Կիրանցի բնակիչները քշել են չափագրում կատարողներին․ Բաղանիսցիները պահանջում են մինչև Իրանի սահման փաթեթային սահմանազատման եղանակ
«Մինչև առավոտյան ժամը հինգը ճանապարհը փակել ենք, հետո բացել ենք»,- «Հրապարակի» հետ զրույցում տեղեկացրեց Տավուշի մարզի Բաղանիս գյուղի նախկին վարչական ղեկավար Նարեկ Սահակյանը։ Նա նշեց, որ ոստիկանների կողմից ուժ չի կիրառվել, վերաբերմունքը բնակիչների հանդեպ հարգալից է եղել։ Հարցին, արդյոք ոստիկանները մարզային ոստիկաններն են եղել, ասաց՝ այո։
«Հիմա Կիրանցի հատվածում են հավաքված, սկսել են չափագրողները չափումներ անել՝ գյուղացիները քշել են, չեն թողել շարունակեն»,-ասաց Սահակյանը:
Կիրանց գյուղի հատվածում կիրանցիներն են հավաքվել, իսկ բաղանիսցնիներն իրենց քայլերի մասին կտեղեկացնեն ավելի ուշ՝ ամենայն հավանականությամբ երեկոյան: Բաղանիսցիներին այցելության եկել է միայն մարզպետը. «Ասեց՝ լավ է լինելու, մեր համար՝ բաղանիսցիների համար լավ է լինելու. չգիտեմ, անորոշ վիճակ է»:
Փաշինյանի տեսլականը, այն է, որ հիսուն մետր հեռավորության վրա Արդբեջանի լինելը պետք է լավ լինի հայերի համար՝ Սահակյանն ասաց, իհարկե լավ չի լինելու:
«Այս պայմաններով սահմանազատումը մեզ համար անընդունելի է, ամեն ինչ պիտի լինի փաթեթային ճանապարհով: Մենք առաջարկում ենք Վրաստանի, Ադրբեջանի սահմանակետից, որ մինչև Սյունիք՝ Իրանի սահման քարտեզներով աշխատեն՝ դա կլինի երեք տարի, հինգ տարի, երկու տարի։ Իրենք փաթեթով չեն անում՝ կտոր-կտոր են անում»,-ասաց Բաղանիսի նախկին վարչական ղեկավարը։
Հարցին, իսկ տեղեկացրե՞լ են, թե որ թվականի քարտեզով են աշխատում, ասաց, որ իրենց ասել են 1972 թվականի քարտեզով են անում սահմանազատումը:
«Մեզ համար նշանակություն չունի, թե որ թվականի քարտեզով են անում սահմանազատումը, կարևորը, որ մեր գյուղերը չտուժեն։ Եթե Փաշինյանի առաջարկած լուծումներն ընդունելի լինեին մարդկանց համար՝ չէին հավաքվի»,-եզրափակեց Նարեկ Սահակյանը:
Կարծիքներ