Վրացիների հետ հանդիպելն անիմաստ բան է, Ջավախք մեկնելու ցանկություն էլ առայժմ չկա

ԱԺ նախագահ Գալուստ Սահակյանի եւ Հարավային Օսեթիայի խորհրդարանի ղեկավար Անատոլի Բիբիլովի «անմեղ, մարդկային» հանդիպումն առաջացրեց վրացական իշխանությունների դժգոհությունը, թե իրենց բարեկամ Հայաստանի երկրորդ դեմքը հանդիպում է ունեցել Վրաստանից անկախացած, ինքնահռչակ հանրապետության խոսնակի հետ: Սա իրարանցում էր առաջացրել նաեւ Հայաստանում, քանզի ՀՀԿ-ականներն ու ԱԳՆ-ն խառնվել էին իրար՝ «բացատրություն» տալու հարեւան Վրաստանին, թե ինչու է Հայաստանում նման հանդիպում տեղի ունեցել: Այս կապակցությամբ Վրաստանում Հայաստանի դեսպան Յուրի Վարդանյանը հրավիրվել էր Վրաստանի ԱԳՆ՝ բացատրություն տալու:

ԱԺ նախագահ Գալուստ Սահակյանը երեկ այս առնչությամբ վստահեցրեց, որ որեւէ սկանդալ ու խնդիր չկա այստեղ, եւ հայ-վրացական հարաբերություններում ամեն ինչ կարգին է: Իսկ ինչ վերաբերում է Յուրի Վարդանյանի ափսոսանք հայտնելուն՝ իր այդ հանդիպման կապակցությամբ, ԱԺ նախագահն ասաց. «Ափսոսանք կարող է հայտնել, ես էլ եմ ափսոսանք հայտնում, որ սխալ ընկալում է տեղի ունեցել, որ իրենց համար, ճանաչելով ինձ, երբեւիցե էդ խնդիրը չէր առաջանա: Դրա համար մտածում եմ՝ Վրաստանում էլ քաղաքական ուժեր կան, խնդիրներ են բարձրացնում, ինչպես մեզ մոտ»: Գալուստ Սահակյանին եւս մի քանի հարց ուղղեցինք այս թեմայի շրջանակներում՝ անդրադառնալով նաեւ Ջավախքի խնդիրներին:

- Մենք այսօր Վրաստանից կախվածությո՞ւն ունենք կամ վտա՞նգ ենք տեսնում, որ այսպիսի մեղմ, ներում հայցող պատասխան տվեցինք իրենց:

- Մենք պաշտոնական ամուր կապեր ունենք, եւ ներողության անհրաժեշտություն չկա, որովհետեւ ցանկացած անձ, ով փորձի իմ ձեռքը սեղմել եւ խոսել Ցեղասպանության մեր նահատակների մասին, բնականաբար, ես ձեռքը կսեղմեմ:

- Սերժ Սարգսյանի կողմից որեւէ վերաբերմունք եղե՞լ է Ձեր այդ հանդիպման ու բարձրացած աղմուկի կապակցությամբ:

- Այդ սկանդալային երեւույթները լրատվության եւ քաղաքական գործիչների մեջ են:

- Պատրաստվո՞ւմ եք, արդյոք, պատգամավորական խումբ գործուղել Վրաստան՝ հարթելու խնդիրներն ու պարզաբանելու եղելությունը:

- Անիմաստ բան է հանդիպելը, ես Վրաստանի հետ շատ ջերմ վերաբերմունք ունեմ, առավել եւս ճանաչում եմ բոլորին, քաղաքական էլիտային, բավականին լավ ընդունելություններ են լինում ե՛ւ Հայաստանում, ե՛ւ Վրաստանում, էնպես որ, նրանք, ովքեր փորձում են ինչ-որ բան գտնել իմ անձը կշռադատելի համարելով, կարծում եմ՝ անտեղի է:

- Ի՞նչ եք կարծում, վրացական իշխանությունների կողմից կա՞ ըմբռնում, որ Հայաստանն էլ քաղաքական շահեր ունի, ինչպես իրենք ունեն իրենց շահը մեր հարեւան հակառակորդ երկրների հետ:

- Գալուստ Սահակյանը քաղաքական շահերի վերաբերյալ որեւէ հանդիպում էդպես պատահական չի ունենում: Քաղաքական շահերի քննարկումները պաշտոնական կամ աշխատանքային այցերի ժամանակ են լինում:

- Իսկ դա ընկալվե՞լ է իրենց կողմից, արձագանք եղե՞լ է:

- Համենայնդեպս, հակառակն էլ չկա, եթե նման խնդիր լիներ, մեր փոխհարաբերություններն այնպիսին են, որ կփորձեին ինձ հետ ճշտել:

- Մի հարց էլ՝ Ջավախքի հետ կապված. Ջավախքն այսօր հայաթափվում է, փոխարենը թուրքեր ու ադրբեջանցիներ են գալիս տնավորվում...

- Դրանք մշտապես վտանգավոր երեւույթներ են եւ այսօրվա երեւույթ չի, եւ կարծում եմ, որ մեր հայրենակիցները, համենայնդեպս, էնտեղ կարողանում են իրենց խնդիրներն առաջադրել, մեր բոլոր հանդիպումներում էլ այդ նույն խնդիրները բարձրացնում ենք նաեւ վրացական իշխանությունների մոտ:

- Ջավախքցիները դժգոհում են, որ Հայաստանի իշխանությունների կողմից պատշաճ ուշադրություն ու աջակցություն չի ցուցաբերվում իրենց, նախկինում այդպես չէր, հիմա ուշադրության լուրջ պակաս են զգում:

- Միայն իմ այցի հետեւանքով կոնկրետ գործնական որոշումներ կայացրին:

- Պատրաստվո՞ւմ եք առաջիկայում մեկնել Ջավախք, հանդիպումներ ունենալ ջավախահայ բնակչության հետ:

- Ոչ, իմ աշխատանքային օրակարգում նման հարց չկա:

Վահե ՄԱԿԱՐՅԱՆ