Արևմուտքի համար ցավոտ է լինելու. ի՞նչ է ծրագրում Ռուսաստանը
![Արևմուտքի համար ցավոտ է լինելու. ի՞նչ է ծրագրում Ռուսաստանը](https://hraparak.am/uploads/images/2024/06/image_750x_667cf79273e9f.jpg)
Մոսկվան, ի թիվս այլ միջոցների, դիտարկում է արևմտյան երկրների հետ դիվանագիտական հարաբերությունների մակարդակի իջեցման հնարավորությունը՝ ի պատասխան հակառուսական գործողությունների։ Այս մասին հայտարարել է ՌԴ փոխարտգործնախարար Սերգեյ Ռյաբկովը։
«Այժմ հնարավո՞ր է լուծում, որը ներառում է դիվանագիտական հարաբերությունների մակարդակի իջեցում։ Կարող եմ ասել, որ սա քննարկման առարկա է և այս ամենն ուսումնասիրվում է։ Նման որոշումները կայացվում են ամենաբարձր մակարդակով»,- ասել է նա «Известия»-ին տված հարցազրույցում՝ մեկնաբանելով Արևմուտքի հետևողական հակառուսական քաղաքականությանը Մոսկվայի արձագանքի հնարավոր սցենարները։
Նրա խոսքով, Արևմուտքը հակառուսական միջոցներով մոտենում է անդառնալիության կետին, և Մոսկվայի արձագանքը նրա համար ցավոտ կլինի։
«Բայց հակառակորդները պետք է իմանան, որ քայլ առ քայլ իրենք իրենց մոտեցնում են անդառնալիության կետին։ Ի՞նչ առումով է անդառնալի այդ կետը: Թող իրենք մտածեն ու որոշեն, բայց արտաքին քաղաքական այս ամենաթողությունն ու իրենց անպատժելիությամբ տարված լինելն, ի վերջո, կհանգեցնի մեր կողմից այնպիսի արձագանքի, որը շատ ավելի ցավոտ կլինի, քան այսօր թվում է»,- նշել է փոխնախարարը։
Կարծիքներ