Փետրվարից մեր մեքենաները կմնան Վրաստանում անտեր

Հարգելի լրագրողներ, այս նամակը գրում եմ ՀՀ լրագրողական աշխարհի ու հասարակության ուշադրությունը եւս մի հիմնախնդրի վրա հրավիրելու համար` կապված մաքսային «բարեփոխումների» հետ: Բոլորդ եք տեղյակ, որ կառավարությունը փոփոխություններ է իրականացրել ՀՀ մաքսային օրենսգրքում, որի համաձայն՝ արգելվում է «ՀՀ քաղաքացի ֆիզիկական անձանց ժամանակավոր ներմուծում» ռեժիմով Հայաստանի տարածք ներկրել ավտոմեքենաներ Վրաստանից: Առաջին հայացքից անմեղ մի փոփոխություն, սակայն ընդամենը առաջին հայացքից:



Այս քայլով մեր վայ կառավարությունը եւս մի փորձ է կատարում՝ մտնելու մարդկանց գրպանները: Բանն այն է, որ Վրաստանի հետ սահմանակից շրջաններում ավտոմեքենաների զգալի մասը վրացական են, որոնց սեփականատերերը մեր` Հայաստանի Հանրապետության քաղաքացիներ են, ովքեր, մի քիչ խնայողություններ անելով, կարողացել են մեքենա գնել Վրաստանից, քանի որ այնտեղ անհամեմատ ցածր են մեքենաների գները: Այդ ավտոպարկի ճնշող մասը` մոտ 90%, հին մեքենաներ են, որոնց գները տատանվում են 3000-5000 դոլարի սահմաններում:



Իհարկե, կան նաեւ թանկարժեքները, որոնք մեծ թիվ չեն կազմում ու պատկանում են պատգամավորներին ու օլիգարխներին: Ընդհանուր առմամբ, Հայաստանում նման կարգավիճակով կա շուրջ 45 հազար ավտոմեքենա: Այժմ մեր համաքաղաքացիները, այդ թվում նաեւ ես, փաստի առաջ են կանգնել: Փետրվարի մեկից այդ մարդկանց թույլ չի տրվելու իրենց մեքենաներով մուտք գործել Հայաստանի տարածք. նրանք ստիպված են լինելու կամ շատ ցածր գներով վաճառել իրենց մեքենաները Վրաստանում, կամ էլ մաքսազերծման մեծ գումարներ վճարել իրենց հնամաշ մեքենաների համար:



Այսօրվա պայմաններում սա սոցիալական լրացուցիչ բեռ է մեր համար: Հազարավոր մարդիկ չգիտեն, թե էլ ինչ անեն, որ կարողանան ընտանիք պահել: Այդ մեքենաներով նրանք առեւտուր են անում, ինչն այնքան էլ մեծ եկամուտներ չի ապահովում: Մեր կառավարությունը, երկրի բնակչության առաջ ծառացած սոցիալական հարցերը լուծելու փոխարեն, նորերն է ստեղծում: Մարդիկ արդեն շնչահեղձ են լինում: Անձամբ ես հոգով արդեն արտագաղթել եմ, մնում է ֆիզիկապես արտագաղթեմ այս երկրից: Ու համոզված եմ, որ այդ օրը, վաղ թե ուշ, գալու է: Ես իմ ու ընտանիքիս համար այլեւս այստեղ որեւէ ապագա չեմ տեսնում: Հարգելի լրագրողներ, խնդրում եմ անդրադարձեք այս խնդրին: Շատերն են ակնկալում, որ վայ կառավարությունը գոնե ժամանակ կտրամադրի մարդկանց մեքենաների կարգավիճակը փոխելու համար, այլապես փետրվարից մեր մեքենաները կմնան Վրաստանում անտեր:



Հովսեփ ՂՈՒՄԱՇՅԱՆ

ՀՀ քաղաքացի