Պատմվածք գեյի մասին (33-րդ մաս)
![կին տղամարդ](/images/2012/02/ist1_7147812-angry-woman-e1329669553770-400x282.jpg)
- Արամ, դու երեւի չափից շատ ես խմել,- կարդալուց հետո արձագանքեց Անին:
- Չէ, ես չեմ խաբում, առաջին անգամ լիովին անկեղծ եմ քեզ հետ, ինչ որ այդտեղ գրված է, ճշմարտություն է:
- Ինչպե՞ս դու կարող ես գեյ լինել, եթե ինձ ես սիրում:
- Ես քեզ սիրում եմ, շատ եմ սիրում, բայց որպես մտերիմ ընկեր, հարազատ անձնավորություն, այլ ոչ որպես աղջիկ: Ես տղայի եմ սիրում:
- Արամ, եթե փոշմանել ես, որ ինձ հետ ես, եթե հասկացել ես, որ ինձ չես սիրում, ուրեմն այդպես էլ ասա, իզուր տեղը գեյ մի ձեւացիր: Այդպես դու քեզ ես խայտառակում:
- Դու էլ ես կարծո՞ւմ, որ գեյ լինելը խայտառակություն է:
- Ես ոչինչ էլ չեմ կարծում, ինձ համար ամեն ինչ հասկանալի է, դու ուզում ես ազատվել ինձնից եւ ստոր ճանապարհ ես ընտրել դրա համար: Համարձակություն չունե՞ս ինձ ճշմարտությունն ասելու:
- Ճիշտ հակառակը՝ վերջապես համարձակությունս հերիքեց, եւ ես ասացի քեզ, սակայն դու ինձ չես հավատում: Այսքան ժամանակ քեզ խաբում էի, բայց դու հավատում էիր, իսկ հիմա...
- Ինչո՞ւ էիր ինձ խաբում: Եթե դու գեյ ես, ի՞նչ գործ ունես ինձ հետ:
- Մենք հասանք այն կետին, որից հետո դու կատես ինձ: Հիշո՞ւմ ես, ես քեզ հաճախ էի ասում, որ դու ինձ կատես, երբ ճշմարտությունն իմանաս, իսկ դու խոստացար, որ ցանկացած դեպքում կաջակցես ինձ: Բայց ես քեզանից աջակցություն չեմ ակնկալում, որովհետեւ ես ինքս էլ չէի կարող ներել:
- Նորից այդ խորհրդավոր խոսակցությունը, բացատրիր, թե ինչ է կատարվում:
- Կատարվել է այն, որ ես այսքան ժամանակ քեզ խաբել եմ, քեզ օգտագործել եմ հասարակությունից թաքնվելու համար, ես վախկոտ անձնավորություն եմ, տղամարդ կոչվելու իրավունք չունեմ:
- Ինչպե՞ս ես ինձ օգտագործել:
Արամը չկարողացավ անմիջապես պատասխանել:
- Մի լռիր, ասա՝ ինչո՞ւ ինձ սիրո խոստովանություն արեցիր:
- Որովհետեւ ես գիտեի, որ անտարբեր չես իմ նկատմամբ, քեզ հետ սկսեցի ընկերություն անել, որպեսզի մարդիկ չկասկածեն իմ սեռական կողմնորոշման վրա: Դու ինձ համար վարագույր էիր՝ մարդկանցից պաշտպանվելու համար:
Անիի աչքերն արցունքոտվեցին. վերջապես նա ստացավ բոլոր այն հարցերի պատասխանները, որոնք հաճախ տալիս էր ինքն իրեն: Առաջին զգացողությունը, որ նա ունեցավ, ցավն էր՝ ցավ, որ այլեւս ընդմիշտ կորցրեց իր սիրած տղային: Եթե Արամն անտարբեր լիներ իր նկատմամբ, ուրիշ աղջկա սիրեր, հնարավոր կլիներ նվաճել նրա սիրտը: Իսկ այսպես... Հետո Անին մտածեց, թե որքան ստոր է Արամը վարվել իր հետ, բայց չչարացավ, որովհետեւ սկսել էր խղճալ տղային: Անին լավ գիտի, թե որքան են տանջվում միասեռականները հայ իրականության մեջ:
շարունակելի
Կարծիքներ