Ովքեր պայքարում են օկուպացիոն ռեժիմի դեմ հետապնդվում են. Վերաքննիչի բակն այսօր մարդաշատ էր. (տեսանյութ, լուսանկարներ)

Վերաքննիչ քրեական դատարանի բակն այսօր մարդաշատ էր: Այստեղ այսօր քննվելու էր «Ժառանգություն» կուսակցության փոխնախագահ Արմենի Մարտիրոսյանի կալանքի որոշումը գրավով փոխելու հարցը: Հավաքվածներում էին նաև Ժառանգության առաջնորդ Րաֆֆիի Հովհաննիսյանը, ԱԺ պատգամավոր Զարուհի Փոստանջյանը:

Րաֆֆի Հովհաննիսյանի խոսքերով՝ Արմեն Մարտիրոսյանը շարքային քաղաքացի է, «Ժառանգություն» կուսակցության ներկայացուցիչ, ով իր սահմանադրական իրավունքները իրականացնելիս բերման ենթարկվեց, այնուհետև բանտարկվեց, իրեն և իր նմաններին սպասվում է 4-10 տարի բանտարկություն և դա ինչի՞ համար, որ մասնակցեց խաղաղ բնույթի սահմանադրական ցույցի․ «Այստեղ դրված է մեր պետության ողջ որակը և այս գործող իշխանությունների իրական երեսը։ Մենք ակնկալում ենք, որ Արմենը, Դավիթը, Հովսեփը և մյուս քաղբանտարկյալները ազատ կարձակվեն, որովհետև այս ճամփով Հայաստանը երբևէ չի դառնալու իրավական երկիր»։

Զարուհի Փոստանջյանն էլ նշեց, որ իրենց գործընկերներից երկուսը՝ Դավիթ Սանասարյանը և Արմեն Մարտիրոսյանն ավագանու անդամ են և ավագանու անդամն այսօր ոչինչ փաստորեն չի արել, ընդհակառակը՝ պաշտպանել է ՀՀ քաղաքացիներին ապօրինի ոտնձգություններից և այսօր գտնվում են բանտախցում. «Այս իրավիճակում խոսել ընտրություններին մասնակցության մասին, խոսել ավագանի ունենալու մասին, դառնում է անիմաստ, որովհետև եթե մենք ուզում ենք, որ մեր երկրում տեղի ունենան իրապես ժողովրդավարական գործընթացներ, ապա նման երևույթներ չպետք է լինեն, մինչդեռ կարող ենք ասել, որ 25 տարի շարունակ այս երևույթները մեզ ուղեկցել են, բայց այսօր առավել ևս։ Բոլոր նրանք, ովքեր պայքարում են օկուպացիոն ռեժիմի դեմ, փաստորեն, հետապնդվում են»:

Մոտ 40 րոպե սպասելուց հետո վերաքննիչ դատարանը հրապարակեց որոշումը, որի համաձայն Արմեն Մարտիրոսյանը ազատ արձակվեց 1 միլիոն գրավի դիմաց:

Մանրամասները տեսանյութում: