Ես ոստիկանությունում էլ ընկերներ ունեմ
hraparak
31 Հոկտեմբեր 2013 | 06:40
0
Շիրակի մարզում քրեական մթնոլորտը խաղաղ է, թեեւ այնտեղից չեն արտագաղթել այն մարդիկ, որոնց պատճառով պարբերաբար մոլեգնում էր քրեական ցունամին: Վերջին աղմկոտ դեպքն ապրիլի 23-ին նախկին քաղաքապետ Վարդան Ղուկասյանի եւ ԱԺ ԲՀԿ-ական պատգամավոր Մարտուն Գրիգորյանի կլանների միջեւ փոխհրաձգությունն էր, որն ավարտվեց Մարտուն Գրիգորյանի ընտանիքի մերձավոր Արտյոմ Կարապետյանի՝ Շեկոյի մահով: Միջադեպի պատճառով կրիմինալ քաղաքը հայտնվեց խիստ հսկողության ներքո գողական ու միլիցիա խառնվեցին իրար՝ կատարյալ սոդոմ-գոմոր: Գյումրի այցելեց Վովա Գասպարյանը՝ նրանց հետ ճշտելու՝ գողակա՞ն են, թե՞ պատգամավոր, ապա նախազգուշացրեց, որ երկու կլանները, որոնք երկար տարիներ արյունահեղություններով, զոռբայություններով, ջարդուփշուրներով իրենցն են թելադրում, բոլորը «կհայտնվեն այնտեղ, որտեղ պետք է հայտնվեն մարդիկ, ովքեր զենքով եւ արյունով են լուծում խնդիրները»: Այնուհետ «ֆրոնտ» ուղարկվեցին համազգեստավոր «հրեշտակները»: Այս ռեժիմն իր արդյունքը տվեց՝ Գյումրին կրիմինալի մայրաքաղաքի կոչումը զիջեց Լիսկայի Սյունիքին: Միջոցառումներն իրենցն արեցի՞ն, թե՞ կողմերը վերանայեցին իրենց իրական կարգավիճակը՝ երեկ հետաքրքրվեցինք Մարտուն Գրիգորյանից:
- Ինչպե՞ս են հարաբերությունները Ղուկասյանների հետ, Գյումրիում կրիմինալ վիճակը…
- Ոչ մի բան չկա, ոչ մի նորություն չկա, մենք միշտ խաղաղ ենք եղել:
- Բայց չե՞ք բարիշել…
- Ի՞նչ նկատի ունեք, ինչի՞ համար…
- Դե, ապրիլյան աղմկահարույց դեպքերից հետո:
- Ես ասում եմ՝ Գյումրիում ընդհանուր նորմալ իրավիճակ է:
- Ինչի՞ց հետո է նորմալ, սպառնալից նախազգուշացումնե՞րը, որ պատգամավոր եք, թե՞ գողական հարցադրումներն ազդեցություն ունեցան:
- Այդ հարցի պատասխանը Գասպարյանը տվել է, թե էդ ամեն ինչն ում է ուղղված կամ ուղղված չէ, կոնկրետ էդ խնդիրը մեզ հետ կապված չէր:
- Այդ դեպքից հետո Գյումրի գործուղվեց նաեւ ոստիկանության հատուկ գունդը, այն նպատակին ծառայո՞ւմ է՝ ըստ Ձեզ:
- Շատ լավ է արել, շատ լավ է արել, ընդհանուր վերահսկողությունը, ընդհանուր անվտանգությունը քաղաքացիների, ժողովրդի եթե հնարավորություն ունի պահպանելու, յուրաքանչյուրս էլ ուրախ ենք: Յուրաքանչյուրս էլ պատրաստ ենք օգնելու, աջակցելու թե ոստիկանապետին, թե դատախազությանը ու ոչ միայն Գյումրիում, այլ ամբողջ հանրապետությունում, որ նմանատիպ դեպքեր չլինեն: Ու մարդիկ կարողանան ազատ տեղաշարժվեն ու անփորձանք լինեն: Ճիշտն ասած՝ գնահատականներ տամ, թե դրանից է, դրանից չէ, չեմ կարող ասել, բայց, այնուամենայնիվ, իր դրական ազդեցությունը, միանշանակ, ունեցավ էդ ամեն ինչում:
- Հաշվի առնելով, որ կողմերից մեկն էլ Դուք էիք, եթե որեւէ միջադեպ լինի Ձեր եւ այլ խմբի միջեւ, Դուք հաշվի կառնե՞ք այդ զգուշացումները:
- Ես Ազգային ժողովի պատգամավոր եմ, իմ թիմը քաղաքական թիմ է, զբաղված է քաղաքական գործունեությամբ իմ ընտրատարածքի հարցերով, բնականաբար, ես չեմ կարող մտածել էդ ուղղությամբ, թե ինչ-որ կրիմինալ հարցի պարագայում դա նկատի ունենամ կամ չէ: Իսկ մյուսների առումով, բնականաբար, ունենալու է իր դրական ազդեցությունը, քանի որ յուրաքանչյուր մարդ յուրաքանչյուր արարք թույլ տալուց առաջ պտի մտածի՝ ի վիճակի՞ է դրա տակից դուրս գալու, թե՞ չէ: Նաեւ կա ծայրահեղ իրավիճակ, չէ՞ որ մարդը երբեմն ծայրահեղ իրավիճակի է հասնում, այդ խնդիրն էլ կա…. Մեր թիմն էստեղ կապ չի ունեցել, մարդիկ օրը ցերեկով իրենց առօրյա խնդիրներվ են զբաղվել, եւ իրենց վրա հարձակվել են: Կոնկրետ էս պահի դրությամբ իմ թիմը կապ չուներ, ոչ մի նախաձեռնող չի եղել, տուժող կարգավիճակ է եղել: Էստեղ էդ զսպաշապիկի կամ զսպման մասին ինչ որ կա, դա կարող է վերաբերել մյուս կողմին: Իմ թիմի հետ կապ չունի:
- Ձեզ լա՞վ եք զգում, որ գողականների շարքն են դասում: Կան մարդիկ, ովքեր լավ են զգում, ուժեղ…
- Ինձ այդպես ասողները հստակ նպատակ ունեն. ինձ դա ասելով՝ իրենց վրայից բեռը թեթեւացնել: Գյումրիում ինձ ճանաչում են որպես աշխատող ժողովրդի կողքին կանգնած պատգամավոր: Ինձ ճանաչում են որպես հարգված, ընդունված մարդ: Բացարձակապես ես դրա համար ուրախ չեմ, դա իրականության հետ կապ չունի, արհեստական շրջանառության մեջ դրած միտք է:
- Բայց Ձեր ազգականները գողականներ են:
- Մեր թիմը մեծ թիմ է, մեր թիմի մեջ կան թասիբով, ինքնասիրություն ունեցող, շնորհքով, հասարակ, գործարար մարդիկ, արվեստագետներ՝ բազմաշերտ թիմ է: Քաղաքի մեծամասնությունն իմ թիմն է համարվում, այդ մեծ թիմի մեջ կարող է լինել մարդ, ով, անձնական խնդիրներից դուրս գալով, նման քայլի գնա, միանշանակ, էս ամեն ինչը բերում-կապում են պատգամավորի հետ: Ինձ դրանով փորձում են սեւացնել, բայց դա հակառակ էֆեկտն է տալիս:
- Դուք ավելի շատ գողակա՞ն, թե՞ Ձեր նշած արվեստագետ ընկերներ ունեք:
- Ես ոստիկանության մեջ էլ ընկերներ ունեմ:
Գայանե ՍԱՐԻԲԵԿՅԱՆ
Կարծիքներ