Խոսքը տալու մասին չէ, հետ տալու մասին է
Մեր զրուցակիցն Իջեւանի թիվ մեկ հիմնական դպրոցի տնօրեն Աշոտ Փաշինյանն է` Նիկոլ Փաշինյանի պատմության ուսուցիչը:
- Ձեր աշակերտը Տավուշից գյուղեր հանձնելու մասին է խոսում: Կիսո՞ւմ եք նրա տեսակետները:
- Մենք հանձնվող գյուղ չունենք: Դրանք մեր գյուղերը երբեք չեն եղել, էնպես որ՝ դրանք նախկինում Ղազախի շրջանի գյուղերն են: Թե հիմա ով ինչ կարծիքի է, չգիտեմ:
- Բայց այդ հողերի հանձնումով Հայաստանը բլոկադայի մեջ է հայտնվում:
- Իմ կարծիքը չեմ կարեւորում, մթամ երբ չի տենց եղել…. ոչ մի բլոկադա էլ չկա, միշտ էլ էդ ա, էլի, ավելորդ, սուտի խոսակցություններ են:
- Նիկոլ Փաշինյանը միայն հանձնելու մասին է խոսում՝ ոչինչ դրա դիմաց չպահանջելով: Սա նորմա՞լ է:
- Ո՛չ ես, ո՛չ էլ Դուք չունենք այդպիսի տեղեկություններ, որ հստակ ասենք: Ժամանակը կգա՝ կիմանանք:
- Տավուշում հայկական գյուղեր չկա՞ն, որոնք Ադրբեջանը գրավել է:
- Չէ, ոչ մի գյուղ չունենք, կան միջանկյալ տարածքներ, որ ո՛չ մենք ենք օգտագործում, ո՛չ նրանք, բայց գրավյալ գյուղեր չկան: Մեր կողմից կան, նրանց կողմից չկան:
- Մի խոսքով, Ձեր՝ երկիր հանձնող աշակերտից գոհ եք:
- Դրա հետ եկեք չկապենք, ես միլիոնավոր աշակերտներ եմ ունեցել: Համամիտ չեմ, որ նա իմ աշակերտն է, դրա համար եմ էդպես ասում:
- Արցախը հանձնեց, հիմա Տավուշին է անցել, նրան դավաճան են անվանում, նորմա՞լ է:
- Վերցնելն ու տալը տարբեր բաներ են:
- Բայց այսօր Տավուշի գյուղերը ոչ մեկը չի վերցրել, Նիկոլ Փաշինյանն է կամովին հանձնում Ադրբեջանին:
- Խոսքը տալու մասին չէ, հետ տալու մասին է:
- Բայց նրանք էլ Հայաստանին լիքը տալու բաներ ունեն, գերիներին անգամ մինչ օրս հետ չեն տվել:
- Նրանք էլ հետ կտան, համբերություն ունեցեք:
- Նիկոլ Փաշինյանը վախենում է, ասում է` կհարձակվեն, կկոտորեն մեզ, ինքն էլ պաշտոնից կզրկվի:
- Ինչի՞ց է վախենում: Դրանք էլ ուրիշ լսարանի համար ասված բաներ են: Ամեն ինչ հալած յուղի պես չի գնում:
- Այս ընթացքում նա դպրոց կամ Ձեզ այցելե՞լ է:
- Ժամանակին գալիս էր, վերջերս չի եկել, առիթ չենք ունեցել զրուցելու:
- Չե՞ք կարծում, որ հրաժարական տալու ժամանակն է:
- Բա բայց ես ի՞նչ իմանամ, եթե դրա անհրաժեշտությունն ունենա, կգնա, ո՞ւմ եք պատկերացնում իր տեղը:
- Անփոխարինելի՞ է: Եվ եթե ամեն ինչ պիտի Ադրբեջանին նվիրենք, ինչո՞ւ էր Իջեւանի ջոկատն 90-ականներին կռիվ տալիս:
- Հիմա չեմ կարող այդ մասին խոսել, ես՝ ինքս, շատ բաների եմ ականատես եղել ու գիտեմ՝ ինչն ինչից հետո է:
Արեգ Մարգարյան
Կարծիքներ