«Գրած է՝ հափշտակե՞լ․ ես ի՞նչ իմանամ՝ ինչ եմ հափշտակել»․ Սեյրան Օհանյանը՝ դատախազության միջնորդության մասին 

Այս օրերին, երբ հանրությունը պահանջում է պատասխանատվության ենթարկել պաշտպանության գործող նախարար Սուրեն Պապիկյանին՝ զինվորական կացարանում բռնկված հրդեի հետևանքով 15 զինծառայողի մահվան համար, Հայաստանի գլխավոր դատախազ Աննա Վարդապետյանը որոշում է միջնորդություն ներկայացնել ԱԺ նախագահին, որպեսզի ստանա խորհրդարանի համաձայնությունը ՝ քրեական հետապնդում սկսելու պաշտպանության նախկին նախարարի, այժմ՝ ԱԺ «Հայաստան» խմբակցության ղեկավար Սեյրան Օհանյանի նկատմամբ։

Դրա վերաբերյալ հաղորդագրությունը քիչ առաջ տարածեց դատախազությունը։ Ըստ այդ հաղորդագրության՝ Սեյրան Օհանյանն անցնում է երեք քրեական վարույթով, որոնցով ձեռք բերված փաստական տվյալների համաձայն՝ ՀՀ պաշտպանության նախկին նախարարը, օգտագործելով պաշտոնեական դիրքը, կատարել է առանձնապես խոշոր չափերով վատնում, պաշտոնեական դիրքն օգտագործել է ծառայության շահերին հակառակ, ինչպես նաև վատնելու եղանակով հափշտակել է առանձնապես խոշոր չափերի գույք։

Hraparak.am-ը կապ հաստատեց Սեյրան Օհանյանի հետ, ով առաջինը մեզանից տեղեկացավ դատախազության միջնորդության մասին։

«Ես տեղեկություն չունեմ, չգիտեմ՝ որ գործով է․․․ իրենք իրենց դեմքն են ցույց տալիս դրանով»,-ասաց Օհանյանը՝ հավելելով, որ ոչ մի գործով իրեն ոչ մի քննիչ չի ասել, որ կարող են իրեն մեղադրանք առաջադրել։

«Եթե իրենք բարոյական լինեին, ինչ-որ մեկը կասեր, չէ՞, որ, այ, էս գործով ուզում ենք Ձեզ մեղադրանք առաջադրել։ Էդպե՞ս չի լինում։ Եթե բոլոր քրեական գործերով, վարույթներով ես պարտաճանաչ գնացել եմ, ի՞նչ խնդիր կա»,-ասաց նա։

Երբ թվարկեցինք երեք վարույթներով դատախազության ձեռք բերված «փաստական տվյալները», համաձայն որոնց՝ ինքն իբրև թե կատարել է առանձնապես խոշոր չափերի վատնում և առանձնապես խոշոր չափերի գույք է հափշտակել, Օհանյանը զարմացավ․ «Հափշտակե՞լ եմ, գրած է՝ հափշտակե՞լ»։

Հարցրինք՝ այդ ի՞նչ է «հափշտակել», որ դատախազությունն այդպիսի պնդում է արել, նախկին նախարարն արձագանքեց․ «Ես ի՞նչ իմանամ՝ ինչ եմ հափշտակել։ Չգիտեմ, չեմ իմանում»։

Սեյրան Օհանյանն ասաց, որ հարցաքննությունների ժամանակ իր ենթադրյալ հափշտակությունների մասին ոչինչ չեն տեղեկացրել։