Սխալ չի անում միայն այն մարդը, որը տանը կնոջ յուբկի հետևն է թաքնվում

Փերտվարի 25-ին` Անդրանիկ Օզանյանի ծննդյան օրը «Ազատագրական շարժում»-ը Եռաբլուր զինվորական պանթեոնում հայտարարեց Նիկոլ Փաշինյանի հրաժարականի պահանջով ստորագրահավաքի մեկնարկի մասին։ Այս առիթով «Հրապարակը» զրուցել է նախաձեռնության հեղինակներից մեկի՝ Վահագն Չախալյանի հետ:

- Այս օրերին քանի՞ քաղաքացի է Նիկոլ Փաշինյանի հրաժարականի պահանջով ստորագրահավաքին մասնակցել:

- Ես թիվ չունեմ, չեմ տիրապետում:

- Քաղաքացիներին գաղափարը ոգևորե՞լ է:

- Անշուշտ: Շատ ավելի մեծ ոգևորություն կա, քան Ստամբուլյան կոնվեցիայի դեմ ստորագրահավաքին:

- Իսկ ինչպե՞ս է ստացվում, որ քաղաքացիները ցանկանում են օրվա իշխանություններին, մասնավորապես` Նիկոլ Փաշինյանին հեռացնել, սակայն ընդամենը ամիսներ առաջ` խորհրդարանական ընտրություններին իշխող ուժն ամենաշատ ձայները հավաքեց:

- Թե ինչպես իշխող ուժն ամենաշատ ձայները հավաքեց պետք է հարցնել Տիգրան Մուկուչյանին: Ամենևին պատահական չէ, որ Տիգրան Մուկուչյանին մինչ օրս պահում են:

- Ընտրակեղծարարությունների մասի՞ն եք ակնարկում:

- Մենք ասել ենք այդ մասին:

- Եթե Ձեր նշած ընտրակեղծարարությունները չլինեին, ո՞ր ուժը մեծամասնությունը կունենար:

- Ես չեմ կարող էդպես գուշակել, բայց միանշանակ Հայաստանի Հանրապետության քաղաքացիները երկիրը կապիտուլյացիայի տարած ուժին ձայն չէին տա: Արցախը հանձնած, 5000-ից ավելի հայորդի կոտորած ուժին այդքան ձայն չէին կարող տալ: Անշուշտ, իշխող ուժն ունի իր կողմնակիցները, ինչպես ցանկացած ուժ, սակայն դա փոքրամասնություն է կազմում: Իսկ թե ինչպես է փոքրամասնությունը դարձել մեծամասնություն, էդ հարցը պետք է ուղղել Տիգրան Մուկուչյանին:

- Ինչո՞ւ նախաձեռնությունը որոշեցիք մեկնարկել Եռաբլուրից: Որքանո՞վ է ճիշտ Եռաբլուրը քաղաքական պայքարի հարթակ դարձնելը:

- Էսպես ասեմ, որպեսզի պարզ լինի. մենք Եռաբլուրում նշում էինք Անդրանիկ Օզանյանի ծննդյան օրը: Եռաբլուրում պարզապես այդ գործընթացի սկզբի մասին է հայտարարվել: Ես որպես Վահագն Չախալյան, ամեն դեպքում կողմնակից չէի, այդ գաղափարին, բայց քանի որ մեզ մոտ հարցերը լուծվում են ժողովրդավարական մեթողներով, և քանի որ մեծամասնությունը որոշեց նախաձեռնությունը սկսել Եռաբլուրից, ես դեմ չեղա:

- Իսկ ովքե՞ր էին այդ գաղափարի հեղինակները:

- Նաև իմ գաղափարն է՝ կարող եք նշել:

- Բայց նոր ասում էիք, որ կողմ չեք եղել այդ գաղափարին:

- Եռաբլուրը սկիզբ է, ավարտ չէ, ինչպես այսօր փորձում են ներկայացնել: Եռաբլուրը սկիզբ է, պայքարի սկիզբ: Մենք կատարվածի հետ չենք համակերպվել: Նաև Եռաբլուրը, որը 2 անգամ մեծացել է, խորհուրդ է: Մինչև պատերազմը մենք բարձրաձայնում էինք, որ պետք չէ անտարբեր լինել, եկեք պայքարեք: Մարդիկ անտարբեր գտնվեցին: Այն ժամանակ էլ ասում էի, որ անտարբերության համար թանկ ենք վճարելու: Եթե մենք դեմ ենք, որ վաղը Եռաբլուրը քառապատկվի, ապա պետք է այսօր չլինենք անտարբեր:

