Ով վերջինն է՝ կլինի՞ առաջինը

Արցախի ժողովրդավարական կուսակցությունը Կենտրոնական խորհրդի նիստ է գումարել, որտեղ որոշում է ընդունվել աշնանը ՏԻՄ, եկող տարվա գարնանը՝ նախագահական եւ խորհրդարանական ընտրություններին մասնակցելու մասին: Ընդունվել է բանաձեւ, ըստ որի կուսակցության տեղական եւ տարածքային կառույցներին հանձնարարվել է անցկացնել հաշվետվություններ ընթացիկ աշխատանքների եւ ռեսուրսների մասին, ինչպես նաեւ հանրության լայն շերտերի մասնակցությամբ կազմակերպել երկրի զարգացման տեսլականի, տարբեր ոլորտներում առկա խնդիրների եւ դրանց լուծման հնարավորությունների վերաբերյալ քննարկումներ: Նույն օրը կուսակցության խոորհրդարանական խմբակցության ղեկավար Վարդգես Բաղրյանն ասել է, որ նախագահի թեկնածու, ամենայն հավանականությամբ, կառաջադրվի գործող Ազգային ժողովի նախագահ Աշոտ Ղուլյանը:

Հարցին վերջնական լուծում կտա աշնանը գումարվելիք կուսակցական համագումարը: Ըստ Բաղրյանի՝ կուսակցությունն ունի իր էլեկտորատը: Խնդիրն այն է, որ ԱԺԿ-ն, 2010թ. խորհրդարանական ընտրություններից սկսած, միայն հետընթաց է ունեցել: Խորհրդարանական նախորդ ընտրություններում կուսակցությունը զբաղեցրել է երրորդ հորիզոնականը՝ առջեւում թողնելով Ազատ հայրենիքին եւ ՀՅԴ տեղական կառույցին: Ճիշտ է, Ստեփանակերտի գործող քաղաքապետ Սուրեն Գրիգորյանը կուսակցության Կենտրոնական խորհրդի անդամ է, բայց այդ պաշտոնում նա ընտրվել է ավելի շատ ներքին համաձայնության, քան ԱԺԿ քաղաքական աջակցության շնորհիվ: ՏԻՄ ընտրություններից վեց ամիս եւ նախագահական մրցապայքարից մեկ տարի առաջ կուսակցական «գույքագրում» անցկացնելու որոշումը թույլ է տալիս եզրակացնել, որ Արցախի ժողովրդավարական կուսակցությունը փորձում է հանրային որոշակի աջակցության հասնել: Ի՞նչ քայլեր կձեռնարկվեն այդ ուղղությամբ՝ պարզ կլինի առաջիկայում:

Արցախում այլ քաղաքական ուժեր նույնպես ինքնադրսեւորման նոր հնարավորություններ են փնտրում: Խնդիրն այն է, սակայն, որ ԱԺԿ-ի վերջին տասնամյակի ընտրական անհաջողությունները զգալիորեն թուլացրել են կուսակցության տարածքային եւ տեղական կառույցները: Երբեմնի առաջատար քաղաքական ուժը ներկայումս գրեթե մարգինալացած է: Եւ նրա գործունեությանը նոր լիցք հաղորդելու համար, ամենայն հավանականությամբ, հարկ կլինի մեծ ջանքեր եւ ռեսուրսներ ծախսել: Այդ հարցում ԱԺԿ-ն ունի՞ արտաքին ազդակ: Համենայն դեպս, առանց ստույգ հաշվարկների կուսակցությունը հազիվ թե որոշեր առաջադրել նախագահի սեփական թեկնածուի: