Որակյալ դատական իշխանություն ունենալու համար անհրաժեշտ են հեղափոխական լուծումներ․ Սերգեյ Մեղրյան

ԲԴԽ նախկին անդամ, ԵՊՀ դասախոս Սերգեյ Մեղրյանը գրել է․

«Բարեվարքությամբ աչքի ընկնող, իրոք անկախ, հանրության առջև հաշվետու և որակյալ դատական իշխանություն ունենալու համար

ԱՆՀՐԱԺԵՇՏ ԵՆ ՀԵՂԱՓՈԽԱԿԱՆ ԼՈՒԾՈՒՄՆԵՐ

Դատական օրենսգրքում փոփոխությունների փաթեթով առաջարկվող բարեվարքության ստուգման գործիքակազմի ներդրմանը զուգահեռ «անհետաձգելի ռեժիմով» հարկ է ապահովել՝

- ԼՐՋԱԳՈՒՅՆ ԹՎԱՅՆԱՑՈՒՄ դատարանների և դատական գործերի կառավարման, դատավարական գործընթացների, դատական գործավարության, փաստաթղթաշրջանառության, տվյալների մշակման և արխիվացման ոլորտներում: Համամիտ եմ Խորհրդի անդամ Հայկ Հովհաննիսյանի հետ, որ ժամանակակից տեխնոլոգիաների առկայության պայմաններում նախորդ երկու դարերին բնորոշ այլևս անարդյունավետ, ժամանակատար և ծախսատար մեթոդներից հարկավոր է ի սպառ հրաժարվել՝ հատկապես հաշվի առնելով այդ նպատակով ընդամեն մի 20 «Կամազի» չափով ներդրում անելու անհրաժեշտությունը:

- ԱՏԱՐԱՆՆԵՐԻ ԵՎ ԴԱՏԱՎՈՐՆԵՐԻ ԳՈՐԾՈՒՆԵՈՒԹՅԱՆ ԱՄԵՆՕՐՅԱ ՄՇՏԱԴԻՏԱՐԿՄԱՆ ՀԱՄԱԿԱՐԳԻ ՆԵՐԴՐՈՒՄ: Այս հարցում էլ համամիտ եմ խորհրդի նախկին նախագահ Գագիկ Հարությունյանի հետ. առանց նման համակարգի չի կարող լինել արդյունավետ կորպորատիվ և հանրային վերասկողություն ու հաշվետվողականություն: Ու՞մ է ձեռնտու դատական իշխանության «անտեսանելիությունը»...

- ԴԱՏԱԿԱՆ ՕՐԵՆՍԳՐՔՈՎ ՆԱԽԱՏԵՍՎԱԾ ԱՌԱՆՑՔԱՅԻՆ ԻՐԱՎԱԿԱՆ ԱԿՏԵՐԻ ՄՇԱԿՈՒՄ ԵՎ ԸՆԴՈՒՆՈՒՄ: Օր առաջ պետք է ընդունվեն՝
ա. Դատավորների գործունեության պերմանենտ գնահատման կարգը,
բ. Դատավորի աշխատանքային ծանրաբեռնվածության չափորոշիչները և այն հաշվարկելու կարգը,
գ. Գործերի քննության միջին տևողության ուղենիշային ժամկետները՝ ըստ գործերի առանձին տեսակների և բարդության,
դ. Դատավորների միջև գործերի հավասարաչափ բաշխման չափանիշները՝ ըստ գործերի առանձին տեսակների և բարդության,
ե. Դատարանների գործավարության նոր կանոնները (ներառյալ՝ դատարան էլեկտրոնայաին և այլ եղանակներով փաստաթղթերի հանձնման կարգը):

Թեև նշված ակտերի ընդունումը ԲԴԽ լիազորությունների շրջանակում է, այն գրեթե անիրագործելի է առանց նախորդ երկու կետերում նշված գործիքակազմի, առանց օրենսդիր և գործադիր իշխանության ակտիվ օժանդակության, քանի որ արդյունավետ մեխանիզմներ ունենալու համար անհրաժեշտ են թիրախավորված ներդրումներ և լրջագույն գործնական աջակցություն (ակնկալվում էր, որ Խորհրդի թարմացված կազմը կստանա նման աջակցություն, սակայն Պետբյուջեի նախագիծը և դատաիրավական բարեփոխումների կապակցությամբ ծավալվող ներկայիս քննարկումները, ցավոք, այլ բանի մասին են վկայում):

- ԴԱՏԱՎՈՐՆԵՐԻ ԵՎ ՆՐԱՆՑ ՕԳՆԱԿԱՆՆԵՐԻ ԹՎԻ ԶԳԱԼԻ ԱՎԵԼԱՑՈՒՄ բոլոր ատյաններում: Ժողովու՛րդ, դատավորի ծանրաբեռնվածությունն ԱՆՄԱՐԴԿԱՅԻՆ է, այն բացառում է արագ, որակյալ և դատական սխալներից զերծ արդարադատությունը, ինչպես նաև հարակից պարտականությունների (գործավարություն, վերապատրաստում և այլն) պատշաճ կատարումը: Այստեղ են ասել. «Ի՞նչ ենք տվել և ի՞նչ ենք պահանջում… »:

- ԴԱՏԱՎՈՐՆԵՐԻ ԵՎ ՆՐԱՆՑ ՕԳՆԱԿԱՆՆԵՐԻ ԱՇԽԱՏԱՆՔԻ ՎԱՐՁԱՏՐՈՒԹՅԱՆ ՀԱՄԱԿԱՐԳԻ ԽՈՐՔԱՅԻՆ ՎԵՐԱՆԱՅՈՒՄ: Առանց դրա կոռուպցիան դատական համակարգում լայն իմաստով չի վերանալու. կփոխվեն միայն դրա դրսևորումները…

- ԴԱՏԱՐԱՆՆԵՐԻ ՆՅՈՒԹԱՏԵԽՆԻԿԱԿԱՆ ԱՊԱՀՈՎՄԱՆ ԵՎ ՇԵՆՔԵՐԻ ԸՆԹԱՑԻԿ ՍՊԱՍԱՐԿՄԱՆ ԿԱՌՈՒՑԱԿԱՐԳԵՐԻ ԱՐՄԱՏԱԿԱՆ ԲԱՐԵՓՈԽՈՒՄ: Ի՞նչ ակնկալել այն դատարանից, որի նախագահն ու դատավորները տարրական գրասենյակային և այլ ներդատարանական խնդիրները հաճախ ստիպված են լուծելու «իրենց հաշվին», քանի որ պետական գնումների համակարգի «դանդաղաշարժությունը» բացառում է նման հարցերի օպերատիվ լուծումը: Դիցուկ մեկ վառ օրինակ՝ արդեն երկրորդ ձմեռն է, ինչ չի լուծվում Բարձրագույն դատական խորհրդի շենքի ջեռուցման հարցը:

Շարունակելի...