Ձեզ շատ սիրում եմ

Սահմանադրական փոփոխությունների հայեցակարգը քննարկելու նպատակով «Ժառանգության» ներկայացուցիչներ Ռուբիկ Հակոբյանի եւ Արմեն Մարտիրոսյանի՝ Բաղրամյան 26 կատարած այցի շուրջ բորբոքված կրքերը կհանդարտվեն առանց որեւէ մեկին կուսակցությունից հեռացնելու: Ամերիկայից այդպես է հասկացրել Րաֆֆի Հովհաննիսյանը, ում վերադարձին կուսակիցներն սպասում են այս շաբաթ: Առաջնորդի վերադառնալուն կհաջորդի կուսակցության ընդդիմադիրներին ու իշխանամետներին բարիշացնելու գործընթացը: Սակայն մինչ այդ Զարուհի Փոստանջյանն արդեն հրապարակավ որոշ սրբագրումներ կատարել է՝ Սերժ Սարգսյանին այցելած Արմեն Մարտիրոսյանին առանձնացնելով Ռուբիկ Հակոբյանից: Մեր թերթում Անահիտ Բախշյանին ուղղված մի նամակի տակ Փոստանջյանը երկու օր առաջ թողել է հետեւյալ մեկնաբանությունը. «Անահիտ, Արմեն եւ Ստյոպ, եւ անփոխարինելի Րաֆֆի Հովհաննիսյան, Ձեզ շատ սիրում եմ»: Իսկ սրանից օրեր առաջ Զարուհի Փոստանջյանը Սերժ Սարգսյանի հրավերն ընդունելու կապակցությամբ իր կուսակիցների մասին ասել էր. «Հավանաբար, գնացել են որպես Բաղրամյան 26-ի հաճախորդներ»: