«Արմավիր» քրեակատարողական հիմնարկում վարչական «շմոն» են սկսել
Քիչ առաջ մեր կայքում հրապարակել էինք, թե ինչ ապօրինություններ են տեղի ունենում «Արմավիր» քրեակատարողական հիմնարկի 6-րդ մասնաշենքում։ Դրանք դրդում են դատապարտյալներին ինքնավնասման։
Փոխանակ թերությունները վերացնելու, քրեակատարողական հիմնարկի ղեկավարությունը անմիջապես վարչական խուզարկություններ է սկսել 6-րդ կորպուսում, տեղեկատվական արտահոսքը կանխելու նպատակով։ Փաստորեն, կալանավայրի ղեկավարությունը չի հավատացել մեր պնդմանը, որ տվյալները ստացել ենք բացառապես դատապարտյալների հարազատներից և որոշել է աղբյուրներ բացահայտել։
Այս պահին «Արմավիր» քրեակատարողաակն հիմնարկի աշխատողները մտնում են դատապարտյալների խցերը և «շմոն» են անում՝ բջջային հեռախոսներ փնտրելով։ Նաև դատապարտյալների միջև ընդհարումներ են տեղի ունենում, որոնք, ըստ մեր աղբյուրների, կրկին հիմնարկի ղեկավար Տիգրան Նավասարդյանն է կազմակերպում։ Այսպես նա պայքարում է այն դատապարտյալների դեմ, որոնք հանդգնում են պաշտպանել իրենց իրավունքները։
Հիշեցնենք, որ մի քանի ժամ առաջ հայտնել էինք, որ 6-րդ մասնաշենքի պատասխանատու Ռոման Հակոբյանն այնպիսի դաժան վերաբերմունք է ցուցաբերում դատապարտյալների նկատմամբ, որ նրանք ինքնավնասումներ են կատարում, ձգտելով այլ մասնաշենքեր տեղափոխվել։
Սյուզան Սիմոնյան
Լուսանկարը ՝ Արմավիր քրեակատարողական հիմնարկի
Կարծիքներ