ՀՀԿ-ն գտնում է, որ ես իրենց պետք չեմ. Ճոյտ

Հարցազրույց ԱԺ նախկին պատգամավոր Հակոբ Հակոբյանի (Ճոյտ) հետ:

-Պարոն Հակոբյան, երկու ֆիլմ էիք պատրաստվում նկարահանել՝ մեկը հայ-ադրբեջանական պատմության, մյուսը՝ կոռուպցիայի մասին: Ի՞նչ փուլում է ֆիլմերի ստեղծումը:

Ֆիլմի սցենարը ամբողջովին պատրաստ է, դերասանների հետ կապված կան խնդիրներ, նրանք զբաղված են մի փոքր և այսօրվա վիճակով եղանակային պայմանները չեն կարող թույլ տալ, քանի որ սցենարը ավելի շատ ամառային եղանակ է պահանջում, դրա համար սպասում ենք եղանակների տաքանալուն և դերասանների ազատ լինելուն:

-Ո՞ր ֆիլմն եք պատրաստվում առաջինը հանձնել հեռուստադիտողի ուշադրությանը:

Կոռուպցիայի մասին ֆիլմը: Մենք կոնկրետ չենք անձնավորում, երևույթների, իրականության մասին ենք նկարահանում, կոնկրետ անձի չի վերաբերելու:

-Քաղաքական բնույթ կրելո՞ւ է ֆիլմը, ընդգծվելո՞ւ է կոռումպացված չինովնիկի կերպար:

Այո, չինովնիկի կերպար շատ հստակ, շատ պարզ երևալու է և նրան պատժելու են կոռուպիցիոն գործունեությունով զբաղվելու համար, բայց չեմ ուզում շատ բացել փակագծերը, բայց պարզ երևալու է:

-Ձեր ֆիլմը ի՞նչ նպատակի է ծառայելու, գուցե ձեր ֆիլմից հետո կոռուպցիան վերանա՞:

Այո, մեր ֆիլմը հենց դաստիարակչական բնույթ է կրելու, քանի որ ֆիլմի հերոսը, որն ինչ որ գործողություն է անում, որը օրենքից դուրս է, նա իր աչքով տեսնում է, որ դա թուրքի գլխարկով մարդիկ են: Մենք՝ սովորական մարդիկս, տեսնում ենք սովորական մարդկանց, իսկ մեր հերոսը տեսնում է, որ նրա գլխին կա թուրքի գլխարկ և բղավելով հարձակվում է նրանց վրա՝ գոռալով թուրքը, թուրքը: Ֆիլմը կոչվում է «Սուպեր պապ», քանի որ մահացած պապը հետ է գալիս մեր ժամանակներ:

-Գովազդատուներ, հովանավորներ կա՞ն:

Ոչ, մենք հովանավորներ չունենք, չենք էլ ցանկանում ունենալ որևիցե հովանավոր:

-Մյուս ֆիլմի նկարահանման աշխատանքները ե՞րբ եք պատրաստվում սկսել:

Տեսնենք, դա արդեն հայ-ադրբեջանական կոնֆլիկտի, պատերազմի մասին ա, կոնկրետ՝ բանակցությունների: Ես չեմ կարող ձեզ ասել ամբողջը, քանի որ հետաքրքրությունը կկորի, բայց դրա մասին է: Մենք մի կողմին չենք հերոսացրել, ոչ էլ մյուս կողմին ենք քցել, այսինքն՝ նկարահանում ենք կոնֆլիկտ, դրա պատճառները: Նախագահները Հայաստանի և Ադրբեջանի բանակցում են, և սահմանի վրա հայ և ադրբեջանցի զինվորը սկսում են խոսել, այդ ժամանակահատվածում էլ գնում են բանակցությունները նախագահների միջև:

-Պարոն Հակոբյան, ի՞նչ սոցհարցում եք կատարել, ի՞նչ նպատակով:

Սոցհարցում ենք իրականացրել այսօրվա քաղաքական իրավիճակի վերաբերյալ, որ ընտրությունների ժամանակ ում ձեն կտան, ում ձեն չեն տա և ինչու: Մենք այդ սոցհարցման ամբողջովին արդյունքները ունենք: Եվ, ես համոզվել եմ, որ այժմ դա շատ դժվար է հրապարակել, որովհետև դա կլինի կուսակցությունների նկատմամբ հակաքարոզչություն և նրանք դա ճիշտ չեն հասկանա, բայց մեր ամբողջ արածը իրականություն ա, որովհետև մենք ունենք ձայնագրությունները, մարդկանց հասցեները: Չէի ցանկանա, որ դա մենք հրապարակային դարձնեինք, որովհետև դիմացը ընտրություններ ա, իսկ կուսակցությունները հնարավոր ա ճիշտ չհասկանան, որովհետև թվերը, կարծիքները իրենց մասին լսելով՝ կմտածեն՝ մենք սարքել ենք, սուտ ենք ասում:

-Քանի՞ հոգու շրջանում եք հարցում իրականացրել:

611 մարդու ենք մենք հարցրել և նոր տարուց հետո շարունակելու ենք:

-Խորհրդարանական ընտրություններից հետո հրապարակելո՞ւ եք սոցհարցման արդյունքները:

Դե կարող ա և ընտրություններից առաջ էլ հանրայնացնենք, եթե մենք տեսնենք, որ կան կուսակցություններ, որոնք մոլորեցնում են հասարակությանը տարբեր ձևերով, այդ ժամանակ կհրապարակենք և թույլ չենք տա, որ հասարակությանը մոլորեցնեն: Եթե կգնան իրենց ճանապարհով, չեն մոլորեցնի, խոսքը գնում ա կեղծիքների, ընտրակաշառքի մասին, կմնա դա ընտրություններից առաջ, բայց ընտրություններից առաջ մենք այդ հարցումը պետք ա դնենք մի ծրարի մեջ, մի քանի լրագրողների ներկայությամբ պետք ա տանենք, հանձնենք բանկ և էնտեղ մենք ասենք, որ կարող ենք այդտեղ մուտք գործել մի 5 հոգով: Այնուհետև ընտրություններից հետո կգնանք կբացենք ծրարը և կտեսնենք՝ մեր արածը ճիշտ ա՞, թե՞ սխալ ա:

-Հիմա այսքան կուսակցությունների մեջ չե՞ք տեսնում մի կուսակցություն, որը մոլորեցնում է հանրությանը:

Այո, տեսնում եմ, պարզ երևում է:

-Ո՞ր կուսակցությունն է:

Առկա երկու կուսակցություններ կան, որոնք որ մոլորեցնում են հասարակությանը, կա կոնկրետ կուսակցություն, որն արդեն պաշտոններ ա բաժանել, արդեն ասել ա՝ ձեր մարզում, եթե ընկնեք առաջինի տակ, պատգամավոր կլինեք՝ անկախ նրանից, եթե մարդը հավաքի 1000 կամ 500 ձայն, ուրեմն կլինեն այդ կուսակցության պատգամավորը, դա մոլորեցում է, որը չի կարելի:

-Պարոն Հակոբյան, անուններ տվեք:

Չեմ կարող ասել, բայց ձեզ ասում եմ՝ երկու կուսակցություններ: Քանի որ օրենքը փոխվել է, այդ ռետինգային տարբերակը ժողովուրդը հստակ չգիտի, նախկինի նման են գնում ընտրության: Մարդիկ չեն կարդացել, չգիտեն:

-Խոշոր կուսակցություննե՞ր են:

Ես չէի ուզենա ասել, հետագայում, եթե մարդիկ տեսնեն, որ իրենք մոլորված են, իրենք այդ մասին կխոսեն:

-Հասարակությունը այժմ չի՞ տեսնում, ի վերջո, սոցհարցում եք արել:

Հասարակությունը մանրամասն օրենքների հետ կապված չգիտի:

-Պարոն Հակոբյան ժամանակին մտերմիկ հարաբերությունների մեջ եք եղել Գագիկ Ծառուկյանի հետ: Այժմ խոսվում է նրա վերադարձի մասին ակտիվ քաղաքականություն: Ի՞նչ կարծիք ունեք դրա վերաբերյալ և եթե Ծառուկյանը վերադառնա, դուք նրան կսատարե՞ք:

Գագիկ Ծառուկյանը ժողովրդի կողմից շատ ընդունված անձնավորություն է և բնական է, որ ընտրությունը կատարում է ժողովուրդը: Շատ լավ կլիներ, որ վերադառնար և շատ լավ կլիներ, որ մեր քաղաքական դաշտում այլ ցուցակում գրվող մարդիկ, իրենք նույնպես պայքարեն ռեյտինգային տարբերակով, որպեսզի իրենց գնահատականները վերջ ի վերջո ստանային, հասկանային, թե ժողովրդի կողմից ոնց են ընկալվում: Թե չէ գրում, անունները դնում են ցուցակի մեջ, ժողովուրդը դրանց ձայն չի տալիս, հետո էդ մարդիկ դառնում են պատգամավոր: Թող գումար տային, դասախոսություններ կարդային ընտրությունների օրենքների վերաբերյալ, որ ժողովուրդը ընկալեր օրենքները մանրամասն:

-Դուք ի՞նչ ձևով եք մասնակցելու Խորհրդարանական ընտրություններին:

Ես 2017 թ ընտրություններին պատրաստվում եմ, այսօր ես փորձում եմ տեսնել՝ ում հետ եմ գնալու, ի՞նչ ձևաչափով եմ գնալու:

-Ո՞ր կուսակցությունների ղեկավարների, անդամների հետ եք հանդիպումներ, քննարկումներ ունեցել:

Շատ շատերի, հանդիպում ենք, քննարկում ենք, կոնկրետ որոշում չկա, դեռ չեմ կայացրել, ես դեռ պետք է կողմնորոշվեմ, թե որ կուսակցության հետ կգնամ, չէ որ այստեղ ոչ թե գնալն ա կարևոր, այլ գնալն ու աշխատելը, դրա համար շտապելու կարիք չկա: Բոլորի ծրագրերը նույնն ա, սոցիալական խնդիրներն են առաջ քաշում, արտագաղթը, կոռուպցիան, այստեղ խնդիր է առաջանում, թե ժողովուրդը ում կվստահի:

-Պարոն Հակոբյան, եթե պարոն Ծառուկյանը ետ վերադառնա քաղաքականություն, ԲՀԿ-ին կմիանա՞ք:

ԲՀԿ-ն ունի իր հստակ ծրագրերը, իր պատգամավորները, նրանք աշխատել են այդ պատգամավորների հետ, ճանապարհ են անցել, ես չէի ուզի գնայի, խցկվեի որևէ մեկի փոխարեն: Եթե ցանկանան, որ ես լինեմ, դա քննարկման խնդիր է:

-Դուք աջակցել եք ՀՀԿ-ին, այս ընտրություններին գուցե՞ իրեն միանաք:

ՀՀԿ-ն գտնում է, որ ես իրենց պետք չեմ, որովհետև որևիցե միջոցառման, համագումարի ես ներկա չեմ եղել այսքան տարիների ընթացքում:

Աննա ՊԱՊԻԿՅԱՆ