Բացարձակ․ Մարգարիտ Ազարյանը ոչ մի կոնֆլիկտ չի ունեցել

Երեկ վարչապետ Նիկոլ Փաշինյանի որոշմամբ վարչապետի աշխատակազմի կադրերի եւ անձնակազմի կառավարման վարչության պետի պաշտոնից ազատված Մարգարիտ Ազարյանը աշխատանքից ազատվել է սեփական դիմումով ու ցանկությամբ։

«Ես իրավունք ունեմ տեղափոխվել այլ աշխատանքի և ոչ մի խնդիր չեմ տեսնում»,-Hraparak.am-ի հետ զրույցում ասաց տիկին Ազարյանը՝ խնդրելով, որ լրագրողներն այս առնչությամբ ավելորդ հիստերիա չսարքեն, ինչն էլ, ասաց, որ պատիվ չի բերում։

Հիշեցնենք, որ Մարգարիտ Ազարյանը 1-ին դեմքերի հետ աշխատելու երկարամյա փորձ ունի, աշխատել է ՀՀ 3 նախագահների հետ էլ։

Հարցին, թե ի՞նչ աշխատանքի է անցնում, նույն ոլորտո՞ւմ, Մարգարիտ Ազարյանը պատասխանեց՝ բնական է՝ բնագավառը նույնն է։

«Դժվար թե գնամ-դառնամ այլ մասնագիտության նոր ձեռքբերող։ Բնականաբար, գիտելիքներն ու փորձը, որ ունեմ, օգտագործվելու է»,-հավելեց տիկին Ազարյանը։

Իսկ հարցին՝ կոնֆլի՞կտ ունեցե՞լ է, վերջինս պատասխանեց․ «Բացարձակ, եթե ճանաչեիք, կիմանայիք․ իմ հետ կոնֆլիկտ երբևէ չի լինում և ոչ մեկի հետ։  Ես կոնֆլիկտային մարդ չեմ, եթե լիներ ուրիշը, կարող էր շատ արագ անջատել հեռախոսն ու Ձեր և ոչ մի հարցի անգամ չպատասխանել»։

Նշենք, որ քիչ առաջ NEWS.am-ին վարչապետի մամուլի խոսնակ Վլադիմիր Կարապետյանը հայտնել էր, որ մեկ օրում վարչապետ Նիկոլ Փաշինյանի որոշմամբ ազատ արձակված պաշտոնյաները պատշաճ չեն կատարել վարչապետի հանձնարարականը։

Տիկին Ազարյանը Hraparak.am-ի հետ զրույցում ասաց, որ հանձնարարությունը չկատարելու դեպքում ազատվում են պաշտոնից հեռացումով, ինքը սեփական դիմում է ներկայացրել, ապա ավելացրեց՝ լավ, ես հիմա կխոսեմ իր հետ։