Երկու օր է խորհրդարանում բուռն քննարկվում է ՄԻՊ տարեկան զեկույցը: Ընդդիմությունն իր վրդովմունքն է հայտնում, որ Մարդու իրավունքների պաշտպան Անահիտ Մանասյանը չի արձագանքում Հայաստանում մարդու իրավունքների խախտման դեպքերին եւ հիմնականում իշխանության «գծի» մեջ է: Ոչ թե ՄԻՊ է, այլ ՆԻՊ՝ Նիկոլ Փաշինյանի պաշտպան: ՔՊ-ական պատգամավորներն էլ շնորհակալությունների շքերթ են ցուցադրում՝ իրենց գոհունակությունը հայտնելով պաշտպանից, ինքը՝ Մանասյանը խորհրդարանի բարձր ամբիոնից հակադարձում էր, որ եղել է անաչառ, այլ հարց է, որ չի ուզում «պոպուլյար» ՄԻՊ դառնալ։
Այսօր խորհրդարանի նիստերի դահլիճում Անահիտ Մանասյանի անաչառության, օբյեկտիվության աստիճանի ցուցադրության լավագույն ստուգարքը կազմակերպեց հենց ՔՊ-ն՝ Արթուր Հովհաննիսյանի կատարմամբ։ Պատգամավորը խորհրդարանի բարձր ամբիոնից ամենաեղկելի վիրավորական արտահայտություններն արեց Վազգեն Մանուկյանի հասցեին՝ հիշելով «Դիմադրության» շարժումը, հայտարարեց, թե ընդդիմադիրները ամեն երեկո «խորոված-քյաբաբով Վազգեն Մանուկյանի օղորմաթասն էին խմում»։ ՄԻՊ-ը ոչ միայն անվրդով լսում էր իշխանականի ելույթը, այլ իր եզրափակիչ ելույթում հարկ չհամարեց արձանագրել, որ քաղաքական հայացքներով պայմանավորված ատելության քարոզ է իրականացվում հենց իշխանական պատգամավորի կողմից եւ հենց խորհրդարանում, մինչդեռ իր խոսքի մի մեծ մասը նա, որպես կանոն, նվիրում է ատելության խոսքի դատապարտմանը։
Քննարկումից հետո Անահիտ Մանասյանին հարցրեցինք՝ արդյոք իր մանդատը չէ՞ր պահանջում արձագանքել ՔՊ-ականի ելույթին, ճիշտ ժամանակը չէ՞ր գործով ցույց տալու իր անաչառությունը, թե՞ կաշկանդվեց ՔՊ-ականների ներկայությունից, սակայն նա անհոդաբաշխ բառակույտով նախ փորձեց խոսակցությունը տանել այլ տեղ, թե ձեր լրատվամիջոցն էլ ինձ է պարբերաբար քննադատում: Նրան հիշեցրեցինք, որ քննադատելը հենց մեր գործն է, իսկ իր գործն էլ յուրաքանչյուր անձի խախտված իրավունքներն արձանագրելն է եւ դրանց վերականգնման համար պայքարելը, ինչն այս պարագայում չարեց, ՄԻՊ-ը երկչոտ պատասխան տվեց. «Ես ամեն դեպքով չեմ արձագանքում, որովհետեւ այնքան շատ են այդ դեպքերը, որ․․․Իրականում գաղափարը հետեւյալն է ատելության խոսքի եւ անհանդուրժողականության վերաբերյալ ես բնականաբար խոսում եմ անընդհատ եւ կոնկրետ դեպքեր եմ հասցեավորում, այստեղ էլ ես հատուկ կարեւորեցի ժողովրդական բանավեճի դիտանկյունը այս ամբիոնում»։
