Աղբարկղ գցելու փոխարեն արդեն ուսադիրներ են տրորում

Երեկ ԵԿՄ նախագահ, ԱԺ «Իմ քայլը» խմբակցության անդամ Սասուն Միքայելյանը, լրագրողների հետ զրույցում անդրադառնալով իր եւ ԱԱԾ նախկին տնօրեն Արթուր Վանեցյանի հարաբերություններին, ասել էր, թե «ԱԱԾ տնօրենն իր ընկերն է, իրար հետ ճանապարհ են անցել, իր ընկերն էլ մնալու է»։ Միքայելյանը նաեւ նշել է, որ բոլորս պիտի սթափվենք, ըստ էության, շարունակելով Արթուր Վանեցյանի «Կա՛նգ առ»-ի կոչի տրամաբանությունը։

Ինչ վերաբերում է Նիկոլ Փաշինյանի՝ Լոս Անջելեսում արած հայտարարությանը, թե Արթուր Վանեցյանի՝ նման հայտարարություն անողի ուսադիրները պետք է նետել աղբամանը, Սասուն Միքայելյանն ասել է․ «Ոչ մեկ իրավունք չունի ասելու, ես էլ եմ ուսադիր կրել, նման բան ոչ մեկ իրավունք չունի ասելու»։

Երեկ մենք փորձեցինք պարզել ազատամարտիկների, պատերազմի մասնակիցների կարծիքն այս կոնֆլիկտի վերաբերյալ։ ԲՀԿ-ական նախկին պատգամավոր, Երդվյալ ազատամարտիկների միության նախագահ Ռուբեն Գեւորգյանին (Ծաղիկ Ռուբո) հարցրինք, թե ինչ կարող է ասել սպայի պատվի, սպայի ուսադիրներն աղբամանը նետելու վարչապետի հայտարարության եւ ԵԿՄ նախագահ Սասուն Միքայելյանի արձագանքի վերաբերյալ։ 
Գեւորգյանը, որն Արցախյան ազատամարտին մասնակցել է կամավորական հիմունքներով եւ ուսադիր չի կրել, ասաց․

«Ես միայն իմ կարծիքը կարող եմ ասել էս ասածի մասին, որ նախ՝ եթե Սասունը միտք ա արտահայտել, ինքը սպա է եղել, ուսադիրներ ունի, ուսադիրներ է կրել, ինքն ազատ կարող է մեկնաբանություն տալ։ Բայց ես իմ կարծիքը կարող եմ ասել ուսադիրներն աղբարկղ գցելու վերաբերյալ՝ բնականաբար, այդ արտահայտությունը, որ կարելի է գցել աղբարկղ, արդեն աղբարկղ գցելու փոխարեն ուսադիրներ են տրորում, ոտնահարում։ Դրա վառ ապացույցը, որ Վայոց ձորի մարզում բարձրաստիճան սպային ծեծի են ենթարկել, ու մինչեւ հիմա էլ ծանր պառկած է։ Դա ինչի՞ նշան է, ուսադիրներն աղբարկղ նետելո՞ւ, թե՞ ավելի վատթար վիճակի մեջ գցելու հենց սպային, ոչ միայն ուսադիրները։ Դրանից արդեն կարելի է եզրակացնել, որ ամեն մի արտահայտություն էսօրվա դրությամբ՝ դա լինի բարձրաստիճան մարդ, երկրի տեր, առաջին մարդ, թե ով, բոլորի տրամադրությունն էլ հիմնականում էս իշխանության մեջ էդ ուղղությամբ է գնում։ Վառ ապացույցը՝ հենց էս սպայի ծեծը, որն ինձ համար ցավ է»։

- Ո՞ր ուղղությամբ կոնկրետ։

- Եթե ուսադիրները մարդիկ իրենց տրամադրությամբ կամ մտածելակերպով մտածում են՝ կարելի է աղբարկղը նետել, էլ էդ արտահայտությունն ո՞ւմ է պետք։ Եթե վառ ապացույցը՝ ուսադիրներով մարդուն քացու տակ են գցում, մինչեւ մահամերձ աստիճանի են հասցնում։ Այսինքն՝ ոչ միայն ուսադիրը, այլ հենց իր աշխատանքով ուսադիրների պատիվը պահող մարդուն կարող են իրենք, կոպիտ ասած, կներեք բառիս համար՝ քացիների տակ գցեն։

- Եթե ԵԿՄ նախագահը, որը նաեւ այս իշխանությունների թիմակիցն է, նման կերպ՝ բավականին կոշտ հակադարձում է վարչապետի ասածներին, սա ինչի՞ մասին է վկայում։

- Դա իրենց խնդիրն է, դա իրենց ներքին կուխնյան է, դա ինձ չի վերաբերում, էդ հարցն իրենց տվեք։

- Իսկ Վանեցյանի հայտարարությանը ծանո՞թ եք, որտեղ սպայի պատվից եւ ուսադիրներից է խոսում։

- Ինքը, բնականաբար, բարձրաստիճան սպա է, ինքը պարտավոր է իր պատվին տեր կանգնի, եթե անհարիր քայլեր են լինում իր պատվի համար։ Դա նույնպես էնքան էլ ճիշտ չի լինի, որ ես դրա պատասխանը տամ։ Պարոն Վանեցյանն իր պատասխանը ճշգրիտ տվել է, ինձ թվում է։