Սա նրանց հարցը չի՝ սա պետական հարց է․ Արմեն Բաղդասարյան
Ադրբեջանի ռազմական դատախազության հատուկ հետաքննությունների բաժնի ղեկավար Էմիլ Թաղիևը վերջերս լրատվամիջոցներին տված հարցազրույցի ժամանակ ասել էր, որ հետախուզում է հայտարարվել Հայաստանի նախկին նախագահներ Ռոբերտ Քոչարյանի և Սերժ Սարգսյանի հանդեպ։ Ադրբեջանցի դատախազի խոսքով՝ Քոչարյանն ու Սարգսյանը հետախուզվում են 1988 թվականից ծավալած գործունեության համար՝
«1991 թվականի սեպտեմբերի 2-ին հռչակել են Լեռնային Ղարաբաղի հանրապետությունը, Շահումյանի շրջանը անօրինականորեն կցել են Լեռնային Ղարաբաղին, այդ տարածքներում ադրբեջանական օրենքների և Ադրբեջանի Սահմանադրության գործողության դադարեցման անօրինական որոշում են կայացրել»։
Թեմայի շուրջ «Հրապարակը» զրուցել է քաղաքագետ Արմեն Բաղդասարյանի հետ։
«Երբ Ադրբեջանը միջազգային հետախուզում է հայտարարում Ռոբերտ Քոչարյանի և Սերժ Սարգսյանի նկատմամբ, պետք չի դա Հայաստանում ընկալել ներքաղաքական իրադարձությունների համատեքստում, այլ՝ իրականում Ադրբեջանը հետախուզում է հայտարարում Հայաստանի երկրորդ և երրորդ նախագահների նկատմամբ։ Անկախ մեր վերաբերմունքից, անկախ նրանից, թե ով ինչպես է վերաբերվում նախագահներին, սա պետական հարց է, և Հայաստանի իշխանությունները պիտի պետականորեն շատ արագ և շատ կոշտ արձագանքեն սրան»,- մեզ հետ զրույցում ասաց Արմեն Բաղդասարյանը։ Քաղաքագետը գտնում է, որ միջազգային բոլոր ատյաններում հնարավոր բոլոր լծակներով սրա դեմն առնել։
«Շատ կարևոր է, թե գործող իշխանություններն ի՞նչպես են վերաբերվում Ռոբերտ Քոչարյանին և Սերժ Սարգսյանին, որովհետև եթե դա տեղի չի ունենում, ստացվում է, որ իսկապես արցախյան պատերազմի ժամանակ հայկական կողմը ռազմական գործողություններ է կատարել։ Որովհետև այդ հոդվածներով էլ հենց ադրբեջանցիները քրեական գործեր են հարուցել»,- ասաց Արմեն Բաղդասարյանը։ Քաղաքագետը, գտնում է, որ սա այն եզակի հարցերից է, որ բոլորը պիտի ներքաղաքական տարաձայնությունները, անձնական հարաբերությունները մի կողմ դնեն և փորձեն կասեցնել դա։
«Շատ կարևոր և վտանգավոր զարգացումներ կարող են ունենալ, առավել ևս, որ Ադրբեջանը մտադիր է նաև ռազմական հանցագործություններից մի կողմ, հետագայում նաև փոխհատուցման հարց բարձրացնել միջազգային ատյաններում։ Չի կարելի սա ականջի ետև գցել, համարել, որ տեղն է Ռոբերտ Քոչարյանին և Սերժ Սարգսյանին, ոչ դա այդպես չի։ Սա նրանց հարցը չի։ Սա պետական հարց է և պետական մակարդակով իշխանությունները սրան պետք է հակազդեն»,- ասաց քաղաքագետը։
Կարծիքներ