Թեկնածուն մեկն է՝ գործող տնօրենը

Մոտ մեկ ամիս առաջ ՀՀ կրթության եւ գիտության նախարարությունը հայտարարել էր բաց մրցույթ՝ «Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտ» ՊՈԱԿ-ի տնօրենի թափուր պաշտոնը զբաղեցնելու համար: Մրցույթին մասնակցելու համար դիմումները պետք է ներկայացվեին սեպտեմբերի 25-ից մինչեւ հոկտեմբերի 25-ը: Ինչպես եւ կանխատեսվում էր, թեկնածուներ առանձնապես չեղան, հիմնական թեկնածուն մեկն է՝ գործող տնօրեն Հրաչյա Թամրազյանը, ով  2007 թվականից զբաղեցնում է Մատենադարանի տնօրենի պաշտոնը:  Երեկ կրթության եւ գիտության նախարարության անձնակազմի կառավարման վարչությունից տեղեկացանք, որ տնօրենի պաշտոնի մրցույթի համար միայն գործող տնօրենն է առաջադրվել: Իսկ դա նշանակում է, որ ընտրության օրը՝  նոյեմբերի 5-ին, անակնկալներ չեն լինի: