ԶԼՄ-ներն անազատ են քաղաքական եւ տնտեսական պայմանների բերումով
![Մեսրոպ Հարությունյան, Աշոտ Մելիքյան](/images/2011/01/6-ej-inchu-e1296233247458-400x250.jpg)
Եվ այսպես, ինչպես 2010-ին արդեն արձանագրվել էր, Խոսքի ազատության պաշտպանության կոմիտեի կողմից ՝ Հայաստանում ԶԼՄ-ները գտնվում են մասնակի ազատից անազատի վերածվելու եզրագծին: Փաստորեն, ըստ փորձագետների, եթե ԶԼՄ-ների վերաբերյալ օրենսդրությունը բավական բարենպաստ է՝ բացառությամբ «Հեռուստատեսության եւ ռադիոյի մասին» օրենքի, ապա թերի է օրենքներում ամրագրված նորմերի ու իրավունքների կիրառման մասով:
«Այսինքն՝ օրենքի առջեւ պետք է հավասար լինեն բոլորը, եւ եթե լրագրողների եւ լրատվամիջոցների իրավունքները խախտվում են, ապա մեղավորները պետք է պատիժ կրեն, ինչը մենք հաճախ չենք տեսնում, գրեթե չենք տեսնում»,-նշեց Խոսքի ազատության կոմիտեի տնօրեն Աշոտ Մելիքյանը: Եթե իրավական դաշտում ԶԼՄ-ների գործունեությունը կարելի է գնահատել մասնակի ազատ, ապա լրատվամիջոցների տնտեսական եւ քաղաքական միջավայրերի պայմանները դա թույլ չեն տալիս:
Սակայն տեղական եւ միջազգային կազմակերպությունների կողմից արձանագրվեց, որ, ի տարբերություն հեռուստատեսությունների, տպագիր մամուլում եւ էլեկտրոնային լրատվամիջոցներում բազմակարծությունը գոնե արտացոլված է: «Հեռարձակման ոլորտն իսկապես կառավարելի է, եւ կարծես դիրիժորական փայտիկով կարող են ինչ-որ թեմաներ լուսաբանվել, ինչ-որ թեմաներ՝ ոչ»,-ասաց Մելիքյանը, վկայակոչելով իշխանական եւ ընդդիմադիր գործիչների լուսաբանման խտրականությունը:
««Հեռուստատեսության եւ ռադիոյի մասին» օրենքն իմ պատկերացմամբ միակն է, որի շուրջ երբեք իշխանությունների հետ փոխհամաձայնության հասնել չի հաջողվել, նրանք համարել են, որ հեռուստատեսությունն իրենց իշխելու ոլորտն է»,-նշեց Խոսքի ազատության պաշտպանության կոմիտեի փորձագետ Մեսրոպ Հարությունյանը: Նրա խոսքով՝ հեռուստաընկերություններն իշխանության համար պրոպագանդայի եւ փիառ-ի միակ միջոցն են՝ հատկապես մարզերում: «Պետք է մտցնել պարզ լիցենզավորման համակարգ, համաձայն որի՝ յուրաքանչյուր անձ կարող է դիմել ՀՌԱՀ-ին ու պարզ ընթացակարգով լիցենզիա ստանալ, դրանից հետո նոր ընտրել հեռարձակման ձեւը՝ կաբելային, ինտերնետ, մասնավոր շահագործման կապուղի եւ այլն»:
Հատկապես կարգավորող մարմինների ընտրության եւ պետական կապուղիներով մրցույթին մասնակցելու ժամանակ, ըստ Հարությունյանի, հանրային լսումներ իրականացնելու անհրաժեշտություն կա: «Այսօր ՀՀ-ում 1 տոկոսից պակաս մարդ գիտի, թե իրեն ինչ է սպասվում 2012-ին: Եթե չեք հավատում՝ պատվիրեք սոցհարցում Ահարոն Ադիբեկյանին»: Մասնագետների համոզմամբ՝ սխալ է նաեւ «ՀՌԱՀ-ի կապվածությունը գործադիր մարմինների հետ»: Իսկ 2010-ին լրագրողների նկատմամբ ֆիզիկական բռնությունները 2009-ի համեմատությամբ քիչ, բայց նվազել են, մինչդեռ ԶԼՄ-ների եւ նրանց աշխատակիցների նկատմամբ ճնշումներն ավելացել են:
Լուսինե ՇԱՀՎԵՐԴՅԱՆ
Կարծիքներ