Եթե բարոն Մոնտեսքյոն ողջ լիներ․․․
Տարիներ շարունակ մեզանում քննարկում են օրենքի, օրինականության, մարդկանց իրավունքների թեմաները: Հավանաբար 18-րդ դարում էլ է եղել նման խնդիր, ինչը բարոն Շառլ Լուի Մոնտեսքյոին դրդել է ստեղծել «Օրենքի ոգին» (ֆրանսերեն՝ De l’esprit des loix) աշխատությունը:
Մոնտեքյոն Լուսավորության դարաշրջանի վաղ փուլի երևելի ներկայացուցիչներից է, եվրոպական լիբերալիզմի նախահայրը, ով մեծ ներդրում է ունեցել ոչ միայն ֆրանսիական, այլև համաշխարհային մշակույթում, նշանակալի ազդեցություն է ունեցել ազատասեր և առաջադեմ մարդկանց ձևավորման վրա: «Օրենքների ոգու մասին» նրա տրակտատը հրապարակել է անանուն, Ժնևում 1748 թվականին: Այն ներառված է եղել արգելված գրքերի ցանկում, ինչը, այնուամենայնիվ, չի խանգարել, որպեսզի տրակտատը հանրաճանաչ դառնա Ֆրանսիայի սահմաններից դուրս և թարգմանվի եվրոպական մի քանի լեզուներով:
Թվում է, թե այդ աշխատության բազմաթիվ դրույթներ այսօր էլ արդիական են, հատկապես մեզ համար: Իրավունքի մասին Մոտեսքյոն գրել է, որ օրենքներին, որոնք ստեղծել են մարդիկ, պետք է նախորդած լինի արդարացի հարաբերությունների հնարավորությունը: Մարդիկ ունեն օրենքներ, որոնք սահմանում են հարաբերությունները կառավարողների և կառավարվողների միջև. դա քաղաքական իրավունքն է: Կան օրենքներ, որոնք սահմանում են բոլոր քաղաքացիների հարաբերությունները միմյանց հետ. դա քաղաքացիական իրավունքն է:
Որպես ֆիզիկական էակ, մարդը, բնական մյուս մարմինների նման, կառավարվում է անփոփոխ բնական օրենքներով, սակայն որպես բանական և իր սեփական մղումներով գործող էակ, մարդն անընդհատ խախտում է ինչպես բնության այդ հավերժական օրենքները, այնպես էլ փոփոխական մարդկային օրենքները:
Հասարակության մեջ ապրող մարդկանց՝ ընդհանուր օրենքների նկատմամբ պահանջմունքը պայմանավորում է պետության ձևավորումը: Պետության ձևավորման (քաղաքական իրավիճակ) և ընդհանուր օրենքների համար անհրաժեշտ է քաղաքացիական իրավիճակ (կամքի միասնություն):
Խոսելով պատերազմի մասին, Մոնտեսքյոն նկատել է, որ հենց որ մարդիկ միավորվում են հասարակության մեջ, կորցնում են իրենց թուլության գիտակցումը: Գոյություն ունեցած հավասարակշռությունը վերանում է և սկսվում է պատերազմը (քանի դեռ Թուրքիան չէր միավորվել Ադրբեջանի հետ, գոյություն ուներ որոշակի հավասարակշռություն, իսկ միավորվելուց հետո տեղի ունեցավ պատերազմ, որը կշարունակվի այնքան ժամանակ, քանի դեռ այդ «մեկ ժողովուրդ երկու պետությունը» միավորված են-Գ.Վ.):
Յուրաքանչյուր հասարակություն սկսում է գիտակցել իր ուժը, այստեղից պատերազմի վիճակը ժողովուրդների միջև: Առանձին անձինք սկսում են զգալ իրենց ուժը, այստեղից պատերազմ առանձին անձանց միջև: Պատերազմի նպատակը հաղթանակն է, հաղթանակի նպատակը՝ զավթելը, զավթելու նպատակը՝ պահպանելը: Դրանից և նախորդող սկզբունքներից պետք է ծագեն բոլոր օրենքները, որոնք ձևավորում են միջազգային իրավունքը:
Ժողովրդի ոգու մասին խոսելիս, Մոնտեսքյոն նշել է, որ աշխարհը ղեկավարվում է ոչ թե աստվածային նախախնամությամբ կամ ճակատագրով, այլ ցանկացած հասարակության մեջ գործող բարոյական և ֆիզիկական կարգի օբյեկտիվ ընդհանուր պատճառներով, որոնք պայմանավորում են «ժողովրդի ոգին» և նրա պետական ու իրավական կյանքի համապատասխան ձևերն ու նորմերը (որտեղ և երբ ենք ձևախեղել այդ ձևերը և նորմերը, որտեղ ենք պարտակել ժողովրդի ոգին ու ամեն ինչ բարդել հայի բախտի կամ ճակատագրի վրա-Գ.Վ.)։
Մարդկանց կառավարում են ինչպես նյութական, այնպես էլ իդեալական գործոնները. մի կողմից՝ կլիման, հողը և ռելիեֆը, մյուս կողմից՝ բարքերը, սովորույթները, կրոնը, օրենքները, կառավարման սկզբունքները. որպես այդ ամենի արդյունք՝ ձևավորվում է ժողովրդի ոգին: Կարևորը խուսափելն է այն ամենից, ինչը կարող է փոխել ազգի ոգին. օրենսդրությունը պետք է հարմապատասխանեցվի ժողովրդի ոգու հետ, որովհետև այդ ոգին չի հակասում կառավարման սկզբունքներին, քանի որ ամենից լավ մարդիկ անում են այն, ինչն անում են ազատորեն և իրենց բնական վիճակին համաձայն:
«Օրենքի ոգին» աշխատության մեջ առանձնակի տեղ է տրվել կառավարման ձևերին: Իշխանությունների տարանջատումը համարվել է իշխանության չարաշահումից խուսափելու միջոց: Իշխանությունների տարանջատումն ու փոխադարձ զսպումը, ըստ Մոնտեսքյոի, քաղաքական ազատության ապահովման գլխավոր պայմանն է՝ պետական կառուցվածքի հետ դրա հարաբերություններում:
Գոյություն ունի կառավարման 3 տեսակ՝ հանրապետական, միապետական և բռնապետական։ Նրանց էությունը բացահայտելու համար բավական է ունենալ այն պատկերացումները, որ ունեն նույնիսկ ամենաքիչ իրազեկված մարդիկ դրանց մասին.
1. Հանրապետական կառավարում: Սա այն է, որի դեպքում գերագույն իշխանությունը գտնվում է կամ ամբողջ ժողովրդի (ժողովրդավարություն) կամ նրա մի մասի ձեռքում (արիստոկրատիա):
2. Միապետական կառավարում: Այս դեպքում սահմանված անփոփոխ օրենքների միջոցով կառավարում է մեկ մարդ՝ ազնվականության հետ միասին, որը կանխում է միապետության վերածվելը բռնապետության,
3. Բռնապետական կառավարման դեպքում ամեն ինչ շարժվում է մեկ անձի կամքով և կամայականությամբ՝ ցանկացած օրենքներից և կանոններից դուրս:
Կառավարման ձևերի սկզբունքները. հանրապետության համար՝ առաքինություն, միապետության համար՝ պատիվ, բռնապետությանի համար՝ վախ։
Ժողովրդավարության հիմնական օրենքներից մեկը օրենքն է, որի ուժով օրենսդիր իշխանությունը պատկանում է միայն ժողովրդին:
Արիստոկրատիայի հիմնական օրենքներն, ըստ Մոնտեսքյոի, սահմանում են ժողովրդի մի մասի իրավունքը՝ ընդունել օրենքներ և հետևել դրանց կատարմանը:
Միապետության դեպքում հիմնական օրենքները սահմանում են «միջնորդավորող կապուղիների գոյությունը, որոնցով շարժվում է իշխանությունը»: Դրանցից գլխավորն ազնվականությունն է (զսպող ուժեր), քանզի առանց դրա միապետը դառնում է բռնապետ:
Մոնտեսքյոն իր աշխատանքում անդրադարձ է արվել նաև անհատական ազատությանը և քաղաքական ազատությանը: Մոնտեսքյոի քաղաքական-իրավական տեսության գլխավոր թեման և նրանում պաշտպանվող հիմնական արժեքը քաղաքական ազատությունն է:
Նա պնդում է անհատական ազատության առաջնահերթությունը՝ հիմնված բնական իրավունքի սկզբունքների վրա.
• Բոլոր մարդիկ հավասար են հանրապետություններում, նրանք հավասար են նաև բռնապետական պետություններում: Առաջին դեպքում նրանք հավասար են, որովհետև նրանք ամեն ինչ են, իսկ երկրորդ դեպքում, որովհետև՝ նրանք ոչինչ են:
Ազատությունն օրենքով թույլատրված ամեն ինչ անելու իրավունքն է: Եթե քաղաքացին կարողանար անել այն, ինչն այդ օրենքներով արգելված է, ապա նա չէր ունենա ազատություն, քանի որ նույն բանը կարող էին անել մյուսները. գլխավորը քաղաքացու անվտանգությունն է:
Մոնտեսքյոն դավանում է քաղաքական լիբերալիզմ՝ համոզմունք, որ անհատներն օրենքի և հասարակության հիմքն են, և որ հանրային ինստիտուտները գոյություն ունեն այն բանի համար, որպեսզի առանց վերնախավերի բարեհաճության նպաստեն իրական իշխանությամբ անհատներին օժտելուն:
Չնայած 300-ամյա վաղեմությանը, արժեր Մոնտեսքյոի որոշ գաղափարների պրիզմայով նայել մեր իրականությանը, նմանապես արժեր, որ յուրաքանչյուր քաղաքացի, հասարակության յուրաքանչյուր խավ ինքնավերլուծություն աներ՝ գուցե արդար, ազատասեր և առաջադեմ մարդկանց թիվը մեծանար: Նժդեհն է ասել, չէ՞, որքան արդար՝ այնքան հզոր է հայրենիքը:
Գագիկ Վարդանյան
Կարծիքներ