Չկա էդենց բան, որ մեկը մյուսի գիրկը նստի
Այսօր Գյումրու ավագանու հերթական նիստին անդրադարձ եղավ քաղաքի երթուղային համակարգին, որը շուտով փոփոխության է ենթարկվելու:Քաղաքապետ Սամվել Բալասանյանի խոսքերով 5 տարի շարունակ խնդրում, հորդորում է ներդրողներին ավտոբուսներ հատկացնել. «Մեր եղածը քիչ է, գազել- բան պիտի դուրս գա, մեծ ավտոբուսներ պիտի բերվեն, չկա էդենց բան, որ մեկը մյուսի գիրկը նստի»,-նշեց վճռական տրամադրված քաղաքապետը: Միայն թե քաղաքապետի հորդորներին անսացողներ չկան:
Նկատենք, որ շատ ներդրողներ Գյումրիում երթուղային բիզնես չեն իրականացնում ճանապարհների եւ փողոցների քարուքանդ լինելու, ինչպես նաև ուղևորահոսքի պակասի պատճառով:
Գյումրիում ընթացող փողոցաշինությունը երթուղային համակարգի փոփոխության անհրաժեշտության պատճառ է դարձել: Ավագանին ուսումնասիրելու է մոտ 7 տասնյակ նոր տիպի կանգառներ սարքելու ծրագիրը:Կանգառները սմարթ սիստեմով են առանձնանալու, WI- FI է լինելու, լիցքավորման ապարատներ։ Ծրագրի 60 տոկոսը սուբսիդավորելու է կառավարությունը: Համայնքի բյուջեից շուրջ 250 միլիոն կհատկացվի տրանսպորտային միջոցների ձեռք բերմանը։
Կարծիքներ