Էջմիածնում բողոքի ակցիաները շարունակվում են. պահանջում են կալանավորել Մանվել Գրիգորյանին
Էջմիածնում արդեն մի քանի օր է՝ բողոքի ակցիաներ են՝ ընդդեմ ԵԿՄ նախկին նախագահ Մանվել Գրիգորյանի ազատ արձակման: Ինչպես արդեն տեղեկացրել էինք, երեկ մի քանի տասնյակ երիտասարդներ փակել էին Էջմիածին քաղաքի փողոցները, Երևան-Արմավիր մայրուղին եւ պահանջում էին Մանվել Գրիգորյանին կրկին կալանավորել:
Այսօր նույնպես բողոքի ակցիան շարունակվում է: Երիտասարդները դուրս են եկել փողոց՝ կրկնելով պահանջը: Ակցիայի մասնակիցներից մեկը մեզ հետ զրույցում ասաց. «Պայքարելու ենք մինչև վերջ, դատարանը անարդար որոշում է կայացրել, ու դա չենք հանդուրժելու: Եթե ոմանց ձեռնտու է, որ Էջմիածինն էսպես սոդոմ- գոմորի վերածեն, թող վերածեն»: Երիտասարդի խոսքերով, ամենօրյա ակցիաները չեն դադարելու:
Հիշեցնենք, որ դեկտեմբերի 21-ին Երեւանի ընդհանուր իրավասության դատարանը բավարարել էր պաշտպանական կողմի միջնորդությունը՝ 25 միլիոն դրամ գրավով նրան ազատ արձակելով։ Մանվել Գրիգորյանը գտնվում է Ակնալիճ համայնքի իր տանը, որը հսկում են ոստիկանները։
Կարծիքներ