Պարեկների հետ վիճաբանության արդյունքում բերդում հայտնված երիտասարդի մայրն ահազանգում է

Ամիսներ առաջ Hraparak.am-ը անդրադարձել էր  Սպիտակ քաղաքի բնակիչ, 33-ամյա Արթուր Յարմալոյանի եւ պարեկների միջև տեղի ունեցած միջադեպին, որի արդյունքում Լոռու մարզի առաջին ատյանի իրավասության դատարանը երիտասարդին դատապարտել էր  3․5 տարի ազատազրկման: 4 ամիս կալանավայրում մնալուց հետո Արթուրի խափանման միջոցը փոխվել էր,  ազատ էր  արձակվել, ստորագրությամբ չհեռանալու պայմանով:

Արթուր Յարմալոյանն այդ  վճռի հետ չէր համակերպվել եւ դիմել էր վերաքննիչ դատարան՝ վճիռը բեկանելու, սակայն վերաքննիչ դատարանը վճիռն  անփոփոխ է թողել, ավելին, մայրը՝ տիկին Յարմալոյանը կրկին դիմել է Hraparak.am- պատմելով, որ որդու նկատմամբ անարդարություն է տեղի ունեցել,  արդեն 3 ամիս է ՝ Արթուրը պատիժը կրում է կալանավայրում : Երիտասարդի մայրն ահազանգում է:

 « Վերաքննիչ դատարանը առանց տեսաձայնագրությունները նայելու, առանց առերեսման , առաջին ատյանի դատարանի որոշումն անփոփոխ թողեց, ես պահանջում եմ, ու խնդրում դատախազությանը վերանայել գործը, այն, ինչ կատարվել է, որդուս նկատմամբ անարդարություն է:  Հիմա վճռաբեկ ենք ներկայացրել, ակնկալում եմ վճռաբեկի օբյեկտիվ քննություն, եթե նորից ոչինչ չփոխվեց, մինչև եվրոդատարան  գնալու ենք՝ արդարության հասնելու »,-ասաց երիտասարդի մայրը՝ նշելով, որ հարկ եղած դեպքում  մեզ կտրամադրի եւ կհրապարակի տեսանյութերը, որտեղ երևում է, թե ինչ պահվածք են դրսևորում պարեկները, եւ ինչպես են որդուն ծեծելով բերման ենթարկում :