Թամարա Պողոսյանը երեկ ավագանու նիստի ժամանակ մի լավ զվարճացրեց ներկաներին

Երեւանի ավագանու ԲՀԿ ֆրակցիայի ղեկավար Թամարա Պողոսյանը երեկ ավագանու նիստի ժամանակ մի լավ զվարճացրեց ներկաներին: Նա շատ մտահոգ դեմքով ելավ տեղից ու առաջարկեց, որ տուրքեր գանձեն ոչ միայն ընտանի կենդանիների, այլ նաեւ այն վայրի կենդանիների համար, որոնք մարդիկ պահում են տներում:

ԲՀԿ-ական տիկնոջ առաջարկին զուգահեռ շատերի աչքի առջեւ պատկերվեց Գագիկ Ծառուկյանի գազանանոցը՝ առյուծների գլխավորությամբ:

Շշուկներ եղան, թե տեսնես Ծառուկյանը տեղյա՞կ է ԲՀԿ ֆրակցիայի նոր առաջարկից, մեկ ուրիշն էլ վրա բերեց, թե երեւի իրենց համար առյուծները մտնում են ընտանի կենդանիների դասի մեջ: Իմիջիայլոց նշենք, որ քաղաքապետարանում ԲՀԿ-ն մի ուրիշ կարգի սերտաճել է ՀՀԿ-ի հետ, այն կարգի, որ իշխանական ծրագրերին կողմ քվեարկելուց առաջ նախապես դիֆերամբներ է ձոնում դրանց, ինչն իրենց թույլ չեն տալիս անել անգամ իշխանական հայտնի «աշուղներ» Լեւոն Իգիթյանն ու Աստղիկ Գեւորգյանը: