Սորոսի հիմնադրամից չի ֆինանսավորվել, բայց ակտիվորեն պաշտպանում է

ԱԺ «Իմ քայլը» խմբակցության պատգամավոր Մարիա Կարապետյանին, ով համարվում է իշխանության սորոսական թեւի ներկայացուցիչ, հարցրինք, թե ինչ ակնկալիքներ ունի ԱՄՆ նախագահի ընտրություններից, արդյոք Ջո Բայդենի ընտրվելը կարո՞ղ է օգտակար լինել հայերի ու հատկապես արցախյան հարցի կարգավորման հարցում։

«Ես կարծում եմ՝ Միացյալ Նահանգներից, ինչպես նաեւ մյուս համանախագահ երկրներից մեր ակնկալիքն է՝ որպես ԵԱՀԿ Մինսկի խմբի համանախագահ երկրների, իրենց միջնորդական առաքելությունն իրագործեն, դա նրանց առաջնային մանդատն է՝ հակամարտության հետ կապված։ Եվ քանի որ Լեռնային Ղարաբաղի հակամարտությունն այս փուլում նաեւ ոչ թե տարածաշրջանային, այլ շատ ավելի գլոբալ մարտահրավերների եւ նման ռիսկերի հնարավորություն է իր մեջ պարունակում, նաեւ դիտարկեն իրավիճակը որպես միջազգային հանրության անդամ եւ մեր սեփական շահերի տեսանկյունից»,- ասաց տիկին Կարապետյանը։

- Դուք Արեւմուտքի եւ ԱՄՆ-ի քաղաքական ղեկավարության արձագանքներից գո՞հ եք, Ձեր ակնկալիքներն արդարացվա՞ծ են` թե՛ միջազգային կառույցների մասով, թե՛ ԱՄՆ-ի մասով՝ մասնավորապես։

- Կարող են նյուանսներ լինել տարբեր քաղաքական ուժերի մոտեցումներում, բայց կրկին պետք է ասեմ, որ յուրաքանչյուր երկիր պետք է սա դիտարկի նաեւ որպես տարածաշրջանային եւ գլոբալ մարտահրավեր եւ սեփական երկրի ու ժողովրդի շահերի դիտանկյունից նույնպես գնահատի իրավիճակը եւ զարգացող ռիսկերը։ Իսկ ընդհանուր արձագանքների իմաստով, իհարկե, կան դերակատարներ, որ ավելի ակտիվորեն եւ հստակ դիրքորոշումներ են արտահայտում, եւ դա գնահատելի է։ Կան դերակատարներ, որոնք դեռեւս պահպանում են հավասար հեռավորություն՝ կողմերին կոչ անելով, խոսքը միջազգային կառույցների մասին է, ինչն առնվազն ընդունելի չէ, որովհետեւ առնվազն ահաբեկիչների ներկայությունն այս պատերազմում պետք է որ հստակ լինի՝ չի կարող լինել բալանսավորված կամ չեզոք դիրքորոշում։

- Այս օրերին հասարակության մեջ շատ է քննարկվում պրոռուսական կամ պրոարեւմտյան տրամադրությունների հարցը, ասում են՝ այս տարիներին փչացրին հայ-ռուսական հարաբերությունները, հիմնականում հենց արեւմտյան ֆինանսավորմամբ կազմակերպությունների միջոցով։ Ի՞նչ կասեք սրա մասին։

- Ես կարծում եմ, որ մեր հանրության հավաքական խոհեմությունն արձանագրում է, որ մենք նախեւառաջ պետք է հույսներս դնենք մեզ վրա, հենվենք մեզ վրա, հետեւենք մեր շահերին, եւ այդ հավաքական խոհեմությունն այնքան առողջ է, որ նաեւ գիտակցում է, որ պետք է այս պահին դրսեւորենք մաքսիմալ համախմբվածություն, եւ դա Ձեր նշած դիսկուսիաների մեջ չի մտնում։

- Մենք հայ-ռուսական հարաբերությունների հետ կապված խնդիրներ ունեցե՞լ ենք այս ընթացքում։

- Ոչ։

- Արեւմո՞ւտքն է այս պահին մեզ ավելի ռեալ աջակցություն ցուցաբերում, թե՞ Ռուսաստանը, եւ հիմա շատ են հիշեցնում, որ ձեր թիմակիցներից շատերը, որոնք ժամանակին հակառուսական տրամադրություններ էին սերմանում՝ տարբեր գրառումներ կատարելով, օրինակ՝ Արարատ Միրզոյանը, Ալեն Սիմոնյանը, այսօր արդեն Ռուսաստանից են աջակցություն ակնկալում, Պուտինին են շնորհակալություն հայտնում։

- Ձեր հնչեցրած մտքերի հեղինակները փորձում են իմ նախորդ պնդման տրամաբանությունից դուրս գալ, այսինքն՝ համախմբվածության, մեր շահերին հետեւելու, նաեւ մյուս երկրներին, ըստ իրենց առանձին դերակատարության, ուղերձներ հղելու։ Ռուսաստանն ունի երկակի դեր այս հակամարտության համատեքստում, առաջինը՝ այն համանախագահ երկիր է, մյուս կողմից՝ Ռուսաստանը Հայաստանի ռազմավարական գործընկերն է, եւ մենք ունենք կոնկրետ պայմանագրեր եւ պարտավորվածություններ, որը նույնպես Ռուսաստանը կատարում է։ Այսքանը։ Մնացած ամեն ինչը շահարկումներ են, որոնց դաշտ, առավել եւս՝ այս պահին, ես չեմ պատրաստվում մտնել։

- Ի դեպ, մամուլում գրվեց նաեւ Ձեր մասին, որ Դուք եւ կրթական չափորոշիչների հեղինակ Լիլիթ Մկրտչյանը թուրքական ծրագրերի եք մասնակցել՝ գրանտային միջոցներով (Թուրքիայի «Պատմություն» հիմնադրամից ստացած դրամաշնորհով), թուրքերի հետ բարեկամական հարաբերությունների կոնտեքստում աշխատանքներ եք տարել, որոնք պետք է տեղ գտնեին դպրոցական դասագրքերում։

- Զազրելի շահարկումներ են, որոնց այս պահին չեմ պատրաստվում արձագանքել, նախկինում արձագանքել եմ, համարում եմ բավարար իմ տված պարզաբանումները։

- Այսինքն՝ սխա՞լ է այդ ամենը, քանզի նաեւ որոշ աշխատանքների տակ Ձեր ստորագրությունը կա։

- Հիմարություններ են պարզապես, ամբողջությամբ մոտիվացիաներն են հիմարություններ, եւ բովանդակությունն է հիմարություն։ Ես կրկին անգամ շեշտում եմ՝ եկեք առաջնորդվենք համախմբվածության եւ միմյանց նկատմամբ համերաշխության սկզբունքներով։

- Հրապարակում կար, որ Սորոսի հիմնադրամը պրոթուրքական ծրագրեր է իրականացնում, աջակցում է Թուրքիային, Դուք Սորոսի հիմնադրամի միջոցներից օգտվել եք, եթե չեմ սխալվում, ի՞նչ կասեք։

- Բացարձակապես։ Ես երբեւիցե «Բաց հասարակության հիմնադրամներից», որը նաեւ կոչվում է Սորոսի հիմնադրամ, ֆինանսավորում չեմ ստացել, սակայն չեմ համարում, որ այդ հիմնադրամից երբեւիցե ֆինանսավորում ստացած անձինք, այդ թվում՝ նախորդ իշխանությունների ներկայացուցիչները, որեւէ արտառոց, վատ բան են դրանով արել։

- Պե՞տք է փակել այդ հիմնադրամը, որն աջակցում է Թուրքիային։

- Բնավ։ Եվ ես Ձեր այս հարցադրումները այս հարցազրույցի շրջանակում համարում եմ անտեղի՝ Հայաստանում եւ Լեռնային Ղարաբաղում ստեղծված իրավիճակի համատեքստում։

- Անտեղի չեն այնքանով, որ մենք Թուրքիայի հետ խնդիր ունենք, եւ այդ հիմնադրամը, փաստորեն, աջակցում է Թուրքիային։

- Այդ հիմնադրամը Հայաստանում իրականացրել է թարգմանությունների, բառարանների ստեղծման, մշակութաստեղծ, նաեւ մարդու իրավունքների շատ լայն սպեկտրի ծրագրեր է իրականացրել։

- Նաեւ՝ պրոթուրքական ծրագրեր։

- Բնավ։ Դրանք, ասացի, հիմարությունների ժանրից են։