Եթե պետությունը մահկանացու է, ապա կոռուպցիան ինչու՞ պետք է լինի անմահ
Խորհրդային տարիներին բուհերում դասավանդվում էր «Գիտական կոմունիզմ» առարկան: Նրանում մի բաժին կար, որտեղ նկարագրվում էր, թե պետությունն ինչու է մահանալու: Եզրույթը ծագել է Ֆրիդրիխ Էնգելսի «Անտի-Դյուրինգ» աշխատությունից (1878). «Պետությունը ողջ հասարակության պաշտոնական ներկայացուցիչն էր, այն նրան միավորում էր մեկ տեսանելի կազմակերպության մեջ, բայց այդ դերը կատարում էր այնքանով, որքանով որ կար այն։
Դասակարգի պետությունը, որն ինքնին ներկայացնում էր նրա ողջ ժամանակակից հասարակությունը. հնագույն ժամանակներում՝ քաղաքացի-ստրկատերերի պետություն, միջնադարում՝ ֆեոդալական ազնվականության, մեր ժամանակներում՝ բուրժուազիայի։ Վերջապես դառնալով ողջ հասարակության իրական ներկայացուցիչը՝ դա կդառնա ավելորդ։ Երբ չեն լինի սոցիալական դասակարգեր, որոնց պետք է ենթարկեցնել, երբ չկա մի դասակարգի գերիշխանություն մյուսի նկատմամբ և գոյության պայքար, ժամանակակից անարխիայի մեջ արմատավորված արտադրություններ, երբ վերացված են այստեղից բխող բախումները և բռնությունները, այդ ժամանակ ոչ մեկին անհրաժեշտ չի լինի ճնշել և զսպել, այդ ժամանակ կվերանա այդ գործառույթն իրականացնող պետական իշխանության անհրաժեշտությունը:
Առաջին արարը, որում պետությունը հանդես կգա որպես ամբողջ հասարակության ներկայացուցիչ, արտադրության միջոցները հանրային սեփականության վերափոխելն է, կլինի նրա վերջին ինքնուրույն գործողությունը՝ որպես պետություն: Պետական իշխանության միջամտությունը հասարակական հարաբերություններին, կամաց-կամաց կդառնա ավելորդ և ինքն իրեն կվերանա: Անհատների կառավարմանը կփոխարինի իրերի կառավարումը և արտադրական գործընթացների ղեկավարումը: Պետութույնը չի վերացվում, այն մեռնում է» (Энгельс Ф. Анти-Дюринг):
Իսկ մեր վարչապետ Նիկոլ Վովայի Փաշինյանն ասում է. «ՀՀ-ում իշխանությունը չի կարող փոխվել, որովհետև այն 2018-ից պատկանում է ժողովրդին»:
Այսինքն, Էնգելսի խոսքերով ասած, 2018 թվականից պետությունը դարձել է ողջ հասարակության իրական ներկայացուցիչը: Պետական իշխանության միջամտությունը հասարակական հարաբերություններին, արդեն 4 տարի անց պետք է որ դարձած լիներ ավելորդ և ինքն իրեն վերանար: Հա, մի բան է կիսատ մնացել, պետության վերացման առաջին արարը սեփականատերերի սեփականազրկումն է՝ սկսած գյուղացիական տնտեսության հավ ու ճիվից, մի լավաշաչափ հողակտորից մինչև օլիգարխների և ոչ այնքան օլիգարխների ունեցվածքը:
Բայց ինչ-որ բան այնպես չի ստացվում: Եթե ազգային ամբողջ հարստությունը պատկանում է բոլորին, ապա այդ դեպքում ով ում հետ կոռուպցիոն գործարքի մեջ կարող է մտնել: Առավելևս, որ մոտ օրերս պետությունն էլ կմեռնի: Այսինքն՝ չինովնիկ էլ չի մնա որ մի կոռուպցիոն գործ «կպցնի»: Բայց, կներեք, 2018 թվականից ի վեր կոռուպցիա եղե՞լ է: Ոչ, իհարկե: Բա էդ կոմիտեն ինչու՞ են ստեղծել, փողերն ինչու՞ են քամուն տալիս, փոխարենը բաժանեն հասարակությանը:
Հ.Գ. Ողբալի վիճակում հայտնված երկրում ինչպես կարելի է շռայլություններ անել: Տեղին է հիշել «կապիտալիստ» տնտեսագետներ Քեմփբել Մաքքոնելի և Ստենլի Բրյույի դասագրքում տեղ գտած հետևյալ դրույթը կամ, ինչպես ասում են՝ դասագրքային ճշմարտությունը. «Եկամուտների արդարացի բաշխում. Քաղաքացիների և ոչ մի խումբ չպետք է գտնվի ծայրահեղ աղքատության մեջ, երբ մյուս քաղաքացիները լողում են շքեղության մեջ» (էջ 24):
Ի դեպ, ի՞նչ եղավ այն ուսուցիչը, որի աչքերին ինչ-որ մեկը չէր կարողանում նայել, ամոթից: Ի դեպ, չինովնիկը, լինի դատախազ, թե հարկայինի տեսուչ կամ նախարարության ինչ-որ աշխատակից, չի կարող իրեն թույլ տալ շռայլություններ, որոնք կարող են անել հաջողակ ձեռնարկատերերը: Թող չինովնիկները պատեպատ չխփվեն. դա եղել է իրենց ընտրությունը, եթե, անշուշտ, կոռուպցիայի, կաշառակերության, դրամաշորթության ակնկալիքով չեն անցել պետական ծառայության:
Գագիկ Վարդանյան
Կարծիքներ