Լևոն Մկրտչյանը կադրային ջարդ չի անելու
Կրթության նորանշանակ նախարար Լևոն Մկրտչյանն այսօր կառավարությունում, պատասխանելով «Հրապարակի» հարցին, հայտարարեց, որ կադրային մեծ փոփոխություններ չի կատարելու։ «Մի չափանիշ կա՝ կադրային ջարդ չի լինի, - ասաց դաշնակցական նախարարը, - աշխատողներից շատերի հետ ես աշխատել եմ 10 տարի առաջ, և այդ իմաստով շահեկան է կրթության նախարարությոսւնը։ Միակ չափանիշը պռոֆեսիոնալիզմն է։ Եթե կբավարարեն, կաշխատենք»։ Լևոն Մկրտչյանը երրորդ անգամ է նախարար նշանակվում։ Նա այդ պաշտոնին է եղել 1998-1999 և 2001-2003 թթ-ին, իսկ վերջին 7-8 տարիների ընթացքում ևս համակարգում է եղել, բայց որպես ԵՊՀ դասախոս։
-Կա՞ն սխալներ, որ դուք չեիք ցանկանա կրկնել։
- Չեմ կարող ասել։ Նախ, ես յուրաքանչյուր անգամ 1-2 տարուց ավելի չեմ պաշտոնավարել, և եթե քայլերը կատարում ես, արդյունքը պետք է փորձես ներկայացնել և դրա համար պատասխան տալ։ Այս անգամ վիճակն այնպիսին է, որ մենք ունենք արդյունք և կրթական համակարգը կայացած է, և այս նոր ժամանակահատվածի համար հիմնական պրոբլեմը լինելու է կրթության որակը։
Այսօր նախարարը պատրաստ չէր պատասխանել շատ հարցերի, և երեք անգամ խնդրեց լրագրողներին իրեն գոնե երկու շաբաթ ժամանակ տալ, որից հետո խոստացավ մեծ ասուլիսի հրավիրել բոլորին և պատասխանել ամենասուր հարցերին, այդ թվում նաև կրթության համակարգում առկա կոռուպցիայի մասին։ Իսկ այսօր ընդամենը նշեց, որ իր համար մեկ չափանիշ կա՝ պրոֆեսիոնալիզմ, կուսակցական պատկանելիությունը դեր չի խաղալու։ Խոստացավ․ դպրոցի ուսուցիչն է լինելու ուշադրության կենտրոնում։ Հանրապետական տնօրեններին նախարարը չի փոխարինի դաշնակցականներով, իսկ ընտրությունների ժամանակ կրթության համակարգի աշխատողներին փորձելու է հնարավորինս հետ պահել քաղաքական գործընթացներից։ Նախարարի պորտֆելի շուրջ իր և Լիլիթ Գալստյանի միջև մրցակցության մասին հարցերին Լևոն Մկրտչյանը տհաճությամբ, բայց ժպիտով արձագանքեց․ «Մեր մեջ պաշտոնների համար պայքար չի ընթացել»։
Կարծիքներ