- Ուղիղ մեկ տարի առաջ, երբ Դուք փողոցային պայքար էիք իրականացնում, պայքարի մասնակիցներից ոմանք հենց Ձեզ մեղադրում էին, որ պայքարը տապալեցիք, մարդկանց տարբեր ուղղություններով ցրեցիք ու չառաջնորդեցիք դեպի իշխանափոխություն: Հիմա որքանո՞վ է իրատեսական, որ հասարակությունը կհամախմբվի Ձեր շուրջը:

- Ես արդեն հասկացա, թե ինչ մեղադրանքի մասին եք խոսում: Էնպես չի, որ մենք մեծամտաբար կարծում ենք, թե անսխալական ենք: Անշուշտ, մենք էլ ենք սխալներ անում: Սխալ չի անում միայն այն մարդը, որը տանը կնոջ յուբկի հետևը թաքնվում է: Պայքարը տապալելու մասին հայտարարողները փաստերը խեղաթյուրում են: Ես ժողովրդին երբեք տուն չեմ ուղարկել: Ամեն ինչ արել եմ, որ մարդիկ մնան փողոցում: Կարմիր բերետավորները հարձակվել են մեզ վրա, ապա ձերբակալել, որից հետո միայն ժողովրդին տուն ենք ուղարկել: Եթե ինձ մնար, նոյեմբերի 10-ից հետո ժողովուրդը մեկ օր անգամ տուն չպետք է գնար: Չպետք է չգնար, մինչև Փաշինյանը չհեռանար:

- Ստացվում է՝ 2020 թվականի նոյեմբերից ընդդիմությունն օրվա իշխանություններին հեռացնելու դեմ պայքար է մղում, սակայն այդպես էլ արդյունքի չի հասնում: Սրանից չի՞ կարելի ենթադրել, որ փողոցային պայքարն այսօրվա ընդդիմության համար չէ: Իսկ գուցե ընդդիմությունն իշխանությանը հեռացնելու համար այլ ճանապա՞րհ ընտրի` փողոցային պայքարից զատ:

- Ցանկացած հաջողված գործ իր մեջ տարատեսակ անհաջողություններ է պարունակում: Հաղոջության հասնում են նրանք, ովքեր անհաջողություններից չեն հիասթափվում: Ցանկացած հաջողված գործի ընթացքում տասնյակ, կամ հարյուրավոր անհաջողություններ են լինում: Անհաջողությունները չեն կարող պայքարից հրաժարվելու պատճառ դառնալ: Հաջողում է նա, ով կես ճամփից չի հիասթափվում:

- Բայց հասարակությունը Ձեր շուրջ կհամախմբվի՞:

- Ես գուշակություններ անել չեմ կարող, բայց անտարբերությունն այս իրավիճակում մեծ հանցանք է: Մեր պետական շահերից է ելնում Նիկոլ Փաշինյանի հրաժարականի մասին բարձրաձայնելը: Բացարձակ այլ խնդիր չկա այստեղ: Պետք է փոխվի բանակցողը:

- Հիմա եթե Դուք իշխանության գաք, բանակցային գործընթացում ի՞նչ կփոխեք:

- Մեր օրակարգում իշխանության գալու հարց դրված չէ: Ստորագրություններն իշխանության գալու համար չենք հավաքում: Մենք Նիկոլ Փաշինյանի հրաժարականն ենք պահանջում միայն:

- Ենթադրենք Նիկոլ Փաշինյանը հեռացավ, ո՞վ պետք է նրան փոխարինի և բանակցային գործընթացն ի՞նչ ընթացք պետք է ստանա` Ձեր կարծիքով:

- Ժողովրդավարական երկրներում իշխանություն ձևավորում են ընտրությունների միջոցով: Այս պարագայում ևս պետք է ընտրությունների միջոցով իշխանություն ձևավորվի` առանց Տիգրան Մուկուչյանի քավորության: Ես ինքս բացարձակ ոչ մի պաշտոն չեմ ուզում:

- Պարոն Չախալյան, Վրաստանը հայտարարեց, որ չի պատրաստվում միանալ Ռուսաստանի դեմ Արևմուտքի տնտեսական և ֆինանսական պատժամիջոցներին: Դուք ջավախահայ եք, կարծում եմ` Վրաստանի ներքաղաքական գործընթացներին հետևում եք: Ձեր կարծիքով` Վրաստանի այս քայլն ի՞նչ է նշանակում:

- Վրաստանի այսօրվա իշխանություններն իրենց որոշումները երկրի շահերից ելնելով են կայացնում: Վրաստանը չի ցանկանում պարզապես ներքաշվել այս կոնֆլիկտի մեջ: Կարծում եմ` սա Վրաստանի կողմից ճիշտ որոշում է: