթիվ հայկական կառույցներ, կազմակերպություններ, անհատներ տարիներ ի վեր ջանք չենք խնայել այս համահայկական նշանակության հարցին ծառայելու համար: Այդպես էլ պետք է լինի: Մենք ամբողջ աշխարհում պետք է շարունակենք Հայոց ցեղասպանության ճանաչմանը, դատապարտմանը եւ հատուցմանը միտված մեր պայքարը՝ այդ նպատակին ծառայեցնելով ցանկացած ամբիոն, իմ դեպքում` նաև ռինգը:

Հայոց ցեղասպանության ճանաչումն ու դատապարտումը կանխելու է ցեղասպանական նոր ոճրագործություններ և պարարտ հող է նախապատրաստելու ազգերի մերձեցման համար:

Միշտ և ամենուր հպարտանում եմ, որ հայ եմ, այսօր կրկնակի հպարտ եմ, քանի որ պետությունը, որտեղ բնակվում եմ` Գերմանիան, ընդունել է Հայոց ցեղասպանությունը դատապարտող բանաձեւ»: