Ամեն հարցում ես իմ կարծիքն ունեմ և ուրիշների կարծիքն ինձ առանձնապես չի հետաքրքրում

«Հրապարակի» զրուցակիցը Երևանի ավագանու ընտրություններին «Քաղաքացիական պայմանագիր» կուսակցության ցուցակով առաջադրված ավագանու անդամի թեկնածու, ջազմեն, կոմպոզիտոր, դաշնակահար Վահագն Հայրապետյանն է:

- Պարոն Հայրապետյան, Դուք ևս քաղաքական հայտ եք ներկայացրել: Որոշել եք ՔՊ-ի ցուցակով դառնալ Երևանի ավագանու անդամ: Ինչո՞ւ, ինչպե՞ս որոշեցիք արվեստից զատ նաև քաղաքականությամբ զբաղվել:

- Ես քաղաքականության մեջ չկամ, սխալ բան եք ասում: Ես քաղաքային հայտ եմ ներկայացրել, ոչ թե քաղաքական, դրանք տարբեր են:

- Իսկ դա քաղաքական պրոցես չէ՞:

- Ինձ համար` ոչ:

- Ի՞նչը ստիպեց Ձեզ «քաղաքային հայտ» ներկայացնել` ինչպես Դուք եք ասում:

- Կան բազմաթիվ խնդիրներ: Օրինակ` փողոցային երաժշտության կարգավորում, պաստառների փակցում, նույնիսկ հիմա քայլում ես փողոցով ու տեսնում ես պատերին տարատեսակ պաստառներ են փակցրել` անկապ պաստառներ: Երաժիշտները փողոցում հինգ սանտիմետրի վրա տասը տեսակ երաժշտություն են հնչեցնում: Դա խնդիր չէ՞, հենց մշակութային խնդիր է: Քաղաքական եք ասում, բայց տեսեք, դրանք քաղաքային խնդիրներ են` մշակույթին առնչվող: Պետք է ամեն ինչ այդ կոնտեքստում կարգավորել, որ հայ երաժիշտները մուրացկան չլինեն մշակութային քաղաքում:

- Ի՞նչ նկատի ունեք մուրացկան ասելով:

- Չեք տեսնում, գուցե մուրացկան չեն, բայց այդ տեսքն ունեն, կարելի է այնպես անել, որ նորմալ երաժշտություն հնչի փողոցներում: Օրինակ` Հյուսիսային պողոտայում տեսնո՞ւմ եք ինչ է կատարվում: Մի սանտիմետրի վրա ջութակահարը Մոցարտ է նվագում, կողքից էլ դհոլ ու կլառնետ են նվագում…. Ես դեմ չեմ երաժշտությանը, բայց գոնե բարձրանա այդ երաժշտության որակը:

- Ինչպե՞ս եք պատկերացնում այդ հարցի լուծումը: Ի՞նչ պետք է անեք այդ ուղղությամբ:

- Ցիվիլ քաղաքաներում դրա համար ժամեր ու տեղեր գոյություն ունեն: Երաժիշտները պետք է նախ լիցենզավորվեն, իրավունք ստանան, որպեսզի կարողանան երգել ու նվագել: Այդ հարցը կարգավորելու միլիոն ու մի ձև կա: Կարող են այդ խմբերը ձայնագրություն ներկայացնել նախ, հետո որոշվի հետագան: Գուցե այլ խմբեր հայտնվեն, հայտ ներկայացնեն: Երևանում այսքան նոր այգիներ են բացվել, այդ այգիներում էլ կարող են մատուցել հետաքրքիր երաժշտություն: Գուցե գտնվեն այլ երաժիշտներ, որոնք արտահայտվելու և գումար աշխատելու այլ տեղ չունեն և հենց այդտեղ համերգներով հանդես գան և ոչ թե փող ուզող երաժիշտներ լինեն, այլ կոնկրետ մշակույթ ներկայացնեն, լինեն երիտասարդության միտքն ու խոսքն ասող երաժիշտներ: Գուցե մի նոր խումբ է ստեղծվում և քաղաքապետարանն էլ հովանավոր է լինում: Եթե արտիստ լինեն, այլ ոչ թե փողոցում փող ուզող, այլ կլինի: Փողոցում նվագելն ու երգելը վատ բան չէ, վատ է, երբ վատ են անում դա, շատ վատ:

- Ինչպե՞ս եք որոշելու ով է լավ նվագում, ով վատ: Դատավորի դե՞ր եք ստանձնելու:

- Պետք է երևա: Եթե մարդը երգացանկ ներկայացնի, ամեն ինչ էլ կտեսնենք, կհասկանանք: Ամեն դուդուկ ունեցող չէ, որ դուդուկահար է: Չի կարելի օրը ութ ժամ նույն բանը նվագել:

- Լավ, իսկ չե՞ք վախենում ասոցացվել մի իշխանության հետ, որին մեղադրում են Արցախը հանձնելու, պատերազմ պարտվելու, երկիրը կործանելու մեջ:

- Իրենք են առաջարկել:

- Օրինակ, եթե Մանե Թանդիլյանը, կամ Հայկ Մարությանն առաջարկեին, կհամաձայնեի՞ք:

- Չեն առաջարկել:

- Եթե ՔՊ-ի ցուցակով եք մասնակցում, նշանակում է` համակրում եք ՔՊ-ականներին:

- Այո, չեմ թաքցնում, համակրում եմ: Վատ բան չկա այդտեղ: Ամեն մեկն էլ կարող է համակրել ինչ-որ ուժի:

- Մտավախություն չունե՞ք, որ արվեստը զոհ կգնա քաղաքականությանը:

- Ինչո՞ւ պետք է զոհ գնա: Ես հո կուսակցական չեմ:

- Բայց ՔՊ-ի ցուցակով եք ավագանի որոշել դառնալ, ՔՊ-ի հետ եք պայքարի դուրս եկել:

- Ընտրությունների եմ գնում ուղղակի: Կարող են ասոցացնել ինձ ՔՊ-ի հետ: Վա՞տ բան եմ անում: Ես հասուն մարդ եմ, ամեն հարցում իմ կարծիքն ունեմ և ուրիշների կարծիքն ինձ առանձնապես չի հետաքրքրում:

- Նիկոլ Փաշինյանին մեղադրանքներ են ուղղում, ասում են, որ նա Արցախն է հանձնել, հիմա էլ Հայաստանն է կործանում:

- Ես չեմ կարող այլևս խոսել: Խնդրում եմ Ձեզ: