ԱՄՆ կողմից Հայոց ցեղասպանության լիարժեք ճանաչումը ժամանակի հարց է. Սերժ Սարգսյան
ՀՀ Նախագահ Սերժ Սարգսյանը Վաշինգտոնի Ազգային Մայր տաճարում Հայոց ցեղասպանության հարյուրերորդ տարելիցին նվիրված միջկրոնական աղոթքի ժամանակ վստահություն է հայտնել, որ ԱՄՆ–ի կողմից Հայոց ցեղասպանության լիարժեք ճանաչման հարցը ժամանակի հարց է։
Ինչպես հաղորդում է «Արմենպրես»-ը, իր ելույթի ժամանակ Սերժ Սարգսյանը նշել է, որ հայ ժողովուրդը արդարության և ճշմարտության համար մղվող հարյուրամյա պայքարի ընթացքում մշտապես զգացել է նաև ԱՄՆ-ի աջակցությունը:
«Ցեղասպանության զոհերի թիվն անհամեմատ մեծ կլիներ, իսկ վերապրածների ճակատագիրը` շատ ավելի դաժան, եթե այդ ծանր շրջանում մեր ժողովրդի կողքին չկանգնեին մեր բարեկամ երկրները, այդ թվում և Միացյալ Նահանգները: Ինչպես բնորոշել է մեծ ամերիկահայ Վիլիամ Սարոյանը. «Այստեղ հանդիպեցին Ցեղասպանությունից մազապուրծ հայերը, ծիծաղեցին ու աղոթեցին իրենց մայրենի լեզվով` ստեղծելով մի նոր Հայաստան»»,- ասել է նա։
ՀՀ Նախագահը հիշեցրել է, որ ամերիկյան առաջադեմ հասարակական-քաղաքական գործիչները դեռևս 19-րդ դարի վերջին խստորեն դատապարտել են սուլթանական կառավարության հակահայկական քաղաքականությունն ու օգնության ձեռք մեկնել տարագիր հայերին:
«Հիշենք ամերիկյան Կարմիր խաչի հիմնադիր Կլարա Բարտոնի հերոսական ու բացառիկ առաքելությունն օվկիանոսի այն կողմ տառապյալ հայերին օգնություն ցուցաբերելու համար: Ամերիկյան հասարակությունը բողոքի ձայն բարձրացրեց նաև 1915-1923 թվականներին հայերի զանգվածային կոտորածների և տեղահանության դեմ, որը հետագայում պետք է որակվեր որպես Ցեղասպանություն: Ամերիկյան մամուլն ամեն օր տպագրել է այս ողբերգական իրադարձությունների ականատես դիվանագետների, միսիոներների, հրաշքով փրկված հայերի պատմածները, իսկ Օսմանյան կայսրությունում ԱՄՆ դեսպան Մորգենթաուի անունը ոսկյա տառերով է հավերժացել հայերի բարեկամների շարքում: Ժամանակին նա դարձավ առաջին ամերիկացին, ով աշխարհին պատմեց հայ ժողովրդի նկատմամբ երիտթուրքերի զանգվածային հանցագործության մասին` որպես ազգի ոչնչացման արշավ որակելով Հայոց ցեղասպանությունը»,- ընդգծել է Սերժ Սարգսյան։
ՀՀ Նախագահն իր երախտիքի խոսքն է հայտնել նաև այն ամերիկացիներին, ովքեր Հայաստանի, Մերձավոր Արևելքի և Եվրոպայի տարածքում որբանոցներ հիմնեցին` մահից փրկելով և խնամելով Ցեղասպանությունը վերապրած տասնյակ հազարավոր հայ որբերի:
«Մեր օրերում էլ ԱՄՆ-ում Հայոց ցեղասպանությանը հստակ գնահատական տալու փորձեր են կատարվում: Միայն այն փաստը, որ արդեն 44 նահանգ ճանաչել և դատապարտել է մարդկության դեմ իրագործված այդ ոճիրը, արդեն իսկ ասածիս վառ ապացույցն է: Հուսով եմ, որ ԱՄՆ կողմից Հայոց ցեղասպանության լիարժեք ճանաչման հարցը ոչ թե «եթե»-ի այլ «երբ»-ի հարց է»,- ասել է ՀՀ Նախագահը։
Սերժ Սարգսյանը նաև կոչ է արել Հայոց ցեղասպանության սրբադասված նահատակների համար աղոթելու հետ մեկտեղ աղոթել նաև, որպեսզի ճշմարտության և արդարության պահանջը լինի մշտարթուն և ղողանջի հավերժ: «Եկե՛ք համատեղ ուժերով վիրակապենք մարդկության վերքերը` հասնելու համար արդարության և խաղաղության մեզանում և ողջ աշխարհում»,- ասել է ՀՀ Նախագահը:
Կարծիքներ